ពូទីន ប្រាប់ពីបញ្ហាធំមួយ ដែលរុស្ស៊ី កំពុងខ្វល់ខ្លាំង

មនុស្សភាគច្រើនប្រហែលគិតថា សង្គ្រាមជាមួយអ៊ុយក្រែននិងទំនាក់ទំនងដ៏ល្អក់កករគឺជាប​ញ្ហាដ៏ធំដែលរុស្ស៊ីកំពុងប្រឈមមុខហើយ ប៉ុន្តែមិនមែនត្រឹមប៉ុណ្ណឹងទេ! បើតាមការបញ្ជាក់ពីលោកប្រ​ធានាធិបតី វ្ល៉ាឌីមៀរ ពូទីន, បញ្ហាធំផ្សេងទៀតដែលខ្លួនកំពុងខ្វល់ខ្វាយខ្លាំងគឺ ប្រជាសាស្រ្ត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទចុងឆ្នាំនៅទីក្រុងមូស្គូកាលពីថ្ងៃព្រហស្បតិ៍ទី១៩ខែធ្នូឆ្នាំ២០២៤ មេដឹកនាំវិមានក្រឹមឡាំងគូសបញ្ជាក់ថា កង្វល់ដ៏ធំមួយរបស់រុស្ស៊ីគឺផ្នែកប្រជាសាស្រ្ត ហើយមិនមែនតែរុស្ស៊ីទេ សូម្បីប្រទេសអភិវឌ្ឍជាច្រើនផ្សេងទៀត ក៏កំពុងជួបប្រទះដែរ។

ឆ្លើយតបសំណួររបស់អ្នកសារព័ត៌មាន Maxim Dolgov មកពីស្ថាប័ន Readovka, លោកពូទីន លើកឡើងថា «នេះគឺជាបញ្ហាធំមួយសម្រាប់រុស្ស៊ី និងប្រទេសជាច្រើនទៀតជុំវិញពិភពលោក។ ជាក់ស្តែងន័រវែស ក៏មានអត្រាកំណើតប្រហាក់ប្រហែលនឹងរុស្ស៊ីដែរ ខណៈហ្វាំងឡង់ អេស្ប៉ាញ និងជប៉ុនមានអត្រាកំណើតទាបជាងនេះទៅទៀត រីឯកូរ៉េខាងត្បូង ស្ថិតក្នុងចំណោមប្រទេសមានអត្រាកំណើតទាបបំផុតមួយនៅលើពិភពលោក»។ 

ទន្ទឹមនោះ មេដឹកនាំ​រុស្ស៊ី​បានចង្អុលចំៗទៅព្រឹត្តិការណ៍ចំនួន២ ដែលជាដើមហេតុបង្កឲ្យមាន​វិបត្តិ​ប្រជាសាស្ត្រ​ក្នុង​ប្រទេស​មួយគឺសង្គ្រាមលោក​លើក​ទី២ និងមួយទៀតគឺការ​ដួលរលំ​នៃ​សហភាព​សូវៀត។

នាយកដ្ឋានស្ថិតិរដ្ឋសហព័ន្ធរុស្ស៊ី បានចេញរបាយការណ៍បង្ហាញពីការថយចុះគួរឲ្យកត់សម្គាល់នៃអត្រាកំណើតក្នុងប្រទេស ពោលគឺមានកុមារត្រឹមជាង ១.២លាននាក់ប៉ុណ្ណោះ​ ដែលបានចាប់កំណើតនៅឆ្នាំ២០២៣។

នេះជាតួលេខទាបបំផុតបើគិតចាប់តាំងពីឆ្នាំ១៩៩៩មក ហើយវាគឺស្របគ្នាជាមួយនឹងអត្រារៀបអាពាហ៍ពិពាហ៍ថយចុះ ចំណែកអត្រាលែងលះបែរជាកើនឡើងដល់កម្រិតខ្ពស់មិនធ្លាប់មាន៕

អត្ថបទ៖ សុខ សុវណ្ណ

ចុចអាន៖ ពូទីន បបួលលោកខាងលិច សាកមីស៊ីលគ្នា ដើម្បីឲ្យភ្លឺភ្នែក