ឥណ្ឌា ជួបវិបត្តិខ្វះទឹកប្រើប្រាស់នៅរដូវក្ដៅនេះ

អាងស្តុកទឹកសំខាន់ៗរបស់ប្រទេសឥណ្ឌាបានធ្លាក់ចុះដល់កម្រិតទាបបំផុតក្នុងរយៈពេល ៥ ឆ្នាំនេះដែលបណ្ដាលឲ្យមានការខ្វះខាតទឹកប្រើប្រាស់ និងលទ្ធភាពផលិតថាមពលនៅរដូវក្តៅ ។ នេះបើយោងតាមការចេញផ្សាយរបស់សារព័ត៌មាន CNA កាលពីថ្ងៃទី​១៩ ខែមីនា ។

ទិន្នន័យរបស់រដ្ឋាភិបាលបានបង្ហាញថា អាងស្តុកទឹកចំនួន ១៥០ ដែលផ្គត់ផ្គង់ទឹកសម្រាប់ផឹក និងប្រព័ន្ធធារាសាស្រ្ត ក៏ដូចជាប្រភពថាមពលវារីអគ្គិសនីដ៏សំខាន់របស់ឥណ្ឌា មានសមត្ថភាពផ្គត់ផ្គង់ត្រឹមតែ ៤០ ភាគរយប៉ុណ្ណោះកាលពីសប្តាហ៍មុន ខណៈការផ្គត់ផ្គង់ទឹកត្រូវបានកាត់បន្ថយនៅរដ្ឋជាច្រើននៅក្នុងប្រទេស ។

ចាប់តាំងពីឆ្នាំ ២០១៩ មក សមត្ថភាពអាងស្តុកទឹករបស់ប្រទេសឥណ្ឌាបានធ្លាក់ចុះដល់ទៅ ៣៥ ភាគរយ ហើយឃើញមានទីក្រុងភាគខាងត្បូងដូចជា Chennai មិនមានទឹកប្រើប្រាស់នោះទេ ។ ស្ថានការណ៍នេះអាចបង្កើនវិបត្តិនៅក្នុងតំបន់ភាគកណ្ដាល និងភាគខាងត្បូងឥណ្ឌា ដែលប្រឈមនឹងរលកកម្ដៅខ្លាំងក្នុងខែមេសា និងខែឧសភាខាងមុខ ។

មួយវិញទៀតកម្រិតទឹកភ្លៀងធ្លាក់ក៏មានតិចបំផុត ចាប់តាំងពីឆ្នាំ ២០១៨ បន្ទាប់ពីឥទ្ធិពលបាតុភូត El Nino បានធ្វើឲ្យខែសីហាឆ្នាំមុនរងគ្រោះរាំងស្ងួតបំផុតក្នុងរយៈពេលជាងមួយសតវត្សមិនធ្លាប់មាន ស្របពេលដែលខ្យល់មូសុងក៏មិនស្មើគ្នាដែរ ដោយតំបន់ខ្លះទទួលបានទឹកភ្លៀងច្រើនជាងតំបន់ផ្សេងទៀត ។

ចំណែកការផលិតវារីអគ្គីសនីរបស់ប្រទេសឥណ្ឌាក្នុងរយៈពេល ១០ ខែ ចាប់ពីដើមឆ្នាំមុនបានធ្លាក់ចុះ ១៧ ភាគរយ បើទោះបីជាតម្រូវការអគ្គិសនីខ្លាំងក៏ដោយ ។ ស្របពេលជាមួយគ្នានោះ ការផលិត​វារីអគ្គិសនី​នៅ​អាស៊ី​ក៏បាន​ធ្លាក់​ចុះ​ក្នុង​អត្រា​លឿន​បំផុត​ក្នុង​រយៈពេល​ជាច្រើន​ទសវត្សរ៍​ ចំពេល​មានតម្រូវការពីចិនក៏មាន​ការ​ធ្លាក់​ចុះ​ដូចគ្នា ៕

អត្ថបទ ៖ ប៊ុន សុភាព