ចិន ចេញមុខឃាត់ អាមេរិក-អ៊ីរ៉ង់ រឿងវាយប្រហារសងសឹកគ្នា និងជំរុញឲ្យប្រើផ្លូវការទូត

រដ្ឋាភិបាលចិន បានប្រកាសកាលពីថ្ងៃ ទី៧ ខែកក្កដា ថា ការប្រើប្រាស់កម្លាំងយោធាគឺ ជារឿងមិនសមស្របឡើយ ហើយបានជំរុញឲ្យអាមេរិក និងអ៊ីរ៉ង់ ងាកមកចូលរួមក្នុងការចរចាគ្នាវិញ ចំពេលដែលមានការវាយប្រហារតាមអាកាសសងសឹកគ្នាទៅវិញទៅមកពីសំណាក់ភាគីទាំងសងខាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចេញផ្សាយពីទីភ្នាក់ងារ Anadolu, អ្នកនាំពាក្យក្រសួងការបរទេសចិន លោកស្រី ម៉ៅ នីង (Mao Ning) បានប្រាប់អ្នកយកព័ត៌មាននៅទីក្រុងប៉េកាំងថា «ការដុតបញ្ឆេះភ្លើងសង្គ្រាមឡើងវិញ មិនបានបម្រើដល់ផលប្រយោជន៍របស់បុគ្គលណាម្នាក់ឡើយ»។

សេចក្តីថ្លែងការណ៍នេះបានកើតឡើង បន្ទាប់ពីយោធាអាមេរិកអះអាងថា ខ្លួនបានបើកប្រតិបត្តិការវាយប្រហាររលកថ្មីមួយប្រឆាំងនឹងអ៊ីរ៉ង់ ដោយវាយប្រហារចំគោលដៅជាង ៨០ កន្លែង ដើម្បីឆ្លើយតបទៅនឹងការវាយប្រហាររបស់អ៊ីរ៉ង់ លើនាវាពាណិជ្ជកម្មដែលធ្វើដំណើរឆ្លងកាត់ច្រកសមុទ្រ Hormuz។

បញ្ជាការដ្ឋានកណ្តាលរបស់សហរដ្ឋអាមេរិក បានបញ្ជាក់ថា ការវាយប្រហារទាំងនេះត្រូវបានធ្វើឡើង ដើម្បីឆ្លើយតបជាបន្ទាន់ទៅនឹងការវាយប្រហាររបស់អ៊ីរ៉ង់លើនាវាពាណិជ្ជកម្មដែលធ្វើដំណើរឆ្លងកាត់ច្រកសមុទ្រ Hormuz។

ដោយឡែក យោងតាមទីភ្នាក់ងារសារព័ត៌មានពាក់កណ្តាលផ្លូវការ Tasnim បានឲ្យដឹងដែរថា កងឆ្មាំបដិវត្តន៍អ៊ីស្លាមអ៊ីរ៉ង់ (IRGC) បានអះអាងថា ខ្លួនបានបង្ហោះដ្រូន និងបាញ់មីស៊ីលគោលដៅលើទីតាំងយោធាអាមេរិកចំនួន ៨៥ កន្លែង រួមមានកំពង់ផែ Salman ដែលជាទីបញ្ជាការដ្ឋាននៃកងនាវាទី៥ របស់កងទ័ពជើងទឹកអាមេរិកប្រចាំនៅប្រទេសបារ៉ែន និងមូលដ្ឋានទ័ពអាកាស Ali Al-Salem នៅក្នុងប្រទេសគូវែត។

ទោះជាយ៉ាងណាក៏ដោយ លោកស្រី ម៉ៅ នីង អ្នកនាំពាក្យក្រសួងការបរទេសចិនបានសង្កត់ធ្ងន់ថា៖ «វិធានការយោធា គឺមិនសមស្របនោះឡើយ»។

លោកស្រី ម៉ៅ នីង បានបន្ថែមថា «យើងជំរុញឲ្យភាគីទាំងពីរដោះស្រាយជម្លោះតាមរយៈការចរចា បន្តអនុវត្តតាមអនុស្សរណៈនៃការយោគយល់គ្នា និងចៀសវាងការប្រើប្រាស់កម្លាំងបាយ»។ លោកស្រីបានបញ្ជាក់បែបនេះ ដោយយោងទៅលើកិច្ចព្រមព្រៀងដែលបានចុះហត្ថលេខាដោយប្រធានាធិបតីអ៊ីរ៉ង់ និងប្រធានាធិបតីអាមេរិកកាលពីខែមុន ដែលបានកំណត់រយៈពេល ៦០ ថ្ងៃនៃការចរចាសម្រាប់ភាគីទាំងពីរ ក្នុងការសម្រេចចិត្តលើកិច្ចព្រមព្រៀងដើម្បីបញ្ចប់សង្គ្រាមជាអចិន្ត្រៃយ៍៕

អត្ថបទ ៖ សាង ស្រីល័ក្ខ