ត្រាំ៖ កងទ័ពអាមេរិក ចាប់ដៃគ្នាជាមួយនីហ្សេរីយ៉ា សម្លាប់​មេក្លោងធំលំដាប់ទី២ របស់ ISIS

នៅក្នុងការបង្ហោះសារដ៏គួរឱ្យចាប់អារម្មណ៍មួយនៅលើបណ្តាញសង្គម Truth Social លោកប្រធានាធិបតីអាមេរិក ដូណាល់ ត្រាំ បានប្រកាសជាផ្លូវការថា មេដឹកនាំរងលំដាប់ទីពីររបស់ក្រុមភេរវកររដ្ឋឥស្លាម ISIS គឺលោក Abu-Bilal al-Minuki ត្រូវបានសម្លាប់​ហើយ នៅក្នុងប្រតិបត្តិការរួមគ្នាយ៉ាងស្វិតស្វាញមួយ រវាងកងទ័ពសហរដ្ឋអាមេរិក និងកងកម្លាំងប្រដាប់អាវុធនៃប្រទេសនីហ្សេរីយ៉ា។ នេះ​បើយោងតាម​ការ​ផ្សាយរបស់ Jerusalem Post នា​ថ្ងៃសៅរ៍ ទី​១៦ ខែ​ឧសភា ឆ្នាំ​២០២៦។

លោក ត្រាំ បានសរសេររៀបរាប់ដោយមោទកភាពថា នៅក្រោមការបញ្ជាផ្ទាល់របស់លោក កងទ័ពអាមេរិកដ៏ក្លាហាន និងកងកម្លាំងប្រដាប់អាវុធនៃប្រទេសនីហ្សេរីយ៉ា បានសហការគ្នាបំពេញបេសកកម្មដ៏ស្មុគស្មាញ និងមានការរៀបចំផែនការយ៉ាងល្អិតល្អន់បំផុតមួយ ដើម្បីកម្ទេចមេភេរវករ ដែលសកម្មជាងគេបំផុត នៅលើពិភពលោកចេញពីសមរភូមិ។ លោកបានបន្ថែមទាំងសម្តីឌឺដងទៀតថា Abu-Bilal al-Minuki ដែលជាមេបញ្ជាការរងរបស់ក្រុម ISIS ទូទាំងពិភពលោក ធ្លាប់តែគិតថា ខ្លួនឯងអាចរត់ទៅលាក់ខ្លួន នៅក្នុងទ្វីបអាហ្វ្រិកបានដោយសុវត្ថិភាព ប៉ុន្តែគេមិនបានដឹងខ្លួនទាល់តែសោះថា អាមេរិកមានប្រភពព័ត៌មានសម្ងាត់ ដែលតែងតែរាយការណ៍ពីសកម្មភាពគ្រប់ជំហានរបស់គេជានិច្ច។

ទន្ទឹមនឹងការប្រកាសពីជោគជ័យដ៏ធំធេងនេះ លោកប្រធានាធិបតី ដូណាល់ ត្រាំ ក៏បានផ្ញើសារថ្លែងអំណរគុណយ៉ាងជ្រាលជ្រៅទៅកាន់រដ្ឋាភិបាលនីហ្សេរីយ៉ា ផងដែរ ចំពោះកិច្ចសហប្រតិបត្តិការ និងការចូលរួមជាដៃគូយ៉ាងជិតដិត នៅក្នុងប្រតិបត្តិការវាយឆ្មក់កម្ទេចសម្បុកភេរវករដ៏គ្រោះថ្នាក់មួយនេះ។

គួរបញ្ជាក់ផងដែរថា កន្លងមក ប្រទេសនីហ្សេរីយ៉ា ធ្លាប់បានស្ថិតក្រោមការរិះគន់ និងការតាមដានយ៉ាងតឹងរ៉ឹងពីសំណាក់លោក ត្រាំ បន្ទាប់ពីលោកបានចោទប្រកាន់ថា មានការធ្វើបាប និងធ្វើទុក្ខបុកម្នេញលើប្រជាជន ដែលកាន់សាសនាគ្រិស្តនៅក្នុងប្រទេសអាហ្វ្រិកមួយនេះ ទោះបីជារដ្ឋាភិបាលនីហ្សេរីយ៉ា បានចេញមុខបដិសេធដាច់អហង្ការក៏ដោយ។ ជាក់ស្តែង បន្ទាប់ពីមានការចោទប្រកាន់របស់លោក ត្រាំ កាលពីឆ្នាំមុន កងទ័ពសហរដ្ឋអាមេរិក ថែមទាំងបានបើកការវាយប្រហារតាមផ្លូវអាកាស ទៅលើអ្វីដែលខ្លួនអះអាងថា ជាមូលដ្ឋានទ័ពរបស់ក្រុមអ៊ីស្លាមជ្រុលនិយម នៅភាគពាយព្យនៃប្រទេសនីហ្សេរីយ៉ា ចំថ្ងៃបុណ្យណូអែល​ទៀតផង ប៉ុន្តែពេលនេះ ប្រទេសទាំងពីរ បានចាប់ដៃគ្នាបង្កើតស្នាដៃធំជា​អន្តរជាតិវិញម្តង៕

ប្រែសម្រួល៖ ឈាង