ព័ត៌មានអន្ដរជាតិ

តៃវ៉ាន់ ប្រាប់ថា ចិនធ្វើសមយុទ្ធរាល់ដង ទុកត្រៀមវាយលុកដែនកោះរបស់ខ្លួន

បានផុស

២ years មុន

នៅ

ថ្ងៃព្រហស្បតិ៍ ១៧ តុលា ២០២៤

ដោយ

Chheang

មន្ត្រីសន្តិសុខតៃវ៉ាន់ បានប្រកាសថា ចិនកំពុងកសាងសមត្ថភាពរបស់ខ្លួនជាលំដាប់ ដើម្បីប្រែសមយុទ្ធយោធាឲ្យក្លាយជាការវាយប្រហារពេញលេញទៅលើក្រុងតៃប៉ិ។ នេះបើយោងតាមការចុះផ្សាយរបស់ទីភ្នាក់ងារព័ត៌មាន Reuters នៅថ្ងៃទី១៧ខែតុលា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីជាន់ខ្ពស់តៃវ៉ាន់ម្នាក់សុំមិនបញ្ចេញឈ្មោះ បានប្រាប់ថា ក្រុងប៉េកាំង «បានចូលទៅកៀកកោះតៃវ៉ាន់ខ្លាំង។ ពួកគេបានបង្កើនសម្ពាធរបស់ពួកគេទៅលើតៃវ៉ាន់ និងគាបសង្កត់ពេលវេលាឆ្លើយតបរបស់តៃវ៉ាន់។ សមយុទ្ធនេះតំណាងឲ្យការគំរាមកំហែងកាន់តែខ្លាំងឡើងជាងពីមុនដែលធ្លាប់ធ្វើមកលើតៃវ៉ាន់»។

នៅក្នុងសមយុទ្ធចុងក្រោយរបស់ចិននៅជុំវិញតៃវ៉ាន់ ក្រុងតៃប៉ិបានរាយការណ៍ថាខ្លួនបានតាមដានឃើញយន្តហោះចម្បាំងចំនួន ១៥៣គ្រឿង និងនាវាចំនួន ២៥គ្រឿង ស្ថិតនៅចម្ងាយត្រឹម ៣៩គីឡូម៉ែត្រប៉ុណ្ណោះពីកោះតៃវ៉ាន់។ បើតាមមន្ត្រីតៃវ៉ាន់ ចិនក៏បានបាញ់មីស៊ីលចំនួន ២គ្រាប់ផងដែរនៅក្នុងសមយុទ្ធព្រមានក្រុងតៃប៉ិ ដែលការបាញ់នេះសំដៅទៅលើតំបន់ដីគោកមួយកន្លែង តែមិនបានផ្ដល់ព័ត៌មានលម្អិតនោះទេ។

មន្ត្រីតៃវ៉ាន់ បាននិយាយថា៖ «ទោះបីជាពួកគេមិនបានបាញ់មីស៊ីលសំដៅកោះតៃវ៉ាន់លើកនេះក៏ដោយ ក៏ពួកគេបានអនុវត្តការបាញ់មីស៊ីលដែរ»។

ក្រសួងការពារជាតិចិន មិនបានឆ្លើយតបភ្លាមៗទៅនឹងការលើកឡើងរបស់តៃវ៉ាន់នោះឡើយ។ យ៉ាងណា កាលពីថ្ងៃចន្ទ ចិនបានប្ដេជ្ញាបន្តសកម្មភាពឲ្យកាន់តែខ្លាំងទៀត ប្រសិនបើចាំបាច់ ដើម្បីប្រឆាំងនឹងតៃវ៉ាន់ ខណៈកាលពីថ្ងៃពុធវិញ ការិយាល័យកិច្ចការតៃវ៉ាន់របស់ចិន បានប្រកាសថា ក្រុងប៉េកាំងនឹងមិនបដិសេធក្នុងការប្រើប្រាស់កងកម្លាំងដើម្បីដណ្ដើមយកតៃវ៉ាន់នោះទេ។

ចិន ដែលចាត់ទុកតៃវ៉ាន់ថាជាដែនដីរបស់ខ្លួន បានធ្វើសមយុទ្ធទ្រង់ទ្រាយធំ កាលពីថ្ងៃចន្ទទី១៤ខែតុលា ដោយនិយាយថា វាជាការព្រមានដល់ «សកម្មភាពផ្តាច់ខ្លួន» បន្ទាប់ពីសុន្ទរកថានៅថ្ងៃបុណ្យជាតិកាលពីសប្តាហ៍មុនរបស់ប្រធានាធិបតីតៃវ៉ាន់ លោក Lai Ching-te។

ក្នុងរយៈពេល៥ឆ្នាំចុងក្រោយ តៃវ៉ាន់បានត្អូញត្អែរអំពីសកម្មភាពយោធារបស់ចិនស្ទើរតែរាល់ថ្ងៃនៅជុំវិញដែនកោះរបស់ខ្លួន រួមទាំងការធ្វើសមយុទ្ធធំៗចំនួន៤លើក និងការល្បាតសមុទ្រជាទៀងទាត់៕

ដោយ៖ ឈាង