ព័ត៌មានអន្ដរជាតិ

មេដឹកនាំរុស្ស៊ី និងអ៊ីរ៉ង់ គ្រោងជួបគ្នានៅថ្ងៃសុក្រ ពិភាក្សាអំពីជម្លោះនៅមជ្ឈិមបូព៌ា

បានផុស

២ years មុន

នៅ

ថ្ងៃអង្គារ ៨ តុលា ២០២៤

ដោយ

Chheang

ប្រធានាធិបតីរុស្ស៊ី លោក វ្ល៉ាឌីមៀរ ពូទីន នឹងជួបជាមួយប្រធានាធិបតីអ៊ីរ៉ង់ លោក Masoud Pezeshkian សម្រាប់កិច្ចពិភាក្សានៅថ្ងៃសុក្រទី១១ខែតុលា ក្នុងវេទិកាមួយនៅឯប្រទេសតួកម៉េនីស្ថាន។ នេះបើយោងតាមការចុះផ្សាយរបស់សារព័ត៌មាន The Moscow Times។

លោក វ្ល៉ាឌីមៀរ ពូទីន និងលោក Masoud Pezeshkian (រូបភាព៖ APA)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Yury Ushakov ជំនួយការរបស់លោក ពូទីន លើគោលនយោបាយការបរទេស បានប្រាប់អ្នកកាសែតថា មេដឹកនាំទាំងពីរនឹងជួបប្រជុំគ្នានៅរដ្ឋធានី Ashgabat ខណៈពេលដែលមេដឹកនាំនៃបណ្តាប្រទេសអាស៊ីកណ្តាលចូលរួមរំលឹកខួបលើកទី៣០០នៃកំណើតរបស់កវី និងជាមេដឹកនាំតួកម៉េនីស្ថាន Magtymguly Pyragy នាសតវត្សទី១៨។

លោក Ushakov បាននិយាយថា៖ «កិច្ចប្រជុំនេះមានសារៈសំខាន់ខ្លាំងទាំងការពិភាក្សាអំពីបញ្ហាទ្វេភាគី ក៏ដូចជាការពិភាក្សាអំពីស្ថានការណ៍ដែលមានការកើនឡើងយ៉ាងខ្លាំងនៅមជ្ឈិមបូព៌ា»។

វត្តមានរបស់លោក ពូទីន មិនត្រូវបានគេប្រកាសពីមុននោះទេ។

គួររំឭកថា នាយករដ្ឋមន្ត្រីរុស្ស៊ី លោក Mikhail Mishustin បានទៅបំពេញទស្សនកិច្ចនៅអ៊ីរ៉ង់កាលពីសប្តាហ៍មុន ដើម្បីពិភាក្សាជាមួយលោក Pezeshkian និងអនុប្រធានាធិបតីទីមួយ លោក Mohammad Reza Aref។

កិច្ចពិភាក្សានេះ ធ្វើឡើងនៅពេលដែលអ៊ីស្រាអែលទម្លាក់គ្រាប់បែកយ៉ាងខ្លាំងទៅលើប្រទេសលីបង់ ដោយផ្តោតលើក្រុមហេសបូឡាដែលគាំទ្រដោយអ៊ីរ៉ង់ ហើយរុស្ស៊ីបានជម្លៀសពលរដ្ឋមួយចំនួនរបស់ខ្លួន។

រុស្ស៊ីមានទំនាក់ទំនងជិតស្និទ្ធជាមួយអ៊ីរ៉ង់ ហើយរដ្ឋាភិបាលលោកខាងលិច បានចោទប្រកាន់ក្រុងតេហេរ៉ង់ថាបានផ្គត់ផ្គង់ដ្រូន និងមីស៊ីលឲ្យទៅក្រុងមូស្គូ។ យ៉ាងណាមិញ អ៊ីរ៉ង់បានបដិសេធម្តងហើយម្តងទៀតចំពោះការចោទប្រកាន់នេះ។

លោក Pezeshkian ក៏នឹងជួបពិភាក្សាជាមួយលោក ពូទីន ម្ដងទៀតផងដែរក្នុងអំឡុងដំណើរទស្សនកិច្ចទៅកាន់ប្រទេសរុស្ស៊ីក្នុងខែតុលានេះ ដើម្បីចូលរួមក្នុងកិច្ចប្រជុំកំពូល BRICS នៅទីក្រុង Kazan ចាប់ពីថ្ងៃទី២២ ដល់ថ្ងៃទី២៤៕

ដោយ៖ ឈាង