ព័ត៌មានអន្ដរជាតិ

លោក Zelensky នឹងត្រាច់ចរទៅប្រទេសអឺរ៉ុបខាងលិចចំនួន ២ ដើម្បីកៀរគររកអាវុធឲ្យទ័ព

បានផុស

១ year មុន

នៅ

ថ្ងៃពុធ ១៤ កុម្ភៈ ២០២៤

ដោយ

ប្រធានាធិបតីអ៊ុយក្រែនលោក Volodymyr Zelensky គ្រោងនឹងធ្វើដំណើរទស្សនកិច្ចទៅកាន់ប្រទេសអឺរ៉ុបខាងលិចចំនួន ២ ដូចជា អាល្លឺម៉ង់ និងបារាំងក្នុងសប្ដាហ៍នេះ ដើម្បីកៀរគររកជំនួយផ្នែកយោធាបន្ថែមទៀតមកឲ្យរដ្ឋាភិបាលទីក្រុងកៀវ ។ នេះបើយោងតាមការចេញផ្សាយដោយសារព័ត៌មាន Bloomberg កាលពីថ្ងៃទី១៣ ខែកុម្ភៈកន្លងទៅ ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការត្រាច់ចររបស់លោក Zelensky កើតមានឡើង បន្ទាប់ពីកម្លាំងទ័ពអ៊ុយក្រែនកំពុងក្រពុលមុខនឹងបញ្ហាខ្វះខាតសព្វាវុធ និងគ្រាប់រំសេវ ក៏ដូចជាប្រឈមតម្រូវការពង្រឹងប្រព័ន្ធខែលការពារដែនអាកាសផងដែរ ស្របពេលដែលភ្លើងសង្គ្រាមជាមួយរុស្ស៊ីនៅតែបន្តឆេះរោលរាល ។

ទន្ទឹមនោះ ការហោះហើរទៅកាន់អឺរ៉ុបខាងលិចរបស់ប្រធានាធិបតីអ៊ុយក្រែននាពេលនេះក៏ដើម្បីអញ្ជើញចូលរួមសន្និសីទសន្តិសុខប្រចាំឆ្នាំដែលនឹងរៀបចំឡើងនៅថ្ងៃសុក្រក្នុងទីក្រុង Munich ប្រទេសអាល្លឺម៉ង់ ហើយលោក Zelensky ប្រហែលជានឹងបន្តធ្វើដំណើរទីក្រុងបែរឡាំង និងប៉ារីសប្រទេសបារាំងផងដែរ ។

ចំណែកនៅក្នុងសន្និសីទសន្តិសុខប្រចាំឆ្នាំនោះដែរ លោក Zelensky រំពឹងថានឹងរិះរកការពិភាក្សាអំពីកិច្ចព្រមព្រៀងសន្តិសុខសម្រាប់ប្រទេសអ៊ុយក្រែន ស្របពេលដែលសភាសហរដ្ឋអាមេរិកនៅតែតឹងសរសៃ ក ដាក់គ្នា ក៏ដូចជាតឹងដៃក្នុងការដកជំនួយយោធាចេញពីហោប៉ៅឲ្យអ៊ុយក្រែនមិនរួច ។

ពាក់ព័ន្ធនឹងបញ្ហានេះដែរ សារព័ត៌មានអាមេរិក NBC News បានរាយការណ៍កាលពីខែតុលា ឆ្នាំ២០២៣ ថា រដ្ឋបាលរបស់លោកប្រធានាធិបតី Joe Biden បានស្នើសុំថវិកាពីសភាសហរដ្ឋអាមេរិកប្រមាណ ១០៦ ពាន់លានដុល្លារបន្ថែមទៀតសម្រាប់ឆ្នាំសារពើពន្ធ ២០២៤ ជាពិសេសដើម្បីផ្តល់ជំនួយដល់អ៊ីស្រាអែល និងអ៊ុយក្រែនដែលសុទ្ធសឹងតែជាប់ដៃធ្វើសង្គ្រាមដូចគ្នា ។

ចាប់តាំងពីផ្ទុះភ្លើងសង្គ្រាមជាមួយរុស្ស៊ីកាលពីខែកុម្ភៈ ឆ្នាំ២០២២ មក រដ្ឋាភិបាលទីក្រុងវ៉ាស៊ីនតោនបានជះលុយច្រើនជាង ១១០ ពាន់លានដុល្លារក្នុងប្រភេទជំនួយផ្សេងៗគ្នាដើម្បីផ្គត់ផ្គង់ដល់អ៊ុយក្រែន ខណៈការផ្ដល់ជំនួយយ៉ាងច្រើនកប់ពពកនេះកំពុងទាញឲ្យអាមេរិកខ្លួនឯងបែកបាក់ផ្ទៃក្នុង ក៏ដូចជាឈ្លោះទាស់ទែងគ្នាពីសំណាក់សមាជិកសភាផងដែរ ដោយសារតែប្រធានសភាថ្មីរបស់អាមេរិកគឺលោក Mike Johnson មកពីគណបក្សសាធារណរដ្ឋ គឺជាអ្នកប្រឆាំងអ៊ុយក្រែន ៕