ព័ត៌មានអន្ដរជាតិ

គ្រោះទឹកជំនន់ នៅចិន សម្លាប់មនុស្ស ៣៩នាក់ និងជម្លៀស ១៣ម៉ឺននាក់

បានផុស

១៣ វិនាទី មុន

នៅ

ថ្ងៃព្រហស្បតិ៍ ៩ កក្កដា ២០២៦

ដោយ

អាជ្ញាធរភាគខាងត្បូងប្រទេសចិន បានឱ្យដឹងនៅថ្ងៃព្រហស្បតិ៍ ទី៩ ខែកក្កដា ឆ្នាំ២០២៦ ថា មនុស្សចំនួន ៣៩នាក់ត្រូវបាត់បង់ជីវិត ក្នុងគ្រោះទឹកជំនន់ដោយសារឥទ្ធិពលព្យុះត្រូពិក Maysak ខណៈកោះតៃវ៉ាន់ និងឆ្នេរសមុទ្រភាគខាងកើតចិន កំពុងត្រៀមខ្លួនសម្រាប់ព្យុះធំមួយទៀត ដែលនឹងវាយប្រហារមកលើដីគោកក្នុងរយៈពេលប៉ុន្មានថ្ងៃខាងមុខនេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមការផ្សាយរបស់ AP, លោក Ding Wei អភិបាលក្រុង Nanning លើកឡើងក្នុងសន្និសីទសារព័ត៌មានមួយថា ចំនួនមនុស្សស្លាប់ភាគច្រើន គឺដោយសារការបាក់ទំនប់ទឹក នៅក្នុងតំបន់មួយនៅភាគខាងកើតទីក្រុង ដែលឆក់យកជីវិតមនុស្សចំនួន ២៦នាក់។ ចំណែកមនុស្ស ៩នាក់ផ្សេងទៀត នៅតែបាត់ខ្លួនក្នុងតំបន់ Guangxi ។

គួរបញ្ជាក់ថា ព្យុះ Maysak បាននាំមកនូវភ្លៀងធ្លាក់ខ្លាំងបំផុត ដល់តំបន់ Guangxi ចាប់តាំងពីថ្ងៃសៅរ៍មក ដោយនាំឱ្យបាក់អាងស្តុកទឹក និងធ្វើឱ្យមនុស្សជាប់គាំងអស់រយៈពេលជាច្រើនថ្ងៃក្នុងផ្ទះ និងអគារផ្សេងទៀត។

យោងតាមមជ្ឈមណ្ឌលឧតុនិយមជាតិ, ភ្លៀងធ្លាក់ខ្លាំងបានវាយប្រហារភាគខាងត្បូងនៃខេត្ត Guangxi អស់រយៈពេលជាច្រើនថ្ងៃ ដោយមានទឹកភ្លៀងធ្លាក់សរុបមានកម្ពស់ពី ១០ ទៅ ៤០សង់ទីម៉ែត្រនៅតំបន់ខ្លះ និងជាង ៩០សង់ទីម៉ែត្រក្នុងតំបន់ដែលរងផលប៉ះពាល់ខ្លាំង។

ក្នុងគ្រោះទឹកជំនន់នេះ មានដ្រូននិងទូកប្រមាណ ៥ ៧០០គ្រឿង ត្រូវបានប្រើប្រាស់ក្នុងប្រតិបត្តិការសង្គ្រោះ ដើម្បីជួយមនុស្សជាប់គាំងនៅលើផ្ទៃទឹក ហើយមនុស្សប្រមាណ ១៣០ ០០០នាក់ ត្រូវបានជម្លៀស៕

សម្រួល៖ ណឺ មិនា