អ្នកនេសាទ ឥណ្ឌូណេស៊ី សង្គ្រោះជនរ៉ូហ៊ីងយ៉ារាប់សិបនាក់ ក្រោយលិចទូក

អ្នកនេសាទឥណ្ឌូណេស៊ីបានជួយសង្គ្រោះជនជាតិរ៉ូហ៊ីងយ៉ារាប់សិបនាក់ បន្ទាប់ពីហេតុការណ៍លិចទូក ក្រោយមានជំនោរខ្លាំងនៅក្នុងទឹកនៃខេត្ត Aceh ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី២១ ខែមីនានេះ ។

ទីភ្នាក់ងារជនភៀសខ្លួនរបស់អង្គការសហប្រជាជាតិប៉ាន់ប្រមាណថា មានជនជាតិរ៉ូហ៊ីងយ៉ាប្រហែល ២,០០០ នាក់បានភៀសខ្លួនមកដល់ប្រទេសឥណ្ឌូណេស៊ីដែលភាគច្រើនពួកគេទៅខេត្ត Aceh ចាប់តាំងពីខែតុលាឆ្នាំមុន បន្ទាប់ពីត្រូវបានធ្វើទុក្ខបុកម្នេញក្នុងប្រទេសមីយ៉ាន់ម៉ា ។

យោងតាមលោក Miftach Tjut Adek ប្រធានសហគមន៍នេសាទក្នុងខេត្តបាននិយាយថា ជនជាតិរ៉ូហ៊ីងយ៉ាជាង ៥០ នាក់កំពុងឈរនៅលើសមុទ្រក្បែរទីក្រុង Meulaboh ភាគខាងលិច Aceh បន្ទាប់ពីទូកបានលិចក្នុងជំនោរទឹកខ្លាំង ដែលធ្វើឲ្យពួកគេក្លាយជាជនភៀសខ្លួនដែលបានមកដល់ចុងក្រោយបំផុតនៅក្នុងប្រទេសអាស៊ីអាគ្នេយ៍មួយនេះ ។

គួរបញ្ជាក់ថា ជាច្រើនឆ្នាំមកនេះ ជនជាតិរ៉ូហ៊ីងយ៉ាបានចាកចេញពីប្រទេសមីយ៉ាន់ម៉ា ជាកន្លែងដែលពួកគេត្រូវបានចាត់ទុកជាជនបរទេសមកពីអាស៊ីខាងត្បូង រើសអើងសញ្ជាតិ និងទទួលរងការរំលោភបំពាន ។

ការិយាល័យរបស់ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួន (UNHCR) បាននិយាយកាលពីខែមករាថា នៅឆ្នាំ ២០២៣ មានជនរ៉ូហ៊ីងយ៉ាយ៉ាងហោចណាស់ ៥៦៩ នាក់បានស្លាប់ និងបាត់ខ្លួន ខណៈពេលដែលព្យាយាមភៀសខ្លួនចេញពីប្រទេសមីយ៉ាន់ម៉ា ឬបង់ក្លាដែស ហើយនេះគឺជាចំនួនខ្ពស់បំផុត ចាប់តាំងពីឆ្នាំ ២០១៤ ៕

អត្ថបទ ៖ ប៊ុន សុភាព