ទឹកជំនន់​នៅ​នីហ្សេរីយ៉ា​ប៉ះពាល់​មនុស្ស​ជាង​២០​ម៉ឺន​នាក់​និង​យ៉ាងតិច​១៧០​បាត់បង់​ជីវិត​

CNN នៅ​ថ្ងៃទី២៩ខែសីហា បាន​រាយការណ៍​​ថា មនុស្សយ៉ាងហោចណាស់១៧០នាក់បានស្លាប់ និងជាង២០ម៉ឺន​នាក់ផ្សេងទៀតត្រូវបានជម្លៀសចេញបន្ទាប់ពីមានទឹកជំនន់ជាច្រើនសប្តាហ៍ ខណៈប្រទេស​នីហ្សេរីយ៉ា​ដែល​មានប្រជាជនច្រើនបំផុតនៅទ្វីបអាហ្រ្វិកប្រឈម​គ្រោះ​ធម្មជាតិ​ដ៏​អាក្រក់​។

​យោង​ការ​ផ្សាយ​នោះ អាជ្ញាធរគ្រប់គ្រងគ្រាអាសន្នជាតិ (NEMA) បានឱ្យដឹងថា ភាគខាងជើងប្រទេសនីហ្សេរីយ៉ាបានរងការវាយប្រហារដោយទឹកជំនន់យ៉ាងខ្លាំងបំផុត ខណៈផ្នែកផ្សេងទៀតនៃប្រទេសនេះក៏នៅតែស្ថិតក្នុងហានិភ័យនៅឡើយ ចំពេលមានភ្លៀងធ្លាក់ខ្លាំង និងការកើនឡើងកម្រិតទឹកទន្លេធំជាងគេចំនួនពីរគឺទន្លេ Niger និងទន្លេ Benue។

កាលពីសប្តាហ៍មុន ទីភ្នាក់ងារសេវាជលសាស្ត្រនីហ្សេរីយ៉ា (NIHSA) បានព្រមានថា ទឹកជន់លិចពីប្រទេស​ម៉ាលី នឹងហូរ​ចូលទៅក្នុងប្រទេសនីហ្សេរីយ៉ា ខណៈពេលដែលអាជ្ញាធរជំរុញឱ្យពល​រដ្ឋដែលមានទីតាំងនៅតាមដងទន្លេNiger ឱ្យមានការប្រុងប្រយ័ត្ន​ខ្ពស់​។ ចំណែកទីភ្នាក់ងារឧតុនិយមរបស់ប្រទេស NIMET ក៏បានព្រមានអំពីហានិភ័យនៃទឹកជំនន់ភ្លាមៗនៅទូទាំងប្រទេសផងដែរ។

ទោះបីជាផ្នែកខ្លះនៃប្រទេសនីហ្សេរីយ៉ា ងាយនឹងជន់លិចក្នុងរដូវវស្សាក៏ដោយ ប៉ុន្តែទឹកជំនន់នៅឆ្នាំនេះត្រូវបានរាយការណ៍ថា បានកើតឡើងនៅក្នុងតំបន់ដែលវាកម្រមានពីមុនមក។ ដោយសារតែការប្រែប្រួលអាកាសធាតុតំបន់មួយចំនួនដែលពីមុនមិនងាយរងគ្រោះទឹកជំនន់តែពេលនេះកំពុងជួបប្រទះនឹងទឹកជំនន់។

ទឹកជំនន់នាពេលថ្មីៗនេះបានធ្វើឱ្យមនុស្សជិត ២០០០នាក់បានរងរបួស និងបានបំផ្លាញដីស្រែជាង ១០ម៉ឹន​ហិកតា។ នេះបើយោងតាមទិន្នន័យចុងក្រោយពីទីភ្នាក់ងារគ្រប់គ្រងគ្រោះមហន្តរាយ។

កាលពីឆ្នាំ ២០២២ មនុស្សជាង 600នាក់បានស្លាប់នៅក្នុងទឹកជំនន់នៅទូទាំងប្រទេសដែលជាចំនួនអ្នកស្លាប់ដ៏ច្រើននិងជាកំណត់ត្រាដ៏អាក្រក់បំផុតនៅក្នុងប្រទេសអាហ្វ្រិកខាងលិចក្នុងរយៈពេលជាងមួយទសវត្សរ៍។

យ៉ាងណាមិញមិនត្រឹមតែប្រទេសនីហ្សេរីយ៉ាប៉ុណ្ណោះទេ ប្រទេសដូចជាយេម៉ែន ប្រទេសស៊ូដង់ ឥណ្ឌា បង់ក្លាដែល និង ប៉ាកគីស្ងានក៏កំពុងជួបប្រទះនូវគ្រោះទឹកជំនន់យ៉ាងធ្ងន់ធ្ងរផងដែរ ខណៈដែលការប្រែប្រួលអាកាសធាតុជុំវិញពិភពលោកកាន់តែអាក្រក់ទៅៗ៕

អត្ថបទ៖ ប៊ុន សុភាព