Connect with us

ព័ត៌មានអន្ដរជាតិ

លោក ចូ បៃដិន ប្រកាសសងសឹក ការវាយប្រហារ នៅហ្ស៊កដានី

បានផុស

នៅ

តាមការចុះផ្សាយរបស់ CNN នៅថ្ងៃពុធទី៣១ខែមករា, ពេលនេះប្រធានាធិបតីអាមេរិក លោក ចូ បៃដិន បានប្រកាសពីការសម្រេចចិត្តសងសឹក ចំពោះការវាយប្រហារនៅហ្ស៊កដានីកាលពីចុងសប្តាហ៍ដែលផ្តាច់ជីវិតពលទាហានអាមេរិកចំនួន ៣នាក់។

លោក ចូ បៃដិន ថ្លែងទៅកាន់អ្នកសារព័ត៌មាននៅសេតវិមាន (រូបថត៖ Cailotmedias)
សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពេលជួបជាមួយអ្នកសារព័ត៌មាននៅសេតវិមាន លោក បៃដិន មិនបានបញ្ជាក់លម្អិតថាតើការសងសឹកនោះជាអ្វីទេ ប៉ុន្តែអះអាងថា លោកមិនចង់មានសង្គ្រាមធំ នៅតំបន់មជ្ឈិមបូព៌ាឡើយ។ លើសពីនេះ លោកប្រាប់ទៅអ្នកកាសែតថា យើងនឹងឲ្យអ៊ីរ៉ង់ ទទួលខុសត្រូវចំពោះការដែលពួកគេបានផ្គត់ផ្គង់អាវុធដល់អ្នកប្រព្រឹត្ត។

ស្របពេលជាមួយគ្នានោះ អ្នកនាំពាក្យសេតវិមានលោក John Kirby ក៏និយាយដែរថា សហរដ្ឋអាមេរិក នឹងចាត់វិធានការតាមដំណាក់កាល នៅក្នុងការឆ្លើយតបរបស់ខ្លួន។

អ្នកនាំពាក្យក្រុមប្រឹក្សាសន្តិសុខជាតិលោក John Kirby (រូបថត៖ WATAN)

តាមការបញ្ជាក់របស់លោក Kirby, សហរដ្ឋអាមេរិក នឹងមិនធ្វើសកម្មភាពតែមួយលើកទេ ពោ​លគឺធ្វើតាមដំណាក់កាល ក្នុងពេលវេលាយូរអង្វែង។ លោកប្រធានាធិបតី មានជម្រើសច្រើន រួមទាំងការវាយប្រហារសងសឹកលើមូលដ្ឋាននិងមេបញ្ជាការរបស់សម្ព័ន្ធអ៊ីរ៉ង់ ទៀតផង។ អាមេរិក ក៏អាចកំណត់គោលដៅលើមេបញ្ជាការជាន់ខ្ពស់ របស់ឆ្មាំបដិវត្តឥស្លាមអ៊ីរ៉ង់ នៅក្នុងប្រទេសអ៊ីរ៉ាក់ និងស៊ីរីផងដែរ។

សូមបញ្ជាក់ថា ប៉ុន្មានខែមកនេះ មូលដ្ឋានយោធាអាមេរិកជាច្រើន នៅមជ្ឈិមបូព៌ា ត្រូវរងការវាយប្រហារឥតស្រាកស្រាន្តពីសំណាក់ កងជីវពលដែលទទួលការបណ្តុះបណ្តាល ផ្តល់ប្រាក់ និងបំពាក់បំប៉នដោយ អ៊ីរ៉ង់។

មូលដ្ឋាន Tower 22 (រូបថត៖ IRNA)

ការវាយប្រហារកាលពីចុងសប្តាហ៍ បានកំណត់គោលដៅលើមូលដ្ឋានយោធាអាមេរិក ដែលគេស្គាល់ថា Tower 22 នៅភាគឦសានប្រទេសហ្ស៊កដានី។ វាជាកន្លែងទីបញ្ជាការកណ្តាលអាមេរិក រៀបចំប្រតិបត្តិការកម្ចាត់ក្រុមរដ្ឋឥស្លាម ហើយមានទ័ពអាមេរិកប្រមាណ៣៥០នាក់ ឈរជើងនៅទីនោះ។

ពលទាហានអាមេរិក៣នាក់ ដែលបាត់បង់ជីវិតក្នុងការវាយប្រហារនោះ មានឈ្មោះ Jerome Rivers អាយុ៤៦ឆ្នាំ, Kennedy Ladon Sanders អាយុ២៤ឆ្នាំ និង Breonna Alexsondria Moffett អាយុ២៣ឆ្នាំ។ ក្រៅពីទាហានស្លាប់​ មានមនុស្សជាង៤០នាក់ផ្សេងទៀតរងរបួស ក្នុងនោះមាន៣៤នាក់ ដែលក្រុមមន្ត្រីវាយតម្លៃថា អាចមានរបួសខួរក្បាលធ្ងន់ធ្ងរ៕

(រាប់ពីឆ្វេងមកស្តាំ) William J. Rivers, Kennedy L. Sanders និង Breonna A. MoffettImage (រូបថត៖ ក្រសួងការពារជាតិអាមេរិក)

អត្ថបទ៖ សុខ សុវណ្ណ

ចុចអាន៖ អាមេរិក បញ្ចេញអត្តសញ្ញាណពលទាហានទាំង៣នាក់ ដែលត្រូវសម្លាប់នៅ ហ្ស៊កដានី

Helistar Cambodia - Helicopter Charter Services
Sokimex Investment Group

ចុច Like Facebook កម្ពុជាថ្មី

ព័ត៌មានអន្ដរជាតិ៣១ នាទី មុន

អ្នកវិទ្យាសាស្រ្តរកឃើញថ្នាំ ជួយអ្នកខ្ជិលហាត់ប្រាណ ឲ្យឡើងសាច់ដុំដូចគេដូចឯង

ព័ត៌មានជាតិ៣៨ នាទី មុន

រដ្ឋបាលខេត្តបាត់ដំបងត្រៀមរៀបចំព្រឹត្តិការណ៍សង្ក្រាន្តរយៈពេល ៥ ថ្ងៃ

ព័ត៌មានអន្ដរជាតិ៦ ម៉ោង មុន

អតីតសេដ្ឋិនីវៀតណាម Truong My Lan ត្រូវបានរដ្ឋអាជ្ញាស្នើកាត់ទោសប្រហារជីវិត

ព័ត៌មានអន្ដរជាតិ១០ ម៉ោង មុន

ស្ត្រីវៀតណាមដែលបានលក់ផ្លែពុទ្រាក្នុងតម្លៃថ្លៃទៅឱ្យភ្ញៀវទេសចរម្នាក់ ត្រូវរងការព្រមានពីអាជ្ញាធរ

ព័ត៌មានជាតិ១០ ម៉ោង មុន

ក្រសួង​ការងារ និង​បណ្តុះបណ្តាល​វិជ្ជាជីវៈ បើក​វគ្គ​បណ្តុះបណ្តាល​លើ​ជំនាញ​ផ្នែក​កំបោរ​ក្នុង​វិស័យ​សំណង់

Sokha Hotels

ព័ត៌មានពេញនិយម