ចិន រកឃើញមេរោគស៊ីសួតថ្មី បង្កក្តីបារម្ភផ្ទុះជំងឺរាតត្បាត ដូច កូវីដ-១៩

អ្នកវិទ្យាសាស្រ្តបានបង្ហាញក្តីព្រួយបារម្ភយ៉ាងខ្លាំង ក្រោយក្រុមអ្នកស្រាវជ្រាវចិន រកឃើញមេរោគថ្មីមួយប្រភេទនៅក្នុងខ្លួនសត្វប្រចៀវ ហើយវាមានលក្ខណៈស្រដៀងទៅនឹងវីរុសកូរ៉ូណា ដែលជាភ្នាក់ងារបង្ករោគរាតត្បាតជាសកល សម្លាប់មនុស្សរាប់លាននាក់ទូទាំងពិភពលោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មេរោគទើបរកឃើញនេះមានឈ្មោះ HKU5-CoV-2 ដែលមានសមត្ថភាពឆ្លងដល់មនុស្សនិងស៊ីសួត។ វាត្រូវបានរកឃើញក្នុងខ្លួនសត្វប្រចៀវមួយប្រភេទ នៅទីក្រុងហុងកុង។

អ្នកជំនាញមកពីមន្ទីរពិសោធន៍ក្វាងចូវ, បណ្ឌិត្យសភាវិទ្យាសាស្ត្រក្វាងចូវ, សាកលវិទ្យាល័យអ៊ូហាន និងវិទ្យាស្ថានវីរវិទ្យាអ៊ូហាន សុទ្ធតែសង្កត់ធ្ងន់លើសារៈសំខាន់នៃការតាមដានមេរោគដែលកំពុងលេចឡើងនេះ។

ទោះបីជាយ៉ាងណាក៏ដោយ អ្នកឯកទេសខាងមេរោគចិន Shi Zhengli បានឲ្យដឹងថា ដ្បិត HKU5-CoV-2 មានលក្ខណៈស្រដៀងទៅនឹង វីរុសកូរ៉ូណា ប៉ុន្តែបើឆ្លងដល់មនុស្សមែន វានឹងមិនបង្កភាពធ្ងន់ធ្ងរដូចកូរ៉ូណាទេ។ ចំពោះរោគសញ្ញាវិញ មេរោគថ្មីនេះ គឺចេញអាការដូចជំងឺកូវីដ១៩បេះបិទ។

កូវីដ១៩ គឺជាជំងឺរាតត្បាតដ៏សាហាវបំផុតមួយក្នុងប្រវត្តិសាស្ត្រពិភពលោក។ វាចាប់ផ្តើមនៅទីក្រុង អ៊ូហាន ប្រទេសចិនក្នុងខែធ្នូឆ្នាំ២០១៩ ហើយក៏រីករាលដាលយ៉ាងឆាប់រហ័សទៅកាន់ទ្វីបអាស៊ី និងទូទាំងពិភពលោកនៅដើមឆ្នាំ២០២០។

អង្គការសុខភាពពិភពលោក (WHO) បានប្រកាសអាសន្នចំពោះជំងឺនេះ ក្នុងខែមករាឆ្នាំ២០២០ ហើយក៏ទទួលស្គាល់វាថា ជារោគរាតត្បាតនៅថ្ងៃទី១១ខែមីនានៃឆ្នាំនោះ។

គិតត្រឹមខែកុម្ភៈឆ្នាំ២០២៥ WHO ចេញរបាយការណ៍ថា មានមនុស្សស្លាប់ដោយសារជំងឺកូវីដ១៩ប្រមាណ ៧.១លាននាក់ ទូទាំងពិភពលោក ប៉ុន្តែការសិក្សាបង្ហាញថា តួលេខពិតប្រាកដ អាចខ្ពស់ជាងនេះឆ្ងាយណាស់ ពោលគឺអាចពី ១៩.១ទៅ ៣៦លាននាក់ឯណោះ៕

អត្ថបទ៖ សុខ សុវណ្ណ

ចុចអាន៖ មន្ទីរពិសោធន៍នៅ អាហ្វ្រិក កំពុងមានហានិភ័យ ធ្លាយចេញមេរោគសាហាវៗ