ព័ត៌មានអន្ដរជាតិ

ជំនួយការហ្សេលេនស្គីថា «ផែនការបរាជ័យ»របស់អាមេរិក បើឲ្យអ៊ុយក្រែនធ្វើរឿងពីរ

បានផុស

១ year មុន

នៅ

ថ្ងៃចន្ទ ៣ កុម្ភៈ ២០២៥

ដោយ

ជំនួយការហ្សេលេនស្គីឆ្លើយតបទៅប្រេសិតពិសេសរបស់លោក ដូណាល់ ត្រាំ ថា ផែនការដាក់ឲ្យអ៊ុយក្រែនរៀបចំបោះឆ្នោតនៅចុងឆ្នាំ២០២៥នេះ និងទទួលយកបទឈប់បាញ់ជាមួយរុស្ស៊ី គឺជា«ផែនការបរាជ័យ» ដោយសារតែគ្មានការធានាលើបញ្ហាសន្តិសុខរបស់អ៊ុយក្រែន ហើយថា រុស្ស៊ីនឹងនឹងឈ្លានពានអ៊ុយក្រែនជាថ្មី។

ជំនួយការរបស់ប្រធានាធិបតីអ៊ុយក្រែន លោក ឌីមីត្រូ លីទ្វីន (Dmytro Lytvyn) ត្រូវបានទីភ្នាក់ងារព័ត៌មានរ៉យទ័រស្រង់សម្តី ដោយបញ្ជាក់ថា លោកមិនទាន់ជឿទុកចិត្តទាំងស្រុងទៅលើសម្រង់សម្តីមួយចំនួនដែលត្រូវបានផ្សាយកន្លងមករបស់មន្ត្រីជាន់ខ្ពស់របស់សហរដ្ឋអាមេរិកដែលស្នើឲ្យអ៊ុយក្រែនរៀបចំការបោះឆ្នោតប្រធានាធិបតីនៅចុងឆ្នាំនេះ និងការទទួលយកបទឈប់បាញ់ក្នុងពេលឆាប់ៗនេះ។

ជំនួយការរបស់ប្រធានាធិបតីអ៊ុយក្រែន លោក ឌីមីត្រូ លីទ្វីន (Dmytro Lytvyn) ពិភាក្សាជាមួយលោកហ្សេលេនស្គី។ Serhiy Leshchenko/Telegram

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក បានអះអាងប្រាប់រ៉យទ័រថា ការតម្រូវឲ្យអ៊ុយក្រែនរៀបចំការបោះឆ្នោតប្រធានាធិបតីនោះ និងការជំរុញឲ្យអ៊ុយក្រែនទទួលយកលក្ខខណ្ឌនៃបទឈប់បាញ់ជាមួយរុស្ស៊ី ខណៈពេលដែលអ៊ុយក្រែនមិនទាន់ដឹងអ្វីសោះនោះ គឺមើលទៅដូចជា «ផែនការបរាជ័យ»។

ចាប់តាំងពី លោក ដូណាល់ ត្រាំ ឡើងកាន់អំណាចកំពូលរបស់សហរដ្ឋអាមេរិក រដ្ឋាភិបាលអ៊ុយក្រែនដឹកនាំដោយលោក វ៉ុលឌីមៀរ ហ្សេលេនស្គី ហាក់តែលតោលគ្មានទីពឹងពុំនាក់ ដោយសារតែលោកដូណាល់ ត្រាំ បានកាត់ផ្តាច់ជំនួយគ្រប់ប្រភេទ ដែលរដ្ឋបាលប្រធានាធិបតី ចូ បៃដិន ធ្លាប់ផ្តល់។

លោក Keith Kellogg បេសកជនពិសេសរបស់ប្រធានាធិបតី ដូណាល់ ត្រាំ សម្រាប់ប្រទេសអ៊ុយក្រែននិងរុស្ស៊ី បានអះអាងប្រាប់ទីភ្នាក់ងារព័ត៌មានរ៉យទ័រមួយថ្ងៃមុនការប្រតិកម្មរបស់រុមន្ត្រីអ៊ុយក្រែនថា សហរដ្ឋអាមេរិកចង់ឱ្យអ៊ុយក្រែនរៀបចំការបោះឆ្នោត ដែលរំពឹងខ្ពស់នៅចុងឆ្នាំនេះ ជាពិសេសប្រសិនបើទីក្រុងកៀវអាចយល់ព្រមបទឈប់បាញ់ជាមួយរុស្ស៊ីនៅប៉ុន្មានខែខាងមុខនេះ។

លោក Keith Kellogg បេសកជនពិសេសរបស់ប្រធានាធិបតី ដូណាល់ ត្រាំ សម្រាប់ប្រទេសអ៊ុយក្រែននិងរុស្ស៊ី។ AP

លោក ឌីមីត្រូ លីទ្វីន (Dmytro Lytvyn) ទីប្រឹក្សាទំនាក់ទំនងរបស់ប្រធានាធិបតី ហ្សេលេនស្គី បាននិយាយថា »យើងមិនបានឃើញបទសម្ភាសន៍ពេញលេញរបស់លោក Kellogg ទេ មានតែសម្រង់សម្តីផ្ទាល់មួយចំនួនអំពីការបោះឆ្នោត ដូច្នេះវាពិបាកក្នុងការវាយតម្លៃពេញលេញនូវតួនាទីរបស់គាត់»។

លោកបានប្រាប់រ៉យទ័រក្នុងសេចក្តីថ្លែងការណ៍ជាលាយលក្ខណ៍អក្សរថា «ប៉ុន្តែប្រសិនបើផែនការរបស់គាត់គ្រាន់តែជាបទឈប់បាញ់ និងការបោះឆ្នោត នោះវាគឺជាផែនការបរាជ័យ ព្រោះថា ពូទីននឹងមិនត្រូវបានគេធ្វើឲ្យខ្លាចដោយរឿងទាំងពីរនេះទេ»។

ប្រធានាធិបតីអ៊ុយក្រែន លោក ហ្សេលេនស្គី ក៏ដូចជាមន្ត្រីជាន់ខ្ពស់ផ្សេងទៀតរបស់អ៊ុយក្រែន តែងតែអះអាងក្នុងវេទិកាអន្តរជាតិថា ខ្លួនមិនចង់បានបទឈប់បាញ់ ដោយមិនទទួលបានការធានាសន្តិសុខពេញលេញពីមហាអំណាច ដែលនឹងបញ្ឈប់ទីក្រុងមូស្គូពីការបង្កើតកងកម្លាំងរបស់ខ្លួនឡើងវិញ និងចាប់ផ្តើមការលុកលុយជាថ្មីទៀតនាពេលអនាគត។

លោកហ្សេលេនស្គី បានឡើងកាន់អំណាចនៅប្រទេសអ៊ុយក្រែនក្នុងឆ្នាំ២០១៩ សម្រាប់រយៈពេល៥ឆ្នាំ ដែលត្រូវរៀបចំបោះឆ្នោតឡើងវិញនៅខែមីនាឬខែមេសាឆ្នាំ២០២៤ ប៉ុន្តែ ការបោះឆ្នោតត្រូវបានហាមឃាត់ក្រោមច្បាប់អាជ្ញាសឹក ដែលអ៊ុយក្រែនបានដាក់បន្ទាប់ពីការលុកលុយរបស់រុស្ស៊ីឆ្នាំ២០២២៕

ដោយ រ៉ាន់ រើយ

សេចក្ដីជូនដំណឹង៥ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា