ឡើងកម្តៅ! អ៊ីស្រាអែល សម្លាប់មនុស្សជិត ៥០០នាក់នៅលីបង់ ខណៈអាមេរិក បញ្ជូនទ័ពបន្ថែមទៅ មជ្ឈិមបូព៌ា

ក្រសួងសុខាភិបាលលីបង់ បានបញ្ចេញតួលេខចុងក្រោយថា ចំនួនមនុស្សស្លាប់ដោយការវាយប្រហាររបស់អ៊ីស្រាអែលលើប្រទេសខ្លួន បានកើនឡើងដល់៤៩២នាក់ហើយ ខណៈ ​១ ៦៤៥នាក់ទៀតរងរបួស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រសួងបញ្ជាក់​ថា ក្នុងចំណោមមនុស្សស្លាប់ ក៏មាន​កុមារ២៤នាក់ និង​ស្ត្រី៤២នាក់ផងដែរ ហើយនេះគឺ​ជា​ចំនួន​អ្នក​ស្លាប់​ប្រចាំ​ថ្ងៃ​ខ្ពស់​បំផុតមិនធ្លាប់មានសោះក្នុងអំពើហិង្សានៅ​ប្រទេស​លីបង់ចាប់​តាំង​ពី​សង្គ្រាម​ស៊ីវិល​ឆ្នាំ១៩៧៥-១៩៩០។

នេះគឺជាការវាយប្រហារដ៏សាហាវរបស់អ៊ីស្រាអែលទៅលើលីបង់ ហើយវាកើតឡើងត្រឹមប៉ុន្មានម៉ោងប៉ុណ្ណោះ បន្ទាប់ពីអ៊ីស្រាអែល ប្រកាសឲ្យពលរដ្ឋរស់នៅក្នុងឬក្បែរទីតាំងឈរជើងរបស់ក្រុមហេសបូឡា ត្រូវជម្លៀសចេញជាបន្ទាន់ ហើយជុំវិញស្ថានការណ៍ឡើងកម្តៅនេះ សហរដ្ឋអាមេរិកក៏ប្រកាសបញ្ជូនកងទ័ពបន្ថែមទៀតទៅកាន់តំបន់មជ្ឈិមបូព៌ាផងដែរ។

កងកម្លាំងអាកាសអ៊ីស្រាអែលបានបង្ហោះលើបណ្តាញសង្គម X ថា ខ្លួនបានធ្វើបេសកកម្មវាយប្រហារប្រហែល៦៥០លើកក្នុងរយៈពេល២៤ម៉ោង ដោយប្រើមីស៊ីលជាង ១ ៤០០គ្រាប់ វាយប្រហារលើគោលដៅជាង១ ១០០កន្លែង។

អ្នកនាំពាក្យយោធាអ៊ីស្រាអែល លោក Daniel Hagari និយាយថា អ៊ីស្រាអែល បានបាញ់កម្ទេចទីតាំងលាក់គ្រាប់មីស៊ីលនិងរ៉ុកកែតទម្ងន់ធ្ងន់របស់ក្រុមហេសបូឡា ហើយចោទថា ចលនាសកម្មប្រយុទ្ធលីបង់មួយនេះ កំពុងរៀបផែនការសម្លាប់រង្គាលទ្រង់ទ្រាយធំជាងការវាយប្រហារឆ្លងដែន ដែលក្រុមហាម៉ាស ធ្វើនៅថ្ងៃទី៧ខែតុលាឆ្នាំ២០២៣ចេញពីតំបន់ហ្គាហ្សាកាលពីឆ្នាំមុនទៅទៀត។

ពាក់ព័ន្ធការឡើងកម្តៅនេះ មន្ទីរបញ្ចកោណប្រកាសថា សហរដ្ឋអាមេរិកនឹងបញ្ជូនទាហានបន្ថែមមួយចំនួនទៀតទៅកាន់តំបន់មជ្ឈិមបូព៌ា ដោយសារភាពតានតឹងរវាងអ៊ីស្រាអែល និងក្រុមហេសបូឡាលីបង់ ឈានដល់កម្រិតខ្ពស់ ប៉ុន្តែ​ខ្លួន​មិន​បញ្ជាក់ឡើយថា ទ័ពដែលនឹងត្រូវបញ្ជូនទៅមានចំនួនប៉ុន្មាននាក់។

យ៉ាងណា រដ្ឋបាលរបស់លោកប្រធានាធិបតី ចូ បៃដិន បាននិងកំពុងព្យាយាមទប់ស្កាត់មិនឲ្យជម្លោះនៅតំបន់ហ្គាហ្សាពុះកញ្ជ្រោលដល់ថ្នាក់គ្រប់គ្រងលែងបានឡើយ ហើយអំពាវនាវជាថ្មីឲ្យដោះស្រាយវិបត្តិព្រំដែនអ៊ីស្រាអែល-លីបង់តាមរយៈផ្នែកការទូត។

ចំណែកអគ្គលេខាធិការអង្គការសហប្រជាជាតិ លោក Antonio Guterres ឯណោះ ក៏បានបង្ហាញក្តីព្រួយបារម្ភយ៉ាងខ្លាំងផងដែរ ចំពោះចំនួនជនស៊ីវិលដែលបាត់បង់ជីវិតនៅក្នុងប្រទេសលីបង់។

លើសពីនេះ បណ្តាមេដឹកនាំពិភពលោក សុទ្ធតែចេញមុខថ្កោលទោសទង្វើរបស់អ៊ីស្រាអែល ហើយនាំគ្នាអំពាវនាវឲ្យភាគីទាំងសងខាង ត្រូវបន្តអត់ធ្មត់និងជ្រើសរើសដោះស្រាយសន្តិវិធីចំពោះជម្លោះនេះវិញ៕

អត្ថបទ៖ សុខ សុវណ្ណ

ចុចអាន៖ អ៊ីស្រាអែល ប្រកាសឲ្យពលរដ្ឋនៅលីបង់ ប្រញាប់ចាកចេញពីទីតាំងក្រុមហេសបូឡា