ព័ត៌មានអន្ដរជាតិ

ចិន គាំទ្រពេញទំហឹងលើដំណោះស្រាយរដ្ឋ២ ចំពោះសង្គ្រាមអ៊ីស្រាអ៊ែល-ប៉ាឡេស្ទីន

បានផុស

២ years មុន

នៅ

ថ្ងៃព្រហស្បតិ៍ ៣០ ឧសភា ២០២៤

ដោយ

Chheang

លោក ស៊ី ជីនពីង ប្រធានាធិបតីចិន បានស្នើឲ្យមានដំណោះស្រាយរដ្ឋ២ ដើម្បីពន្លត់ភ្លើងសង្គ្រាមរវាងអ៊ីស្រាអ៊ែល និងប៉ាឡេស្ទីន។ ប្រសាសន៍របស់មេដឹកនាំចិនរូបនេះ ធ្វើឡើងនៅក្នុងពិធីបើកកិច្ចប្រជុំរដ្ឋមន្ត្រីនៃវេទិកាសហប្រតិបត្តិការរដ្ឋចិន-អារ៉ាប់ នៅថ្ងៃទី៣០ ខែឧសភា ឆ្នាំ២០២៤។

លោក ស៊ី ជីនពីង មេដឹកនាំចិន (រូបភាព៖ Getty Images)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ទន្ទឹមនោះដែរ លោក ស៊ី ជីនពីង ក៏បានអំពាវនាវឲ្យមានការបញ្ជូនជំនួយមនុស្សធម៌ចូលក្នុងតំបន់ហ្គាហ្សា និងការកសាងឡើងវិញនូវហេដ្ឋារចនាសម្ព័ន្ធក្រោយសង្គ្រាម។ លោកបានកត់សម្គាល់ថា បញ្ហាសង្គ្រាមរ៉ាំរ៉ៃរវាងអ៊ីស្រាអ៊ែល និងប៉ាឡេស្ទីន បានទាញឲ្យប្រជាជនស្លូតត្រង់ជាច្រើនធ្លាក់ចូលក្នុងស្ថានភាពទុក្ខសោកវេទនា។ ប្រការនេះហើយទើបលោកចង់ឲ្យមានដំណោះស្រាយយុត្តិធម៌ និងបទឈប់បាញ់គ្នា។

មេដឹកនាំវ័យ៧០ឆ្នាំរូបនេះ បាននិយាយទៀតថា “សង្គ្រាមមិនគួរបន្តដោយគ្មានដែនកំណត់ទេ។ យុត្តិធម៌មិនគួរអវត្តមានជារៀងរហូតនោះដែរ។ ការប្ដេជ្ញាចិត្តឲ្យមានដំណោះស្រាយរដ្ឋ២ មិនគួរត្រូវបានរំសាយឡើយ”។

ចិន បានបង្ហាញការគាំទ្រខ្លាំងចំពោះការបង្កើតឲ្យមានរដ្ឋឯករាជ្យប៉ាឡេស្ទីន ដោយទទួលបានអធិបតេយ្យភាពពេញលេញ ផ្អែកតាមផែនទីព្រំដែនឆ្នាំ១៩៦៧ ដែលមានក្រុងយេរ៉ូសាឡឹមខាងកើតជារដ្ឋធានី។ បន្ថែមពីនេះ មហាយក្សចិន ក៏បានគាំទ្រឲ្យប៉ាឡេស្ទីនចូលជាសមាជិកពេញលេញនៅអង្គការសហប្រជាជាតិ និងគាំទ្រដល់សន្និសីទសន្ដិភាពអន្តរជាតិ ដែលមានមូលដ្ឋានទូលំទូលាយ មានសិទ្ធិអំណាច និងមានប្រសិទ្ធភាព ដើម្បីកាត់បន្ថយស្ថានភាពកម្ដៅក្នុងជម្លោះរវាងភាគីទាំងសងខាង។

មេដឹកនាំចិន បានប្រកាសផ្ដល់ថវិកាចំនួនប្រហែល ៧០លានដុល្លារ សម្រាប់ជំនួយមនុស្សធម៌នៅហ្គាហ្សា បន្ថែមពីលើកញ្ចប់ជំនួយលើកមុនដែលមានចំនួន ១៣,៨លានដុល្លារ។ លោកក៏បានសន្យាផ្ដល់នូវការបរិច្ចាគចំនួន ៣លានដុល្លារ សម្រាប់ភ្នាក់ងារជំនួយ និងការងាររបស់អង្គការសហប្រជាជាតិសម្រាប់ជនភៀសខ្លួនប៉ាឡេស្ទីន នៅតំបន់ Near East ដើម្បីគាំទ្រជំនួយមនុស្សធម៌សង្គ្រោះបន្ទាន់នៅហ្គាហ្សា៕

ដោយ៖ ឈាង

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា