Breaking News! ទីបំផុត វៀតណាម រកបានប្រធានាធីបតីថ្មីហើយ

ទីបំផុត វៀតណាមជ្រើសរើសបានប្រធានាធិបតីថ្មីរបស់ខ្លួនហើយ បន្ទាប់ពីតំណែងមួយនេះទំនេរមិនមានអ្នកអង្គុយអស់រយៈពេលជាង ២ ខែមក ក្រោយការលាលែងរបស់លោកប្រធានាធិបតី Vo Van Thuong កាលពីខែមីនាកន្លងទៅ ។

យោងតាមការចេញផ្សាយរបស់សារព័ត៌មាន VN Express បានឲ្យដឹងថា គណៈកម្មាធិការមជ្ឈិមបក្សកុម្មុយនីស្តវៀតណាមកាលពីថ្ងៃសៅរ៍បានសម្រេចជ្រើសរើសលោក To Lam ឲ្យឡើងកាន់ការជាប្រធានាធិបតីថ្មី ជំនួសលោក Vo Van Thuong ។

មុនសម្រេចជ្រើសរើសឲ្យឡើងកាន់តំណែងជាប្រធានាធិបតីជាផ្លូវការ, លោក To Lam ដែលមានវ័យ ៦៧ ឆ្នាំគឺជារដ្ឋមន្ត្រីសន្តិសុខសាធារណៈ ខណៈនៅឆ្នាំ ២០០៩ លោកត្រូវបានតែងតាំងជាប្រធាន​នាយកដ្ឋាន​សន្តិសុខទី ១ ដោយលោកនាយករដ្ឋមន្ត្រី Pham Minh Chinh ។

ក្រោយមកទៀត ពោលនៅខែសីហា ឆ្នាំ ២០១០ លោកបានក្លាយជាអនុរដ្ឋមន្ត្រីសន្តិសុខសាធារណៈ និងឡើងកាន់ការជារដ្ឋមន្ត្រីសន្តិសុខសាធារណៈនៅខែមេសា ឆ្នាំ ២០១៦ ខណៈលោក​ក៏​ជា​អនុប្រធានគណៈកម្មាធិការមជ្ឈិមដឹកនាំ​លើ​ការ​ប្រឆាំង​អំពើ​ពុករលួយផងដែរ ។

គួរបញ្ជាក់ថា លោក To Lam គឺជាប្រធានាធិបតីវៀតណាមទី ៣ ហើយដែលគណៈកម្មាធិការមជ្ឈិមបក្សកុម្មុយនីស្តជ្រើសរើសបានត្រឹមតែរយៈពេល ១ ឆ្នាំប៉ុណ្ណោះ បន្ទាប់ពីការលាលែងជាបន្តបន្ទាប់របស់លោក Vo Van Thuong កាលពីខែមីនា និងលោក Nguyen Xuan Phuc ដែលក៏បានលាលែងពីតំណែងដូចគ្នាកាលពីឆ្នាំមុន ៕

ដោយ ៖ សុខ ជីវ័ន្ត

ចុចអាន ៖ ប៉ូលិស វៀតណាម ឲ្យជនរងគ្រោះចាញ់បោកអតីតសេដ្ឋិនីដែលជាប់ទោស ប្រហារជីវិត ប្រញាប់ទៅដាក់ពាក្យបណ្ដឹង