ព័ត៌មានអន្ដរជាតិ

DVB៖ ចំនួនអ្នកស្លាប់នៅមីយ៉ាន់ម៉ាព្រោះគ្រោះរញ្ជួយដី មានលើសពី ៤ ០០០នាក់ហើយ

បានផុស

១ year មុន

នៅ

ថ្ងៃអាទិត្យ ៦ មេសា ២០២៥

ដោយ

Chheang

សមាគមសំឡេងប្រជាធិបតេយ្យភូមា (DVB) បានចុះផ្សាយនៅថ្ងៃទី៦ខែមេសាឆ្នាំ២០២៥នេះថា ចំនួនអ្នកស្លាប់ដោយសារតែគ្រោះរញ្ជួយដីដ៏ខ្លាំងកាលពីសប្ដាហ៍មុន បានកើនឡើងដល់ ៤ ១៧៣នាក់ ហើយមានអ្នករងរបួស ៦ ១៦៨នាក់ ខណៈមនុស្ស ៧៦៩នាក់កំពុងបាត់ខ្លួន។

(រូបថត៖ ទីភ្នាក់ងារពន្លត់អគ្គិភ័យមីយ៉ាន់ម៉ា)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការរញ្ជួយដីកម្រិត ៧,៧រ៉ិចទ័រដែលបានវាយប្រហារកាលពីថ្ងៃទី២៨ខែមីនា បានធ្វើឲ្យមានការបំផ្លិចបំផ្លាញយ៉ាងសម្បើមនៅទូទាំងភាគកណ្តាលនៃប្រទេសមីយ៉ាន់ម៉ា ដោយទីក្រុង Mandalay ទទួលរងនូវការខូចខាតយ៉ាងធ្ងន់ធ្ងរបំផុត។ ហេដ្ឋារចនាសម្ព័ន្ធសំខាន់ៗ ដូចជា មន្ទីរពេទ្យ សាលារៀន និងកន្លែងសាសនាត្រូវបានខូចខាត ឬបំផ្លាញយ៉ាងធ្ងន់ធ្ងរ។

ការិយាល័យអង្គការសហប្រជាជាតិសម្រាប់ការសម្របសម្រួលកិច្ចការមនុស្សធម៌ (OCHA) បានលើកឡើងពីតម្រូវការបន្ទាន់សម្រាប់ទីជម្រក ទឹកស្អាត និងការផ្គត់ផ្គង់វេជ្ជសាស្រ្ត ដោយព្រមានពីការផ្ទុះឡើងនៃជំងឺដែលអាចកើតមានដូចជា ជំងឺអាសន្នរោគដោយសារលក្ខខណ្ឌអនាម័យកាន់តែយ៉ាប់យ៉ឺន។

ស្របពេលជម្លោះស៊ីវិលកំពុងបន្តនៅប្រទេសមីយ៉ាន់ម៉ា កិច្ចខិតខំប្រឹងប្រែងផ្តល់ជំនួយបានពើបប្រទះនឹងភាពស្មុគស្មាញខ្លាំង ខណៈមនុស្សជាង ៣លាននាក់ត្រូវជម្លៀសខ្លួន និងជិត ២០លាននាក់កំពុងត្រូវការជំនួយ។ ទោះបីជាមានបទឈប់បាញ់បណ្តោះអាសន្នដែលត្រូវបានប្រកាសដោយយោធានិងក្រុមឧទ្ទាមដើម្បីជួយសម្រួលដល់ការផ្តល់ជំនួយក៏ដោយ ក៏នៅតែមានរបាយការណ៍អំពីការឈ្លានពានរបស់របបសឹកមីយ៉ាន់ម៉ា និងការរារាំងជំនួយជាបន្តបន្ទាប់ ជាពិសេសនៅក្នុងតំបន់ដែលគ្រប់គ្រងដោយក្រុមប្រឆាំង។ អង្គការសិទ្ធិមនុស្សបានចោទប្រកាន់របបសឹកមីយ៉ាន់ម៉ាថាបានបែងចែកជំនួយដោយមិនស្មើភាព ដែលធ្វើឲ្យវិបត្តិមនុស្សធម៌កាន់តែធ្ងន់ធ្ងរ៕