ប្រធានាធិបតីអ៊ុយក្រែន ត្រៀមធ្វើការជាមួយលោក ត្រាំ រួចហើយ តែថា នឹងពិបាកខ្លាំង

ក្នុងបទសម្ភាសផ្តាច់មុខជាមួយ BBC នៅទីក្រុងឡុងដ៍ ដែលចេញផ្សាយកាលពីថ្ងៃព្រហស្បតិ៍ទី១៨ខែកក្កដាឆ្នាំ២០២៤ ប្រធានាធិបតីអ៊ុយក្រែនលោក Volodymyr Zelensky បាននិយាយថា ទោះនរណាជាប់ឆ្នោតជាប្រធានាធិបតីអាមេរិកក៏ដោយ ក៏អ៊ុយក្រែនធ្វើការជាមួយដែរ គ្រាន់តែថា បើលោក ដូណាល់ ត្រាំ ជាប់ឆ្នោត អ៊ុយក្រែន នឹងពិបាកធ្វើការជាមួយខ្លាំង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ត្រាំ ត្រូវបានគេដឹងថា មិនមែនជាអ្នកគាំទ្ររដ្ឋាភិបាលទីក្រុងកៀវទេ ហើយកាលពីប៉ុន្មានថ្ងៃមុន លោកថែមទាំងតែងតាំងដៃគូឈរឈ្មោះតំណែងអនុប្រធានាធិបតី JD Vance ​ទៀតផង ខណៈព្រឹទ្ធសមាជិករដ្ឋអូហៃយ៉ូ រូបនេះ ធ្លាប់បោះពាក្យសម្តីថា ទោះអ៊ុយក្រែន ទៅជាយ៉ាងណាក៏គាត់មិនខ្វល់ដែរ។

ម្យ៉ាងវិញទៀត លោក ត្រាំ កំពុងធ្វើឲ្យទីក្រុងកៀវដេកមិនលក់បក់មិនល្ហើយព្រោះថា បើបេក្ខជនតែងតាំងខាងគណបក្សសាធារណរដ្ឋរូបនេះ ឈ្នះឆ្នោតខែវិច្ឆិកាមែន សេតវិមានទំនងជាកាត់ផ្តាច់ជំនួយដល់អ៊ុយក្រែន ជាក់ជាមិនខានឡើយ។

យ៉ាងណាក្តី លោក Zelensky បានប្រាប់ទៅ BBC ថា “ប្រហែលជាគាត់ មិនយល់ពីអ្វីដែលកំពុងកើតឡើងនៅអ៊ុយក្រែន ដូច្នេះយើងត្រូវតែធ្វើការជាមួយសហរដ្ឋអាមេរិក”។

សូមបញ្ជាក់ថា មេដឹកនាំអ៊ុយក្រែន កំពុងស្ថិតនៅក្នុងចក្រភពអង់គ្លេស ដើម្បីចូលរួមកិច្ចប្រជុំ សហគមន៍នយោបាយអឺរ៉ុប (EPC) ដោយនៅទីនោះ គាត់ក៏បានថ្លែងសុន្ទរកថាផងដែរ កាលពីរសៀលថ្ងៃព្រហស្បតិ៍។

EPC គឺជាវេទិកាក្រៅផ្លូវការមួយសម្រាប់កិច្ចសហប្រតិបត្តិការ ដែលរួមមានប្រទេសជាសមាជិក EU ចំនួន២៧ និងប្រទេសមិនមែនជាសមាជិក EU ចំនួន២០៕

អត្ថបទ៖ សុខ សុវណ្ណ

ចុចអាន៖ លោក បៃដិន ខ្មាសគេលើឆាក ដោយច្រឡំហៅលោក ហ្សេលេនស្គី ថា “ពូទីន”