ប្រធានក្រុមប្រឹក្សាក្រុងញូវ​ដេលី​ដែល​ប្រឆំាង​ពុករលួយ​ ប្រកាសលាលែងក្រោយ​ជាប់ឃុំ៦ខែ​​

មេដឹកនាំប្រឆាំងឥណ្ឌាលោក Arvind Kejriwal នឹងលាលែងពីតំណែង​ជាប្រធានក្រុមប្រឹក្សានៃរដ្ឋធានីញូវដែលី មួយថ្ងៃបន្ទាប់ពីការដោះលែងលោកចេញពីពន្ធនាគារឲ្យនៅក្រៅឃុំក្នុងសំណុំរឿងពុករលួយ។ នេះបើយោងតាមការចេញផ្សាយរបស់សារព័ត៌មាន Al Jazeera នៅថ្ងៃទី១៦ខែកញ្ញានេះ។

ជាអ្នករិះគន់និងជាអ្នកប្រឆាំងយ៉ាងខ្លាំងក្លាលើនាយករដ្ឋមន្ត្រី Narendra Modi លោក Kejriwal អាយុ៥៥ឆ្នាំគឺជាអតីតមេដឹកនាំប្រឆាំងអំពើពុករលួយនៃ​​គណបក្ស Aam Aadmi (AAP) ដែលមានអាយុមួយទសវត្សរ៍បានសាង​ភាព​លេចធ្លោ​យ៉ាងឆាប់រហ័សក្នុងនយោបាយបច្ចុប្បន្ន ទោះបីជាកម្លាំងរបស់បក្សនេះមានចំនួនតិចតួចបើធៀបនឹងគណបក្សប្រឆាំងចាស់ៗក៏ដោយ។ ហើយលោក ​Kejriwal បាន​ធ្វើ​ជាប្រធានក្រុមប្រឹក្សារបស់​ក្រុង​ដេលី​តាំង​ពី​ឆ្នាំ​២០១៥។

កាលពីថ្ងៃសុក្រ លោកត្រូវបានតុលាការកំពូលរបស់ប្រទេសឥណ្ឌា អនុញ្ញាតឲ្យនៅក្រៅឃុំ និងបានចាកចេញពីពន្ធនាគារនៅថ្ងៃបន្ទាប់ ក្នុងរយៈប្រាំមួយខែ បន្ទាប់ពីត្រូវបានឃុំខ្លួនពាក់ព័ន្ធនឹងភាពមិនប្រក្រតីដែលត្រូវបានចោទប្រកាន់នៅក្នុង​គោល​នយោបាយ​របស់​រដ្ឋធានី។ លោកត្រូវបានធានាឲ្យនៅក្រៅឃុំលើប្រាក់ធានាមួយលានរូពីស្មើនឹង ១១៩២០ដុល្លារ ចំពោះការដែលលោកមិនធ្វើអត្ថាធិប្បាយជាសាធារណៈអំពីសំណុំរឿងប្រឆាំងនឹងលោក រួមទាំងមិនទៅការិយាល័យ ហើយនិងបដិសេធមិនចុះហត្ថលេខាលើឯកសារផ្លូវការ។

ការដោះលែងលោកបានធ្វើឲ្យ AAP រំពឹងថានឹងអនុញ្ញាតឱ្យលោកធ្វើយុទ្ធនាការឃោសនាជានាយករដ្ឋមន្ត្រីនៅក្នុងការបោះឆ្នោតថ្នាក់តំបន់នៅខែក្រោយនៅក្នុងរដ្ឋភាគខាងជើងនៃរដ្ឋ Haryana ជិតខាង និងនៅទីក្រុង Delhi នៅដើមឆ្នាំក្រោយ។ លោកបានលាលែងពីដំណែង ប៉ុន្តែលោក Kejriwal ថាលោកនឹងត្រឡប់ទៅកាន់តំណែងវិញ លុះត្រាតែប្រជាជនបញ្ជាក់ភាពស្មោះត្រង់របស់លោក ដោយការបោះឆ្នោតឱ្យលោកនៅក្នុងការបោះឆ្នោតនៅដេលីនាពេលខាងមុខនេះ និងបានអំពាវនាវឱ្យគណៈកម្មាធិការបោះឆ្នោតប្រទេសឥណ្ឌា នាំមកនូវការបោះឆ្នោតនៅទីក្រុងដេលីពីខែវិច្ឆិកាដល់ខែកុម្ភៈឆ្នាំ២០២៥។ .

គួរបញ្ជាក់ថាលោក Kejriwal ត្រូវ​បាន​ចាប់​ខ្លួន​ដំបូង​ក្នុង​ខែ​មីនា ដោយ​នាយកដ្ឋាន​អនុវត្ត​ច្បាប់ ជា​ទីភ្នាក់ងារ​ប្រយុទ្ធ​ប្រឆាំង​នឹង​ឧក្រិដ្ឋកម្ម​ហិរញ្ញវត្ថុ​របស់​ប្រទេស​ឥណ្ឌា ប៉ុន្មាន​សប្តាហ៍​មុន​ការ​បោះឆ្នោត​ជាតិ​របស់​ប្រទេស​នេះ ទាក់ទង​នឹង​គោលនយោបាយ​ស្រា​របស់​ក្រុង​ដេលី។

ទោះបីជាលោកត្រូវបានអនុញ្ញាតឱ្យនៅក្រៅឃុំនៅក្នុងករណីនោះក្នុងខែកក្កដាក៏ដោយ លោកនៅតែស្ថិតក្នុងការឃុំខ្លួនដោយសារតែការចាប់ខ្លួនរបស់លោកកាលពីខែមុនដោយប៉ូលីសសហព័ន្ធនៅក្នុងករណីពុករលួយមួយផ្សេងទៀតដែលទាក់ទងនឹងគោលនយោបាយដូចគ្នា ខណៈដែលលោក Kejriwal និងគណបក្ស AAP បានបដិសេធការចោទប្រកាន់នេះម្តងហើយម្តងទៀត៕

អត្ថបទ៖ ប៊ុន សុភាព