អ៊ីរ៉ង់ គំរាមឆ្លើយតបចាស់ដៃទៅវិញ បើអាមេរិក ហ៊ានធ្វើអ្វី ប៉ះពាល់ខ្លួន

ក្រោយលោក ចូ បៃដិន ប្រកាសសងសឹកចំពោះការសម្លាប់ទាហានអាមេរិក នៅប្រទេសហ្ស៊កដានី ពេលនេះ ភាគីអ៊ីរ៉ង់ បានគំរាមថា ពួកគេនឹងឆ្លើយតបចាស់ដៃទៅវិញ បើមានការវាយប្រហារណាមួយលើទឹកដីរបស់ខ្លួន ឬជនជាតិក៏ដូចជាទីតាំងរបស់ខ្លួននៅក្រៅប្រទេស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន IRNA បានដកស្រង់សម្តីប្រេសិតអ៊ីរ៉ង់ប្រចាំអង្គការសហប្រជាជាតិ លោក Amir Saeid Iravani ដែលនិយាយថា វាគឺជាគោលនយោបាយរបស់អ៊ីរ៉ង់ ដែលត្រូវឆ្លើយតបខ្លាំងក្លាចំពោះសត្រូវ ក្នុងករណីមានការវាយប្រហារណាមួយ។

កាលពីថ្ងៃអង្គារទី៣០ខែមករា ពេលជួបជាមួយអ្នកសារព័ត៌មាននៅសេតវិមាន លោក បៃដិន បានប្រកាសសម្រេចចិត្តសងសឹក ប៉ុន្តែមិនបញ្ជាក់លម្អិតថាតើការសងសឹកនោះជាអ្វីទេ គ្រាន់តែអះអាងថា លោកមិនចង់មានសង្គ្រាមធំ នៅតំបន់មជ្ឈិមបូព៌ាប៉ុណ្ណោះ។ លើសពីនេះ លោកសង្កត់ធ្ងន់ថា យើងនឹងឲ្យអ៊ីរ៉ង់ ទទួលខុសត្រូវចំពោះការដែលពួកគេផ្គត់ផ្គង់អាវុធដល់អ្នកប្រព្រឹត្ត។

ស្របពេលជាមួយគ្នានោះ អ្នកនាំពាក្យសេតវិមានលោក John Kirby ក៏និយាយដែរថា សហរដ្ឋអាមេរិក នឹងចាត់វិធានការតាមដំណាក់កាល នៅក្នុងការឆ្លើយតបរបស់ខ្លួន។

តាមការបញ្ជាក់របស់លោក Kirby, សហរដ្ឋអាមេរិក នឹងមិនធ្វើសកម្មភាពតែមួយលើកទេ ពោ​លគឺធ្វើតាមដំណាក់កាល ក្នុងពេលវេលាយូរអង្វែង។ លោកប្រធានាធិបតី មានជម្រើសច្រើន រួមទាំងការវាយប្រហារសងសឹកលើមូលដ្ឋាននិងមេបញ្ជាការរបស់សម្ព័ន្ធអ៊ីរ៉ង់ ទៀតផង។ អាមេរិក ក៏អាចកំណត់គោលដៅលើមេបញ្ជាការជាន់ខ្ពស់ របស់ឆ្មាំបដិវត្តឥស្លាមអ៊ីរ៉ង់ នៅក្នុងប្រទេសអ៊ីរ៉ាក់ និងស៊ីរីផងដែរ។

សូមបញ្ជាក់ថា ការវាយប្រហារកាលពីចុងសប្តាហ៍ បានកំណត់គោលដៅលើមូលដ្ឋានយោធាអាមេរិក ដែលគេស្គាល់ថា Tower 22 នៅភាគឦសានប្រទេសហ្ស៊កដានី។ វាជាទីបញ្ជាការកណ្តាលអាមេរិក ដែលរៀបចំប្រតិបត្តិការកម្ចាត់ក្រុមរដ្ឋឥស្លាម ហើយមានទ័ពអាមេរិកប្រមាណ៣៥០នាក់ ឈរជើងនៅទីនោះ។

ការវាយប្រហារនោះ បានផ្តាច់ជីវិតពលទាហានអាមេរិក៣នាក់ឈ្មោះ Jerome Rivers អាយុ៤៦ឆ្នាំ, Kennedy Ladon Sanders អាយុ២៤ឆ្នាំ និង Breonna Alexsondria Moffett អាយុ២៣ឆ្នាំ។ ក្រៅពីទាហានស្លាប់​ មានមនុស្សជាង៤០នាក់ផ្សេងទៀតរងរបួស ក្នុងនោះមាន៣៤នាក់ ដែលក្រុមមន្ត្រីវាយតម្លៃថា អាចមានរបួសខួរក្បាលធ្ងន់ធ្ងរ៕

អត្ថបទ​៖ សុខ សុវណ្ណ

ចុចអាន៖ លោក ចូ បៃដិន ប្រកាសសងសឹក ការវាយប្រហារ នៅហ្ស៊កដានី