លោក Assad ភៀសខ្លួនចេញពីទីក្រុង ដាម៉ាស ហើយ!

ដោយដកស្រង់ប្រភពពីមន្ត្រីស៊ីរី២រូប, ទីភ្នាក់ងារព័ត៌មាន Reuters នៅថ្ងៃអាទិត្យទី៨ខែធ្នូឆ្នាំ២០២៤ បានផ្សាយថា លោកប្រធានាធីបតី Bashar al-Assad បានឡើងជិះយន្តហោះ ភៀសខ្លូនចេញពីទីក្រុងដាម៉ាសហើយ បន្ទាប់ពីក្រុមឧទ្ទាម Hayat Tahrir al-Sham «HTS» សម្រុកចូលដល់រដ្ឋធានី។

តាមសេចក្តីរាយការណ៍ លោក Assad បានឡើងជិះយន្តហោះឯកជនឆ្ពោះទៅកាន់ទីតាំងដែលគេមិនដឹង ខណៈគេឃើញកងទ័ពនៅឯព្រលាន ប៉ុន្តែកងទ័ពទាំងនោះបានបំបែកគ្នាវិញ ក្រោយយន្តហោះ ហោះឡើងបាត់។

លោក Assad បានចាកចេញ ក្រោយពេលក្រុមឧទ្ទាម HTS បានសម្រុកចូលដល់ទីក្រុង ដាម៉ាស ហើយក៏កើតមានការផ្ទុះអាវុធ ខណៈក្រុមនេះ ក៏បានរំដោះអ្នកទោស ចេញពីពន្ធនាគារល្បីបំផុតរបស់ប្រទេសស៊ីរីផងដែរ។

សូមបញ្ជាក់ជាថ្មី ក្រុម HTS បានបើកការវាយលុកកាលពីខែវិច្ឆិកា ជាមួយគោលបំណងធំ គឺផ្តួលរំលំរដ្ឋាភិបាលរបស់លោក Assad និងបង្ខំឲ្យកងកម្លាំងបរទេស ចាកចេញពីស៊ីរី។

ប្រតិបត្តិការនេះ បានបង្កជាក្តីបារម្ភអំពីការផ្ទុះចលានាបះបោរថ្មីនៅក្នុងតំបន់ ខណៈបណ្តាប្រទេសអារ៉ាប់កំពុងខ្វល់ចិត្ត ដោយខ្លាចតំបន់ធ្លាក់ចូលក្នុងអស្ថិរភាពសាជាថ្មី៕

អត្ថបទ៖ សុខ សុវណ្ណ

ចុចអាន៖ ការប្រយុទ្ធគ្នា ផ្ទុះឡើងហើយ! ក្រុមឧទ្ទាមស៊ីរី ចូលដល់រដ្ឋធានីដាម៉ាស និងរំដោះអ្នកទោស