ថៃត្រៀមទទួលយកក្រុមឧក្រិដ្ឋជនឆបោកតាមអនឡាញ២០០នាក់ពីអាជ្ញាធរកម្ពុជា

សមត្ថកិច្ចថៃត្រៀម​ទទួលក្រុមឧក្រិដ្ឋជនឆបោកតាមអនឡាញចំនួន២០០​នាក់ពី​ក្រុង​ប៉ោយ​ប៉ែត ប្រទេសកម្ពុជា។ នេះបើតាមការចុះផ្សាយរបស់កាសែត naewna news កាលពីថ្ងៃទី២៣ ខែកុម្ភៈ ឆ្នាំ២០២៥។

កាលពីថ្ងៃទី២៣ ខែកុម្ភៈ ឆ្នាំ២០២៥ លោកឧត្តមសេនីយ៍ទោ យីងយស ថេបចាំណុង ស្នងការនគរបាលភូមិភាគ២ ថៃ បាននិយាយអំពីករណីដែលសមត្ថកិច្ចកម្ពុជាចាប់ខ្លួនក្រុមឧក្រិដ្ឋជនឆបោកតាមអនឡាញបានចំនួនជាង២០០​នាក់ដែលមានមូលដ្ឋាននៅក្រុងប៉ោយប៉ែត ខេត្តបន្ទាយមានជ័យ របស់កម្ពុជា ហើយ​កំពុង​រៀបចំ​បញ្ជូន​ពួកគេ​ទៅឱ្យភាគីថៃ តាមច្រកឆ្លងព្រំដែនខ្លងលឹក ស្រុក​អារញ្ញ ​ខេត្ត​ស្រះកែវ។

ការត្រៀមបញ្ជូនក្រុមឧក្រិដ្ឋកម្មទាំងនេះ គឺបន្ទាប់ពីលោកឧត្តមសេនីយ៍ឯក Thatchai Pitaneelabut អគ្គស្នងការនគរបាលជាតិថៃ និងលោកឧត្តមសេនីយ៍ទោ Thirachai Chamnanmo មេបញ្ជាការផ្នែកស៊ើបអង្កេតនៃស្នងការដ្ឋាននគរបាលជាតិថៃ បានធ្វើដំណើរទៅកម្ពុជា ដើម្បីសម្របសម្រួលកិច្ចប្រតិបត្តិការរួមគ្នារវាងប្រទេសទាំងពីរ ​ដើម្បី​បង្ក្រាប​ក្រុម​ឧក្រិដ្ឋជនឆបោកអនឡាញ ​ដែល​មាន​មូលដ្ឋាន​នៅ​ក្រុង​ប៉ោយប៉ែត ហើយត្រូវបានសមត្ថកិច្ចកម្ពុជាចាប់ខ្លួនបាន​ជាង២០០​នាក់ ក្នុង​នោះ​ជាង ១០០​នាក់​ជា​ជនជាតិ​ថៃ។

ទន្ទឹមគ្នានេះ សមត្ថកិច្ចថៃ នឹងធ្វើការបែងចែកជាពីរផ្នែក ពោលគឺត្រូវស្វែងរក​អ្នកដែលរង​គ្រោះ​ដោយ​សារការ​ជួញដូរ​មនុស្ស និងស៊ើបអង្កេតរកក្រុមឆបោកតាមអនឡាញ ដែលខណៈនេះសមត្ថកិច្ច​កម្ពុជាបាននិងកំពុងពិនិត្យបែងចែក​តាមនីតិវិធីនិង​ផ្លូវច្បាប់​របស់​កម្ពុជា ហើយនឹង​បញ្ជូនពួកគេទៅឱ្យភាគីថៃ៕