ពូទីន បបួលលោកខាងលិច សាកមីស៊ីលគ្នា ដើម្បីឲ្យភ្លឺភ្នែក

តាមការចេញផ្សាយរបស់ Reuters, ប្រធានាធិបតីរុស្ស៊ី លោក វ្ល៉ាឌីមៀរ ពូទីន បានបបួលមហាអំណាចលោកខាងលិច សាកល្បងកម្លាំងយោធាគ្នា ដោយយកទីក្រុងកៀវជាគោលដៅបាញ់មីស៊ីល។ លោកអះអាងថា ប្រព័ន្ធការពារដែនអាកាសរបស់លោកខាងលិច គ្មានសមត្ថភាពស្ទាក់ចាប់មីស៊ីលល្បឿនលឿនជាងសំឡេងប្រភេទថ្មីឈ្មោះ Oreshnik របស់រុស្ស៊ីបានទេ បើមិនជឿសាកទៅ!

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកប្រកាសបែបនេះ កាលពីថ្ងៃព្រហស្បតិ៍ទី១៩ខែធ្នូឆ្នាំ២០២៤ ក្នុងសន្និសីទកាសែតចុងឆ្នាំនៅទីក្រុងមូស្គូ ដែលអូសបន្លាយពេល៤ម៉ោង ដោយក៏មានការចូលរួមពីសំណាក់អ្នកសារព័ត៌មានទាំងជាតិនិងអន្តរជាតិផងដែរ។

ក្នុងអំឡុងពេលនោះ លោក ពូទីន បានអួតអាងពីសមត្ថភាពយោធារបស់រុស្ស៊ីថា ខ្លួនជាមហាអំណាចយោធានៅលើពិភពលោក។ ទីក្រុងមូស្គូ មានមីស៊ីលអស្ចារ្យ គ្មានអ្វីអាចបាញ់ទម្លាក់បាន។ ប្រសិនបើលោកខាងលិចសង្ស័យ សូមឲ្យឈ្មោះគោលដៅមួយនៅក្នុងទីក្រុងកៀវដែលមានខែលការពារដែនអាកាសមក ហើយបន្ទាប់មក រុស្ស៊ីនឹងបាញ់មីស៊ីល Oreshnik ទៅ។ ​ដូច្នេះមហាអំណាចលោកខាងលិចនឹងភ្លឺភ្នែកហើយថា តើអាចបញ្ឈប់មីស៊ីលនេះបានដែរឬក៏អត់។ នេះ​ជា​វិធីពិសោធ​អំពីការ​ប្រកួត​បច្ចេកវិទ្យា​ខ្ពស់​នៃ​សតវត្សរ៍​ទី២១។

រុស្ស៊ី​បាន​បាញ់​មី​ស៊ី​លនេះ​លើកដំបូង វាយប្រហារ​ទីក្រុង Dnipro របស់​អ៊ុយក្រែន​កាលពី​ខែវិច្ឆិកា​។ យ៉ាងណា ពេលនោះ វាមិនបង្ហាញឥទ្ធិពលខ្លាំងពេកទេ ព្រោះមិនបំពាក់ក្បាលគ្រាប់នុយក្លេអ៊ែរ។

ទោះបីជាយ៉ាងណាក៏ដោយ នៅពេលនិយាយទាក់ទងនឹងលោក ដូណាល់ ត្រាំ, លោក ពូទីន បញ្ជាក់ថា រុស្ស៊ី បានត្រៀមខ្លួនរួចជាស្រេច ក្នុងការចូលរួមកិច្ចពិភាក្សាជាមួយប្រធានាធិបតីជាប់ឆ្នោតអាមេរិក ដើម្បីបញ្ចប់សង្គ្រាមប៉ុន្តែ កិច្ចពិភាក្សាគឺផ្អែកលើលក្ខខណ្ឌដែលរុស្ស៊ីធ្លាប់បង្ហាញរួចមកហើយ ដូចជា អ៊ុយក្រែន ត្រូវបោះបង់គំនិតចូលរួមជាមួយអង្គការណាតូ និងទទួលស្គាល់ទឹកដីដែលរុស្ស៊ីដណ្តើមកាន់កាប់៕

អត្ថបទ៖ សុខ សុវណ្ណ

ចុចអាន៖ លោក ពូទីន «ខ្ញុំគួរវាយលុកអ៊ុយក្រែន ឲ្យបានឆាប់ជាងនេះ»