ការស្ទង់មតិថ្មីបង្ហាញថា ជនជាតិ អាមេរិក ប្រហែល ៤០ ភាគរយចាត់ទុក ចិន ជាសត្រូវធំបំផុត

ប្រជាជនអាមេរិកនៅតែបន្តយល់ឃើញថាប្រទេសចិនជាសត្រូវដ៏ធំបំផុតរបស់សហរដ្ឋអាមេរិក បន្ទាប់មកគឺរុស្ស៊ី ខណៈកាណាដា និងជប៉ុន ជាប្រទេសមិត្តភិក្តបរទេសដែលគួររាប់អានបំផុតរបស់អាមេរិក ។ នេះបើយោងតាមការស្ទង់មតិរបស់ Gallup និងចេញផ្សាយដោយសារព័ត៌មាន South China Morning Post ។

យោងទីតាមការស្ទង់មតិតាមទូរស័ព្ទដែលបានធ្វើឡើងនៅចន្លោះខែកុម្ភៈជាមួយនឹងសំណួរសួរថាតើប្រទេសណាជាសត្រូវដ៏ធំបំផុតរបស់អាមេរិកនាពេលបច្ចុប្បន្ននេះ? អ្នកឆ្លើយសំណួរចំនួន ៤១ ភាគរយបាននិយាយថា ប្រទេសចិនជាសត្រូកំពូលរបស់អាមេរិក ហើយនេះក៏វា​ជា​ឆ្នាំ​ទី ៤ ​ជាប់​គ្នា​ផងដែរចំពោះ​ប្រទេស​ចិន​ដែល​ឈរ​លើ​គេ​ក្នុង​បញ្ជី​សត្រូវធំបំផុតរបស់អាមេរិក បើ​ទោះ​ជា​ចំនួន​នេះ​បាន​ធ្លាក់​ចុះ​ពី ៥០ ភាគរយ​ក្នុង​ឆ្នាំ ២០២៣ ក៏ដោយ ។

ចំណែកសត្រូវបន្ទាប់គឺរុស្ស៊ីមាន ២៦ ភាគរយ តាមពីក្រោយដោយអ៊ីរ៉ង់ ៩ ភាគរយ ខណៈពេលដែលតួលេខសម្រាប់រុស្ស៊ីក៏បានធ្លាក់ចុះពី ៣២ ភាគរយផងដែរក្នុងឆ្នាំ ២០២៣ ប៉ុន្តែអ៊ីរ៉ង់បែរជាកើនឡើងពី ២ ភាគរយកាលពីឆ្នាំមុន ។

ការស្ទង់មតិបានរកឃើញទៀតថា ៦៧ ភាគរយនៃគណបក្សសាធារណរដ្ឋ និង ៤០ ភាគរយនៃគណបក្សឯករាជ្យ ទទួលស្គាល់ប្រទេសចិនជាសត្រូវដ៏ធំបំផុតរបស់សហរដ្ឋអាមេរិក ប៉ុន្តែមានតែ ១៨ ភាគរយប៉ុណ្ណោះនៃគណបក្សប្រជាធិបតេយ្យ ដែលយល់ឃើញបែបនេះ ខណៈ ៤៨ ភាគរយនៃពួកគេដាក់ឈ្មោះរុស្ស៊ីថាជាសត្រូវធំចម្បងជំនួសវិញ ។

ចំពោះ​ប្រទេស​ដែល​មាន​ឈ្មោះ​ថា ​មានទំនាក់ទំនងល្អជាមួយអាមេរិកមាន កាណាដា និង​ជប៉ុនមាន ៨២ ភាគរយ តាម​ពី​ក្រោយ​ដោយ​អង់គ្លេស ៧៩ ភាគរយ អាល្លឺម៉ង់ ៧៨ ភាគរយ បារាំង និង​តៃវ៉ាន់ ៧៧ ភាគរយ ៕

អត្ថបទ ៖ ប៊ុន សុភាព