WHO៖ មន្ទីរពេទ្យធំរបស់តំបន់ហ្គាហ្សា បានក្លាយជាកន្លែងដាក់សពទៅហើយ

អង្គការសុខភាពពិភពលោក (WHO) បានព្រមានថា មន្ទីរពេទ្យធំរបស់តំបន់ហ្គាហ្សា បានក្លាយជាកន្លែងដាក់សពទៅហើយ ព្រោះមានសពដាក់គរលើគ្នានៅទីនោះ ហើយគ្រូពេទ្យភ័យខ្លាចចំពោះអ្នកជំងឺរាប់រយនាក់ មិនអាចទទួលបានការព្យាបាលសង្គ្រោះជីវិតបាន ខណៈការប្រយុទ្ធគ្នានៅខាងក្រៅ កំពុងមានសភាពខ្លាំងក្លា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅថ្ងៃអង្គារទី១៤ខែវិច្ឆិកា កងកម្លាំងអ៊ីស្រាអែល (AEDT) បានទៅដល់ច្រកទ្វារនៃមន្ទីរពេទ្យសំខាន់របស់ទីក្រុងហ្គាហ្សា គឺ Al Shifa ដែលជាគោលដៅចម្បងនៅភាគខាងជើងតំបន់នេះ។ នៅទីនោះ ក្រុមគ្រូពេទ្យនិយាយថា អ្នកជំងឺរួមទាំងទារកទើបនឹងកើត កំពុងស្លាប់តកន្ទុយគ្នា ដោយសារកង្វះប្រេងឥន្ធនៈ។

ទន្ទឹមនោះ កងកម្លាំងការពារអ៊ីស្រាអែល បានចេញបញ្ជាជម្លៀស ប៉ុន្តែក្រុមគ្រូពេទ្យបានបដិសេធចាកចេញ ដោយសារពួកគេខ្លាចថា អ្នកជំងឺ៧០០នាក់នឹងស្លាប់ ប្រសិនបើពួកគេ ត្រូវទុកចោល ហើយបើសិនពួកគេត្រូវបានផ្ទេរចេញ ពួកគេនឹងស្លាប់តាមផ្លូវ។ នេះបើតាមការបញ្ជាក់ពីវេជ្ជបណ្ឌិត Munir Al-Bursh អគ្គនាយកនៃក្រសួងសុខាភិបាល ដែលគ្រប់គ្រងដោយក្រុមហាម៉ាស ប្រាប់ទៅ CNN។

អ៊ីស្រាអែល បានចោទប្រកាន់ក្រុមហាម៉ាសថា មានមជ្ឈមណ្ឌលបញ្ជាការមួយនៅខាងក្រោមមន្ទីរពេទ្យនោះ ថ្វីបើរឿងនេះ ត្រូវបានក្រុមហាម៉ាស និងមន្ត្រីមន្ទីរពេទ្យបដិសេធក៏ដោយ។

អ្នកនាំពាក្យក្រសួងសុខាភិបាលហ្គាហ្សា លោក Ashraf Al-Qidra ដែលស្ថិតក្នុងមន្ទីរពេទ្យ Al Shifa និយាយថា អ្នកជំងឺចំនួន ៣២ នាក់បានស្លាប់ក្នុងរយៈពេល៣ថ្ងៃចុងក្រោយ រួមទាំងទារកទើបនឹងកើត៣នាក់ផងដែរ ដោយសារការឡោមព័ទ្ធមន្ទីរពេទ្យ និងកង្វះថាមពល៕

ប្រែសម្រួល៖ Vann Vann

ប្រភព៖ New Daily

ចុចអាន៖ អ្នកជំងឺ ៦៥០នាក់ កំពុងរង់ចាំសេចក្ដីស្លាប់ ដោយសារអ៊ីស្រាអែលឡោមព័ទ្ធមន្ទីរពេទ្យហ្គាហ្សា