មេដឹកនាំគណបក្សចម្រុះ ថៃ បង្ហាញបេក្ខភាពស័ក្តិសមជាប្រធានសភា

មេដឹកនាំគណបក្សចម្រុះមួយបានអះអាងកាលពីពេលថ្មីៗនេះថា ការតែងតាំងមេដឹកនាំគណបក្សប្រាឆាឆាត (Prachachat) លោក Wan Muhammad Nor Matha ជាប្រធានសភា នឹងក្លាយជាមធ្យោបាយដ៏ល្អបំផុតដើម្បីបញ្ចប់ជម្លោះដែលកំពុងបន្តរវាងគណបក្សចលនាឆ្ពោះទៅមុខ និងគណបក្សភឿថៃ ។

មេដឹកនាំគណបក្សសេរីរួមថៃ (Seri Ruam Thai) លោក Sereepisuth Temiyavet បាននិយាយថា លោក Wan Muhammad ពិតជាស័ក្តិសមនឹងតំណែងមួយនេះ ដោយសារតែលោកគឺជាអ្នកនយោបាយជើងចាស់ និងដោយសារតែលោកធ្លាប់កាន់តំណែងនេះពីមុនមកផង ខណៈគណបក្សប្រាឆាឆាត (Prachachat) ក៏ទទួលបានអាសនៈសភាចំនួន ៩ នៅក្នុងការបោះឆ្នោតសកលផងដែរ ។

លោក Sereepisuth ជាអគ្គស្នងការនគរបាលជាតិថៃដែលចូលនិវត្តន៍បាននិយាយទៀតថា ដោយសារតែគណបក្សរបស់លោកឈ្នះបានតែ ១ អាសនៈ ដូច្នេះលោកមិនអាចទាមទារមុខងារជារដ្ឋមន្ត្រីណាមួយនៅក្នុងជួររដ្ឋាភិបាលថ្មីបាននោះទេ ។

ប៉ុន្តែលោកបានបញ្ជាក់ថា ប្រសិន​បើ​រដ្ឋាភិបាល​ចម្រុះ​ប្រគល់​មុខ​តំណែង​ណា​មួយ​មកឲ្យរូបលោក នោះលោក​ត្រៀម​ខ្លួន​ជា​ស្រេច​ក្នុង​ការ​បំពេញ​ការងារ​ទាំងនោះ ដោយសារតែលោក​អាច​ធ្វើ​ការ​បាន ទាំងនៅ​ក្នុង​ក្រសួង​មហាផ្ទៃ ការពារ​ជាតិ យុត្តិធម៌ ឬ​ក្រសួង​ពាក់ព័ន្ធ​នឹង​សន្តិសុខជាដើម ។

គួរបញ្ជាក់ថា ពាក់ព័ន្ធនឹងតំណែងសភានេះដែរ គណបក្សធំៗចំនួន ២ នៅក្នុងក្រុមចម្រុះដែលដឹកនាំដោយលោក Pita Limjaroenrat អនាគតនាយករដ្ឋមន្ត្រីថៃ បាននិងកំពុងឈ្លោះប្រកែកគ្នាជាច្រើនថ្ងៃមកហើយ ខណៈមានមតិជាច្រើនលើកឡើងផងដែរថា មេ​ដឹកនាំ​នៃ​គណបក្ស​ចម្រុះ​ទី​បី គួរ​តែ​កាន់​តំណែង​នេះ ដើម្បី​ជា​ផ្លូវត្រួសត្រាយ​ចេញ​ពី​ការ​ជាប់​គាំងណាមួយក្នុងការបង្កើតរដ្ឋាភិបាលចម្រុះថ្មី ៕

ប្រែសម្រួលដោយ ៖ ជីវ័ន្ត

ប្រភព ៖ Thai PBS

ចុចអាន ៖ ថៃ នឹងប្រកាសលទ្ធផលបោះឆ្នោតផ្លូវការក្នុងពេលឆាប់ៗនេះ ក្រោយមាន បញ្ហាបន្តិចបន្តួច