អ៊ីស្លង់ ប្រកាសអាសន្ននិងជម្លៀសប្រជាជន ដោយសារការគំរាមកំហែង ផ្ទុះភ្នំភ្លើង

ប្រទេសអ៊ីស្លង់ បានប្រកាសដាក់ប្រទេសក្នុងគ្រាអាសន្ន បន្ទាប់ពីមានសកម្មភាពរញ្ជួយដីខ្លាំងនៅឧបទ្វីប Reykjanes ភាគនិរតី ខណៈប្រធានាធិបតី Gudni Johannesson ប្រកាសកាលពីថ្ងៃសៅរ៍ទី១០ខែវិច្ឆិកាថា អ្នកក្រុង Grindavik ទាំងមូលត្រូវបានជម្លៀសចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការិយាល័យឧតុនិយមអ៊ីស្លង់, ការរញ្ជួយដីប្រហែល៨០០លើក ត្រូវបានកត់ត្រានៅឧបទ្វីបនេះ ចាប់តាំងពីពាក់កណ្តាលអធ្រាត្រមក ហើយលទ្ធភាពនៃការផ្ទុះភ្នំភ្លើងនាពេលខាងមុខ ពិតជាមានកម្រិតខ្ពស់។

ហេតុនេះ ក្រសួងការពារជនស៊ីវិលនិងគ្រប់គ្រងគ្រាអាសន្នបានប្រកាសអាសន្ន ហើយបញ្ជាឲ្យអ្នកក្រុង Grindavik ដែលជាទីក្រុងនេសាទមានមនុស្សប្រហែល ៣៣០០នាក់ ត្រូវជម្លៀសចេញ។

ទន្ទឹមនោះ ទូរទស្សន៍ RUV ផ្សាយថា មានផ្ទាំងសិលាម៉ាក់ម៉ា ស្ថិតនៅខាងក្រោមទីក្រុងនេះ។ ស្នាមប្រេះ អាចបើកមុខនៅចំណុចណាមួយ តាមបណ្តោយផ្លូវក្រោមដី និងបណ្តាលឲ្យមានការផ្ទុះកម្អែភ្នំភ្លើង។

កាលពីខែកក្កដា ការផ្ទុះភ្នំភ្លើងមួយបានកើតឡើងនៅលើឧបទ្វីប Reykjanes ដូចគ្នានេះ។ វាជាលើកទីបីក្នុងរយៈពេលបីឆ្នាំ ដែលព្រឹត្តិការណ៍រញ្ជួយដី បានកើតឡើងនៅតំបន់ដដែល ដោយលើកដំបូងបានកើតឡើងនៅឆ្នាំ២០២១៕

ប្រែសម្រួល៖ Vann Vann

ប្រភព៖ RT

ចុចអាន៖ ទិដ្ឋភាពកម្រ បង្ហាញពីព្យុះកំបុតត្បូង កើតចេញពីមាត់ភ្នំភ្លើង ក្នុងប្រទេសអ៊ីស្លង់