អ៊ុយក្រែន បើកការវាយប្រហារចូលដីរុស្ស៊ី ចំទិវាជ័យជម្នះ

តាមការចុះផ្សាយរបស់ RT នៅថ្ងៃព្រហស្បតិ៍ទី៩ខែឧសភា, អ៊ុយក្រែន បានបើកការវាយប្រហារទីក្រុងមួយចំនួនរបស់រុស្ស៊ី ចំទិវាជ័យជម្នះ ខណៈមានសេចក្តីរាយការណ៍អំពីជនស៊ីវិលច្រើននាក់ ត្រូវរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទោះបីជាយ៉ាងណាក៏ដោយ ការវាយប្រហារខ្លះៗដោយដ្រូនអ៊ុយក្រែន ត្រូវបានរុស្ស៊ីរារាំង ប៉ុន្តែអាជ្ញាធរក្នុងតំបន់មួយចំនួន ជាពិសេសទីក្រុងព្រំដែន Belgorod ក៏បានរាយការណ៍អំពីការខូចខាតផ្ទះសម្បែងនិងសំណង់ហេដ្ឋារចនាសម្ព័ន្ធផងដែរ ហើយការវាយប្រហារនេះទៀតសោត គឺមិនបានធ្លាយទៅដល់ទីក្រុងមូស្គូ ដែលជាកន្លែងប្រារព្ធពិធីធំនោះទេ។

មន្ត្រីមូលដ្ឋាននិយាយថា ប្រព័ន្ធការពារដែនអាកាសរបស់រុស្ស៊ី បានបាញ់ទម្លាក់គ្រាប់ផ្លោងចំនួន១៥គ្រាប់ និងដ្រូនមួយគ្រឿងនៅទីក្រុង Belgorod ខណៈយន្តហោះគ្មានមនុស្សបើក២គ្រឿងទៀតត្រូវបានបំផ្លាញនៅ Bryansk និង៣គ្រឿងនៅ Kursk។

ស្របពេលជាមួយគ្នានោះដែរ បើតាមការបញ្ជាក់នៅលើបណ្តាញ Telegram ពីអភិបាលក្រុង Belgorod លោក Vyacheslav Gladkov, ការវាយប្រហារបានបណ្តាលឲ្យមនុស្សចំនួន៨នាក់ រងរបួស ហើយក្នុងនោះ មាន៤នាក់ ត្រូវបានបញ្ជូនទៅមន្ទីរពេទ្យភ្លាមៗ។

សូមបញ្ជាក់ថា​ ថ្ងៃ៩ឧសភារៀងរាល់ឆ្នាំ ប្រទេសរុស្ស៊ី បានប្រារព្ធទិវាជ័យជម្នះលើសត្រូវឈ្លានពានណាស៊ីអាល្លឺម៉ង់ ខណៈឆ្នាំ២០២៤នេះគឺជាខួបលើកទី៧៩ហើយ។

ឆ្នាំនេះ គេឃើញមានកងទ័ពរាប់ម៉ឺននាក់ព្រមទាំងគ្រឿងសឹកជាច្រើន បានចូលរួមក្បួនព្យុហយាត្រានៅទីលានក្រហម ក្នុងទីក្រុងមូស្គូ។

ក្បួនព្យុហយាត្រាយោធានិងពិធីផ្សេងៗ ដើម្បីឧទ្ទិសដល់គុណបំណាច់និងការលះបង់របស់ប្រជាជនសូវៀត បានប្រព្រឹត្តទៅនៅទីក្រុងជាង៣០០ ទូទាំងប្រទេសរុស្ស៊ី ប៉ុន្តែព្រឹត្តិការណ៍ធំគឺធ្វើឡើងក្នុងទីក្រុងមូស្គូ៕

អត្ថបទ៖ សុខ សុវណ្ណ

ចុចអាន៖ លោក គីម ជុងអ៊ុន ផ្ញើ​សារ​គាំទ្រ ពូទីន ក្នុង​ខួប​​​អបអរ​ជ័យជម្នះ​​លើ​អាល្លឺម៉ង់