គ្រូពេទ្យហ្គាហ្សាជីកផ្នូរកប់សពរាប់សិប នៅក្នុងមន្ទីរពេទ្យ

ប្រជាជនប៉ាឡេស្ទីនដែលជាប់នៅខាងក្នុងមន្ទីរពេទ្យដ៏ធំបំផុតរបស់ហ្គាហ្សាកំពុងជីកផ្នូរដ៏ធំ ដើម្បីបញ្ចុះអ្នកជំងឺដែលបានស្លាប់នៅក្រោមការឡោមព័ទ្ធរបស់អ៊ីស្រាអែល។ ជាមួយគ្នានោះវេជ្ជបណ្ឌិត និងក្រុមគ្រូពេទ្យ ពុំមានផែនការដើម្បីជម្លៀសទារកចេញនោះទេ បើទោះបីជាអ៊ីស្រាអែលបានប្រកាសពីការបញ្ជូនឧបករណ៍ភ្ញាស់ចល័តក៏ដោយ។

កងកម្លាំងអ៊ីស្រាអែលបានឡោមព័ទ្ធមន្ទីរពេទ្យ Al Shifa ក្នុងទីក្រុងហ្គាហ្សា ដោយចោទថា នៅក្រោមមន្ទីរពេទ្យនេះជាទីស្នាក់ការរបស់ពួកសកម្មប្រយុទ្ធហាម៉ាស។

ក្រុមហាម៉ាសដែលជាក្រុមអ៊ីស្លាមនិយមដែលកំពុងកាន់អំណាចនៅហ្គាហ្សាបានបដិសេធជុំវិញការចោទប្រកាន់របស់អ៊ីស្រាអែល ហើយនិយាយថាអ្នកជំងឺ ៦៥០នាក់ និងជនស៊ីវិលដែលផ្លាស់ទីលំនៅផ្សេងទៀតពី ៥,០០០-៧,០០០នាក់ត្រូវបានជាប់នៅក្នុងបរិវេណមន្ទីរពេទ្យ ក្រោមការបាញ់ប្រហារឥតឈប់ឈរពីអ្នកលបបាញ់ និងយន្តហោះគ្មានមនុស្សបើក។ មកទល់ពេលនេះអ្នកជំងឺ ៤០នាក់ហើយបានស្លាប់ក្នុងរយៈពេលប៉ុន្មានថ្ងៃថ្មីៗនេះ រួមទាំងទារកមិនគ្រប់ខែចំនួន ៣នាក់។

លោក Ashraf Al-Qidra អ្នក​នាំពាក្យ​ក្រសួង​សុខាភិបាល​​តំបន់ហ្គាហ្សា ​​និយាយ​ថា បច្ចុប្បន្នមាន​សាកសព​ប្រហែល ១០០នាក់​បាន​រលួយ​នៅ​ខាង​ក្នុងមន្ទីរពេទ្យ ហើយ​គ្មាន​ផ្លូវ​អាច​យក​​ចេញ​បាន​ឡើយ។ ដោយសារតែបែបនេះ ក្រុមគ្រូពេទ្យគ្រោងនឹងបញ្ចុះសពពួកគេនៅថ្ងៃអង្គារនេះ ដោយបានជីកផ្នូរដ៏ធំមួយនៅខាងក្នុងអគារវេជ្ជសាស្ត្រ Al Shifa៕

ប្រែសម្រួល៖ សន្យា

ប្រភព៖ Reuters

ចុចអាន៖ WHO៖ មន្ទីរពេទ្យធំរបស់តំបន់ហ្គាហ្សា បានក្លាយជាកន្លែងដាក់សពទៅហើយ

ចុចអាន៖ ក្រុមហេសបូឡានឹងចូលរួមសង្រ្គាមអ៊ីស្រាអែល-ប៉ាឡេស្ទីន ពេញទំហឹង ​បើហាម៉ាសចាញ់