ព័ត៌មានអន្ដរជាតិ

វិមានក្រឹមឡាំងទាមទារការបំភ្លឺ ក្រោយលោក JD Vance គំរាមប្រើសកម្មភាពយោធា

បានផុស

១ year មុន

នៅ

ថ្ងៃសៅរ៍ ១៥ កុម្ភៈ ២០២៥

ដោយ

Chheang

វិមានក្រឹមឡាំង បានស្នើសុំការបំភ្លឺពីសហរដ្ឋអាមេរិក បន្ទាប់ពីការអត្ថាធិប្បាយរបស់អនុប្រធានាធិបតីលោក JD Vance ដែលលើកឡើងពី «ឧបករណ៍នៃអំណាចយោធា» ដែលជាផ្នែកមួយនៃយុទ្ធសាស្រ្តរបស់ទីក្រុងវ៉ាស៊ីនតោន ទាក់ទងនឹងសង្គ្រាមរវាងរុស្ស៊ី និងអ៊ុយក្រែន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ថ្លែងនៅក្នុងបទសម្ភាសន៍ជាមួយកាសែត Wall Street Journal នៅមុនសន្និសិទសន្តិសុខទីក្រុង Munich កាលពីថ្ងៃទី១៤កុម្ភៈ លោក Vance បាននិយាយថា អាមេរិកមានទាំងមធ្យោបាយសេដ្ឋកិច្ច និងយោធា ដើម្បីជំរុញរុស្ស៊ីឲ្យយល់ព្រមលើកិច្ចព្រមព្រៀងសន្តិភាពជាមួយអ៊ុយក្រែន។ អ្នកនាំពាក្យវិមានក្រឹមឡាំង លោក Dmitry Peskov បានប្រាប់ថា ភាសាបែបនេះគឺជាចំណុចសំខាន់ថ្មីនៅក្នុងជំហររបស់សហរដ្ឋអាមេរិក។ លោក Peskov បានប្រាប់អ្នកយកព័ត៌មានថា៖ «យើងមិនធ្លាប់បានឮពីរូបមន្តបែបនេះពីមុនមកទេ។ ពួកវាមិនត្រូវបានគេលើកឡើងមកនិយាយពីមុនឡើយ។ យើងសង្ឃឹមថានឹងទទួលបានការបំភ្លឺនៅក្នុងទំនាក់ទំនងនាពេលខាងមុខ»។

ការអត្ថាធិប្បាយរបស់លោក Vance កើតឡើងចំពេលដែលកិច្ចខិតខំប្រឹងប្រែងការទូតកំពុងបន្តដើម្បីដោះស្រាយសង្គ្រាមអ៊ុយក្រែន។ កាលពីពេលថ្មីៗនេះ លោកប្រធានាធិបតី ដូណាល់ ត្រាំ បានប្រកាសថា មន្ត្រីអាមេរិក និងរុស្ស៊ីនឹងជួបប្រជុំគ្នានៅទីក្រុង Munich ដោយអ៊ុយក្រែនក៏បានអញ្ជើញផងដែរ។

ទោះបីជាយ៉ាងណាក៏ដោយ តំណាងអ៊ុយក្រែនបានបង្ហាញថា ពួកគេមិនរំពឹងថានឹងមានការចរចាដោយផ្ទាល់ជាមួយរុស្ស៊ីនៅក្នុងសន្និសីទនោះទេ។ បន្ថែមលើភាពតានតឹងនេះ អ្នកនាំពាក្យក្រសួងការបរទេសរុស្ស៊ីលោកស្រី Maria Zakharova បានប្រាប់ថា មន្ត្រីរុស្ស៊ីនឹងមិនចូលរួមសន្និសីទទីក្រុង Munich ឡើយ ដោយសារតែមិនត្រូវបានអញ្ជើញ និងអះអាងថា ព្រឹត្តិការណ៍នេះមានជំហរគាំទ្រខាងអ៊ុយក្រែន។

វាមិនច្បាស់ទេថាតើមន្ត្រីរុស្ស៊ីនឹងអាចជួបពិភាក្សាជាសម្ងាត់នៅខាងក្រៅសន្និសីទដែរឬក៏យ៉ាងណា។

ខណៈការចរចាកំពុងដំណើរការ ការអត្ថាធិប្បាយរបស់លោក Vance បានបង្កើនការព្រួយបារម្ភសម្រាប់ទីក្រុងមូស្គូអំពីវិធីសាស្រ្តរបស់ទីក្រុងវ៉ាស៊ីនតោន ដែលអាចធ្វើឲ្យមានការស្មុគស្មាញដល់កិច្ចពិភាក្សានាពេលខាងមុខ៕

ដោយ៖ ឈាង