អនាគតនាយករដ្ឋមន្ត្រីថ្មីរបស់ ថៃ ប្រាប់ឈ្មោះកោះដែលបក្សនឹងអនុវត្ត​គោលនយោបាយតាម

អនាគតនាយករដ្ឋមន្ត្រីថ្មីរបស់ថៃលោក Pita Limjaroenrat បានអះអាងថា គោលនយោបាយមួយចំនួនរបស់គណបក្សចលនាឆ្ពោះទៅមុខ និងដៃគូចម្រុះ គឺទទួលបានការបំផុសគំនិតពីកោះតៃវ៉ាន់ ។

ថ្លែង​ក្នុង​បទសម្ភាសន៍​ជាមួយ​ទីភ្នាក់ងារ​ព័ត៌មាន​ចិន CNA, លោក Pita បានលើកឡើងថា គោលនយោបាយភាគច្រើនរបស់ក្រុមចម្រុះ គឺផ្អែកលើបទពិសោធន៍របស់តៃវ៉ាន់ដែលធ្លាប់អនុវត្តរួចហើយ ជាពិសេសគឺសមភាពអាពាហ៍ពិពាហ៍ភេទដូចគ្នា ។  

លោក Pita បាននិយាយថា សមភាពអាពាហ៍ពិពាហ៍ គឺជាបញ្ហាមួយដែលគណបក្សរបស់គាត់អាចនឹងធ្វើតាមតៃវ៉ាន់ បន្ទាប់ពីកោះមួយនេះបានក្លាយជាកន្លែងដំបូងគេនៅអាស៊ី ដែលអនុញ្ញាតឲ្យមានអាពាហ៍ពិពាហ៍ភេទដូចគ្នាស្របច្បាប់ក្នុងឆ្នាំ ២០១៩ ។

ទន្ទឹមនោះ ប្រទេសថៃក៏អាចរៀនសូត្រពីការលើកកម្ពស់តម្លាភាព និងអភិបាលកិច្ចល្អរបស់តៃវ៉ាន់ផងដែរ ដូចជាការប្រើប្រាស់វេទិកាឌីជីថល ដើម្បីធ្វើឲ្យព័ត៌មានរបស់រដ្ឋាភិបាលអាចចូលប្រើប្រាស់បានកាន់តែច្រើន ។

ដោយឡែកនៅពេលដែលអ្នកសារព័ត៌មានសួរនាំអំពីគោលនយោបាយការបរទេសនាពេលអនាគតវិញ, លោក Pitaបានប្រាប់សារព័ត៌មាន CNA ថា វាត្រូវតែជាគោលនយោបាយ “ការទូតផ្អែកលើច្បាប់” ក្នុងគោលបំណង ស្ថិរភាពនៅអាស៊ី និងពិភពលោកទាំងមូល ។

គួរបញ្ជាក់ថា ក្រៅពីគោលនយោបាយសមភាពអាពាហ៍ពិពាហ៍ភេទដូចគ្នា គណបក្សចលនាឆ្ពោះទៅមុខក៏បានដាក់ចេញគោលនយោបាយមួយចំនួនទៀតផងដែរ ដូចជា នាំប្រទេសថៃទៅរកលទ្ធិប្រជាធិបតេយ្យ, ប្រឆាំងរបបយោធានិយម, សមភាពសេដ្ឋកិច្ច, លុបចោលការកេនប្រជាពលរដ្ឋចូលបម្រើយោធា, ការស្វែងរកប្រជាមតិទាក់ទងនឹងការសរសេររដ្ឋធម្មនុញ្ញឡើងវិញ និងកំណែទម្រង់របបរាជានិយមជាដើម ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ មេដឹកនាំគណបក្សចម្រុះ ថៃ បង្ហាញបេក្ខភាពស័ក្តិសមជាប្រធានសភា