លោក ឡៃ ឈីងតេ ប្ដេជ្ញារក​គ្រប់​វិធីបង្កើនចំណាយ​យោធា ទោះ​ត្រូវ​សភា​វេតូ

លោក ឡៃ ឈីងតេ (Lai Ching-te) ប្រធានាធិបតីតៃវ៉ាន់ បានប្រកាសយ៉ាងម៉ឺងម៉ាត់​នា​ថ្ងៃអង្គារ ទី​១៦ ខែមិថុនា ឆ្នាំ​២០២៦ នេះ ថា លោកនឹង​មិនបោះបង់ចោលដាច់ខាត នូវផែនការបង្កើនកញ្ចប់ថវិកាការពារជាតិ បើទោះបីជាកាលពីខែមុន សភាជាតិដែលគ្រប់គ្រងដោយគណបក្សប្រឆាំង បានកាត់បន្ថយថវិកាបន្ថែមចំនួន ៤០ពាន់លានដុល្លារ ដោយអនុម័តឱ្យតែ ២ភាគ៣ ក៏ដោយ។ នេះ​បើយោងតាម​ការចុះផ្សាយរបស់​ទីភ្នាក់ងារ​ព័ត៌មាន Reuters។

សភាតៃវ៉ាន់ បានយល់ព្រមតែលើការទិញអាវុធពីសហរដ្ឋអាមេរិក ប៉ុន្តែបានបោះឆ្នោតវេតូ​កញ្ចប់ថវិកាសម្រាប់ផលិតដ្រូន និងមីស៊ីលនៅក្នុងស្រុក ដែលជាយុទ្ធសាស្ត្រស្នូលរបស់លោក ឡៃ ឈីងតេ ក្នុងការកសាងកម្លាំងការពារខ្លួនពីការគំរាមកំហែងរបស់ចិន។

នៅក្នុងដំណើរទស្សនកិច្ចទៅកាន់មូលដ្ឋានទ័ពមួយកន្លែង មេដឹកនាំតៃ​វ៉ាន់ បានសង្កត់ធ្ងន់ថា លោកនឹងស្វែងរកគ្រប់វិធីសាស្ត្រ មិនថាជាការបង្កើតច្បាប់ពិសេសដាច់ដោយឡែក ឬការស្នើសុំកញ្ចប់ថវិកាបន្ថែមប្រចាំឆ្នាំនោះទេ ដើម្បីធានាឱ្យបានថា គម្រោងផលិតឧបករណ៍យោធា និងហេដ្ឋារចនាសម្ព័ន្ធការពារជាតិ អាចដំណើរការទៅមុខដោយរលូន។ លោកមានគោលដៅរុញច្រានកញ្ចប់ថវិកាការពារជាតិឱ្យឡើងដល់ ៥ភាគរយនៃផលិតផលក្នុងស្រុកសរុប (GDP) នៅត្រឹមឆ្នាំ២០៣០ ដែលស្របទៅនឹងការចង់បានរបស់រដ្ឋបាលលោក ដូណាល់ ត្រាំ ដែលតែងតែជំរុញឱ្យបណ្តាសម្ព័ន្ធមិត្តបង្កើនការចំណាយលើវិស័យយោធាដោយខ្លួនឯង។

ក្រៅពីនេះ លោក ឡៃ ឈីងតេ ក៏បានចុះទៅពិនិត្យស្ថានីយរ៉ាដាសំខាន់ៗនៅលើភ្នំជុំវិញទីក្រុងតៃប៉ិ ដែលជាភ្នែកច្រមុះយ៉ាងសំខាន់ ក្នុងការតាមដានរាល់ចលនារបស់កងទ័ពចិន ២៤ម៉ោងលើ២៤ម៉ោង។ លោកបានកោតសរសើរដល់ទាហានទាំងអស់ ដែលបានបំពេញភារកិច្ចយ៉ាងសកម្ម ក្នុងការក្តោបក្តាប់ព័ត៌មានសម្ងាត់ភ្លាមៗ និងចំគោលដៅ។ ស្របពេលជាមួយគ្នានេះ តំណាងការទូតជាន់ខ្ពស់របស់អាមេរិកប្រចាំនៅតៃវ៉ាន់ ក៏បានផ្តល់អនុសាសន៍ថា តៃវ៉ាន់ចាំបាច់ត្រូវតែ «ចេះចាយលុយឱ្យឆ្លាតវៃ» លើប្រព័ន្ធការពារជាតិ និងត្រូវដកស្រង់បទពិសោធន៍ពីសង្រ្គាមនៅអ៊ុយក្រែន និងមជ្ឈិមបូព៌ា ក្នុងការប្រើប្រាស់ដ្រូន ដើម្បីរក្សាជញ្ជីងកម្លាំងយោធាជាមួយចិនឱ្យបាន៕

ប្រែសម្រួល៖ ឈាង