ព័ត៌មានអន្ដរជាតិ

ឥណ្ឌូណេស៊ី និងរុស្ស៊ី ត្រៀមធ្វើសមយុទ្ធជើងទឹករួមគ្នាជាលើកដំបូង

បានផុស

១ ខែ មុន

នៅ

ថ្ងៃពុធ ៣០ តុលា ២០២៤

ដោយ

Chheang

សមយុទ្ធជើងទឹក នឹងត្រូវបានធ្វើឡើងរួមគ្នារវាងឥណ្ឌូណេស៊ី និងរុស្ស៊ី នាខែវិច្ឆិកាខាងមុខ ដែលជាវិធានការរបស់មេដឹកនាំឥណ្ឌូណេស៊ីថ្មីក្នុងការបង្កើនការរឹតបន្តឹងទំនាក់ទំនងជាមួយក្រុងមូស្គូ។ នេះបើយោងតាមការប្រកាសរបស់កងទ័ពជើងទឹកឥណ្ឌូណេស៊ី កាលពីថ្ងៃទី២៩ខែតុលាឆ្នាំ២០២៤។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

កងទ័ពជើងទឹកឥណ្ឌូណេស៊ី បានប្រាប់ថា សមយុទ្ធនឹងចាប់ផ្ដើមពីថ្ងៃទី៤ដល់ថ្ងៃទី៨ខែវិច្ឆិកានៅសមុទ្រ Java ក្បែរមូលដ្ឋានទ័ពទីក្រុង Surabaya។ សេចក្ដីថ្លែងការណ៍របស់ទ័ពជើងទឹកឥណ្ឌូណេស៊ី បានរៀបរាប់ថា៖ «វាគឺជាសមយុទ្ធទ្វេភាគីដ៏គួរឲ្យកត់សម្គាល់រវាងកងទ័ពជើងទឹកឥណ្ឌូណេស៊ី និងកងទ័ពជើងទឹករុស្ស៊ី» ដោយបន្ថែមថា ក្រុងមូស្គូនឹងបញ្ជូននាវាចម្បាំងប្រភេទ Corvette ចំនួន៣គ្រឿង នាវាដឹកទំនិញខ្នាតមធ្យម១គ្រឿង ឧទ្ធម្ភាគចក្រ១គ្រឿង និងទូកសណ្ដោង១គ្រឿង។

លោក Sergey Tolchenov អគ្គរដ្ឋទូតរុស្ស៊ីប្រចាំឥណ្ឌូណេស៊ី បានបញ្ជាក់ថា សមយុទ្ធនេះមិនមែនមានបំណងប្រកួតប្រជែងជាមួយបណ្ដាប្រទេសណាមួយទេ ដោយនិយាយថា វាគ្រាន់តែដើម្បីពង្រឹងសមត្ថភាព និងអនុភាពនៃកងកម្លាំងរបស់ប្រទេសទាំងពីរ។

ឥណ្ឌូណេស៊ី កន្លងមកបានប្រកាន់ខ្ជាប់នូវគោលនយោបាយបរទេសអព្យក្រឹត ដោយបដិសេធមិនឈរនៅខាងណាសម្រាប់ជម្លោះនៅអ៊ុយក្រែន ក៏ដូចជាការប្រកួតប្រជែងរវាងសហរដ្ឋអាមេរិក និងប្រទេសចិន ជាដើម។

យ៉ាងណាមិញ ប្រធានាធិបតីថ្មីរបស់ឥណ្ឌូណេស៊ី លោក Prabowo Subianto ដែលទើបឡើងកាន់តំណែងកាលពីថ្ងៃទី២០ខែតុលា បានប្ដេជ្ញាថានឹងធ្វើឲ្យឥណ្ឌូណេស៊ីលេចមុខមាត់នៅលើឆាកអន្តរជាតិកាន់តែខ្លាំងឡើង ដោយកាលពីខែកក្កដា លោកបានទៅធ្វើទស្សនកិច្ចនៅក្រុងមូស្គូសម្រាប់ជំនួបជាមួយប្រធានាធិបតីរុស្ស៊ី លោក វ៉្លាឌឺមៀរ ពូទីន។

ឥណ្ឌូណេស៊ី កាលពីសប្ដាហ៍មុនក៏បានចាប់ផ្ដើមដំណើរការស្នើចូលជាសមាជិកក្រុមប្រទេស BRICS ដែលដឹកមុខដោយរុស្ស៊ី ប្រេស៊ីល ឥណ្ឌា ចិន និងអាហ្វ្រិកខាងត្បូង ផងដែរ៕

ដោយ៖ ឈាង