ចិន និងកូរ៉េខាងជើង៖ មិត្តភាពដែកថែប មិនប្រែប្រួលតាមពេល​វេលាឡើយ

ទំនាក់ទំនងរវាងប្រទេសចិន និងកូរ៉េខាងជើង កាន់តែមានភាពស្អិតល្មួត និងរឹងមាំខ្លាំងឡើង ទោះបីជាស្ថានការណ៍នយោបាយពិភពលោក មានការប្រែប្រួលយ៉ាងណាក៏ដោយ។ ថ្មីៗនេះ ប្រធានាធិបតីចិន លោក ស៊ី ជីនពីង បានផ្ញើសារដ៏សំខាន់មួយទៅកាន់មេដឹកនាំកូរ៉េខាងជើង លោក គីម ជុងអ៊ុន ដោយបញ្ជាក់យ៉ាងច្បាស់ថា ចិននឹងបន្តរក្សា និងពង្រឹងមិត្តភាពជាប្រពៃណីរវាងប្រទេសទាំងពីរជានិច្ច។

សារនេះ ត្រូវបានផ្សព្វផ្សាយដោយសារព័ត៌មានរដ្ឋកូរ៉េខាងជើង KCNA នា​ថ្ងៃសៅរ៍ ទី​១១ ខែ​កក្កដា ឆ្នាំ​២០២៦ ដែលឆ្លុះបញ្ចាំងពីការប្តេជ្ញាចិត្តដ៏មុតមាំរបស់ចិន ក្នុងការគាំទ្រដល់បុព្វហេតុសង្គមនិយមរបស់កូរ៉េខាងជើង ក្រោមការដឹកនាំរបស់លោក គីម ជុងអ៊ុន។

នៅក្នុងការឆ្លើយតបវិញ លោក គីម ជុងអ៊ុន ក៏បានបង្ហាញពីក្តីរីករាយយ៉ាងខ្លាំង ដោយចាត់ទុកថា កិច្ចសហប្រតិបត្តិការរវាងប្រទេសជិតខាងទាំងពីរ បានឈានឡើងដល់កម្រិតយុទ្ធសាស្ត្រថ្មីមួយ ដែលមិនធ្លាប់មានពីមុនមក។ ដើម្បីជាការអបអរសាទរខួបអនុស្សាវរីយ៍ទី៦៥ នៃសន្ធិសញ្ញាមិត្តភាពរវាងប្រទេសទាំងពីរ លោកនាយករដ្ឋមន្ត្រីកូរ៉េខាងជើង ប៉ាក់ ថេសុង បានធ្វើដំណើរទៅកាន់ទីក្រុងប៉េកាំង កាលពីថ្ងៃសុក្រ ដើម្បីចូលរួមក្នុងព្រឹត្តិការណ៍ពិសេសនេះ។ ការផ្លាស់ប្តូរទស្សនកិច្ច និងសារលិខិតនេះ គឺធ្វើឡើងបន្ទាប់ពីលោក ស៊ី ជីនពីង បានទៅបំពេញទស្សនកិច្ចនៅទីក្រុងព្យុងយ៉ាង កាលពីខែមុន ដែលជាដំណើរទស្សនកិច្ចលើកដំបូងក្នុងរយៈពេល ៧ឆ្នាំ ដើម្បីព្រមព្រៀងលើការពង្រីកកិច្ចសហប្រតិបត្តិការផ្នែកនយោបាយ សេដ្ឋកិច្ច និងវប្បធម៌។

គួររំលឹកផងដែរថា សន្ធិសញ្ញាមិត្តភាព កិច្ចសហប្រតិបត្តិការ និងការជួយគ្នាទៅវិញទៅមក ដែលត្រូវបានចុះហត្ថលេខាកាលពីថ្ងៃទី១១ ខែកក្កដា ឆ្នាំ១៩៦១ គឺជាកិច្ចព្រមព្រៀងការពារជាតិទៅវិញទៅមករវាងចិន និងកូរ៉េខាងជើង ដែលនៅតែមានសុពលភាពរហូតមកដល់បច្ចុប្បន្ន។ តាមរយៈសារនោះ លោក ស៊ី ជីនពីង បានសង្កត់ធ្ងន់ថា មិនថាកាលៈទេសៈអន្តរជាតិវិវត្តទៅជាយ៉ាងណានោះទេ រដ្ឋាភិបាលចិននឹងបន្តយកចិត្តទុកដាក់ខ្ពស់លើចំណងមិត្តភាពនេះ ហើយប្តេជ្ញាការពារផលប្រយោជន៍រួម ដើម្បីធានាបាននូវបរិយាកាសយុទ្ធសាស្ត្រដ៏ល្អប្រសើរ សម្រាប់ប្រទេសទាំងពីរតទៅមុខទៀត៕

ប្រែសម្រួល៖ ឈាង