ភាគពាយព្យប្រទេសថៃ ជួបគ្រោះរញ្ជួយដី

នៅព្រឹកថ្ងៃពុធទី២៨ខែកុម្ភៈ ខេត្ត Mae Hong Son ភាគពាយព្យប្រទេសថៃ បានជួបគ្រោះរញ្ជួយដីកម្រិតស្រាល ៣.៤រ៉ិចទ័រ ហើយក្រោយមក មានការរង្គើតូចៗចំនួន៤លើកជាបន្តបន្ទាប់ទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយនោះមានជម្រៅ ៣គីឡូម៉ែត្រ ហើយការរង្គើតូចៗចំនួន៤លើកនោះមានកម្រិត ២.៧, ២.០, ២.៩ និង២.៣រ៉ិចទ័រ ខណៈស្រុក Pai ជាកន្លែងរង្គើខ្លាំងជាងគេ។

ទោះបីជាយ៉ាងណាក៏ដោយ មិនមានសេចក្តីរាយការណ៍អំពីការខូចខាត ឬមនុស្សរងរបួសអ្វីទេ ប៉ុន្តែអាជ្ញាធរមូលដ្ឋាន កំពុងចុះទៅពិនិត្យតាមតំបន់ ដើម្បីវាយតម្លៃ។

តាមការបញ្ជាក់ពីការិយាល័យសង្កេតគ្រោះរញ្ជួយដី នៃនាយកដ្ឋានឧតុនិយមថៃ, ការរញ្ជួយដីនេះគឺបណ្តាលមកពីចលនានៃខ្សែបន្ទាត់ Wiang Haeng ដែលលាតសន្ធឹងក្នុងទិសដៅពីជើងទៅត្បូង។

សូមបញ្ជាក់ថា ប្រទេសថៃ ក៏ឧស្សាហ៍កើតគ្រោះរញ្ជួយដីដែរ នារយៈពេលប៉ុន្មានឆ្នាំមកនេះ ប៉ុន្តែភាគច្រើនមានកម្រិតស្រាល ហើយបង្កការខូចខាតតិចតួចប៉ុណ្ណោះ ។

ការរញ្ជួយដីខ្លាំងបំផុតដែលបានវាយប្រហារប្រទេសថៃ គឺកើតឡើងកាលពីខែឧសភា ឆ្នាំ ២០១៤ ជាមួយកម្រិត ៦.៣ រ៉ិចទ័ វាយប្រហារក្នុងស្រុក Mae Lao ខេត្តឈៀងម៉ៃ ដោយបានសម្លាប់មនុស្សម្នាក់ និងរបួសជាង ១០០ នាក់៕

អត្ថបទ៖ សុខ សុវណ្ណ

ចុចអាន៖ ឈៀងម៉ៃ ជួបគ្រោះរញ្ជួយដី ខណៈខេត្តភាគច្រើន ថៃ កំពុងមានទឹកជំនន់