ហ្សេលេនស្គី បើកចិត្តទទួលយកដំណោះស្រាយការទូតដើម្បីបញ្ចប់សង្គ្រាម តែក៏ចង់ឲ្យបរទេស ដាក់ទ័ព

តាមសេចក្តីរាយការណ៍របស់ Reuters កាលពីថ្ងៃចន្ទទី៩ខែធ្នូឆ្នាំ២០២៤, ក្នុងសន្និសីទកាសែតជាមួយមេបក្សប្រឆាំងអាល្លឺម៉ង់ Friedrich Merz, ប្រធានាធិបតីអ៊ុយក្រែនលោក វ្ល៉ាឌីមៀរ ហ្សេលេនស្គី បានប្រកាសបើកចិត្តទទួលយកដំណោះស្រាយការទូតដើម្បីបញ្ចប់សង្គ្រាម ប៉ុន្តែក៏បង្ហាញកូនចិត្តចង់ឲ្យបរទេសដាក់ទ័ពមកប្រទេសខ្លួនផងដែរ រហូតដល់ទីក្រុងកៀវ អាចចូលក្នុងអង្គការណាតូបាន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយមក លោក ហ្សេលេនស្គី ប្រាប់អ្នកសារព័ត៌មានក្នុងទីក្រុងកៀវថា «គ្មាននរណាចង់ឲ្យសង្គ្រាមនេះចប់លឿនជាងអ៊ុយក្រែនខ្លួននោះទេ។ មានតែដំណោះស្រាយការទូតប៉ុណ្ណោះ ទើបអាចជួយសង្គ្រោះជីវិតមនុស្សបាន។ យើងកំពុងស្វែងរកវាឲ្យបាន»។

យ៉ាងណាក្តី ស្របពេលជាមួយគ្នានោះ លោក Serhiy Nikiforov ដែលជាអ្នកនាំពាក្យប្រធានាធីបតីអ៊ុយក្រែន បាននិយាយថា ទីក្រុងកៀវ កំពុងត្រៀមខ្លួនជួបប្រជុំជាមួយដៃគូអឺរ៉ុបនិងអាមេរិក ក្នុងខែនេះ ដើម្បីពិភាក្សាអំពីលទ្ធភាពដាក់ទ័ពមកអ៊ុយក្រែន ជួយពង្រឹងសមត្ថភាពការពារខ្លួន។ ការធ្វើបែបនេះ គឺដើម្បីធានាថា អ៊ុយក្រែន ខ្លាំងទាំងផ្នែកការទូតនិងលើសមរភូមិ។

រឿងរ៉ាវពាក់ព័ន្ធប្រទេសអឺរ៉ុបបញ្ជូនកងទ័ពទៅអ៊ុយក្រែន ធ្វើឲ្យគេនឹកឃើញដល់គំនិតរបស់ប្រធានាធិបតីបារាំង អេម៉ាញូអែល ម៉ាក្រុង ប៉ុន្តែគំនិតនោះមិនមានការឯកភាពពីសំណាក់មេដឹកនាំអឺរ៉ុបមួយចំនួនទេ។

ជុំវិញបញ្ហានេះ លោក ហ្សេលេនស្គី ក៏និយាយដែរថា «យើងនឹកឃើញដល់ជំហររបស់លោក ម៉ាក្រុង។ គាត់ស្នើឲ្យផ្នែកខ្លះនៃប្រទេសរបស់យើង ត្រូវមានវត្តមានកងទ័ពបរទេស ដែលនឹងជួយធានាដល់សន្តិសុខរបស់យើង ខណៈអ៊ុយក្រែនមិនទាន់ចូលក្នុងអង្គការណាតូ»។

ទោះបីជាយ៉ាងណាក៏ដោយ​ ការចរចាសន្តិភាពជាមួយរុស្ស៊ី ប្រហែលមិនអាចទៅរួចទេ បើលោកហ្សេលេនស្គី នៅតែប្រកាន់ជំហរបែបនេះ ព្រោះម្តងហើយម្តងទៀត រុស្ស៊ីតែងទាមទារឲ្យអ៊ុយក្រែន ឈប់ស្រមៃចូលអង្គការណាតូទៀតទៅ ហើយចាត់ទុកសមាជិកភាពរបស់ទីក្រុង កៀវ ក្នុងសម្ព័ន្ធមិត្តដឹកនាំដោយអាមេរិកមួយនេះថាជា ការគំរាមកំហែងសន្តិសុខដែលមិនអាចទទួលយកបាន៕

អត្ថបទ៖ សុខ សុវណ្ណ

ចុចអាន៖ ទីប្រឹក្សាលោក ត្រាំ ស្តីឲ្យ ហ្សេលេនស្គី ថា ស្លៀកពាក់មើលងាយអាមេរិក