ព័ត៌មានអន្ដរជាតិ

គ្រោះរញ្ជួយដីនៅមីយ៉ាន់ម៉ា ធ្វើឲ្យស្ត្រីមានផ្ទៃពោះជាង១៧ម៉ឺននាក់ស្ថិតក្នុងហានិភ័យ

បានផុស

៤ ខែ មុន

នៅ

ថ្ងៃចន្ទ ៧ មេសា ២០២៥

ដោយ

Chheang

គ្រោះរញ្ជួយដីកម្រិត៧,៧រ៉ិចទ័រ ដែលបានវាយប្រហារមីយ៉ាន់ម៉ាកាលពីថ្ងៃទី២៨ខែមីនាឆ្នាំ២០២៥ បានជះឥទ្ធិពលយ៉ាងធ្ងន់ធ្ងរដល់ហេដ្ឋារចនាសម្ព័ន្ធថែទាំសុខភាពរបស់ប្រទេស ដោយបានធ្វើឲ្យស្ត្រីមានផ្ទៃពោះប្រមាណ ១៧៣ ៨៥៥នាក់មិនអាចទទួលបានសេវាសុខភាពសំខាន់ៗ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មូលនិធិប្រជាជនរបស់អង្គការសហប្រជាជាតិ (UNFPA) បានចុះផ្សាយថា តំបន់ដែលរងគ្រោះខ្លាំងជាងគេដូចជា Sagaing, Mandalay, និង Naypyidaw បានជួបប្រទះការបំផ្លិចបំផ្លាញយ៉ាងខ្លាំងនូវបរិក្ខារពេទ្យ ដែលនាំឲ្យមានការខ្វះខាតថ្នាំពេទ្យ សម្ភារៈ ទឹកស្អាត អាហារ និងទីជម្រក។

ដើម្បីឆ្លើយតបទៅនឹងវិបត្តិនេះ UNFPA បានបែងចែកប្រាក់ចំនួន ៥០ម៉ឺនដុល្លារពីមូលនិធិសង្គ្រោះបន្ទាន់របស់ខ្លួន ដើម្បីដោះស្រាយតម្រូវការរបស់ស្ត្រី និងកុមារីដែលរងផលប៉ះពាល់។ ក្រុមឆ្លើយតបរហ័សរបស់ UNFPA បានចុះទៅដល់ទីក្រុង Mandalay ដោយមានការសម្របសម្រួលជាមួយដៃគូដើម្បីចែកចាយឧបករណ៍សង្គ្រោះបន្ទាន់ សម្រាប់គាំទ្រដល់ការសម្រាលកូនដោយសុវត្ថិភាព។

តំណាង UNFPA បាននិយាយថា៖ «ការសម្រាលកូនមិនអាចបញ្ឈប់បានទេ ទោះបីជាមានការរញ្ជួយដីក្ដី។ ក្រុមការងារ UNFPA កំពុងធ្វើការទាំងថ្ងៃទាំងយប់ ដើម្បីធានាថា ស្ត្រីនិងក្មេងស្រីទទួលបានការគាំទ្រសង្គ្រោះជីវិតដែលពួកគេត្រូវការ។ យើងមិនអាចបណ្ដោយឲ្យវិបត្តិនេះលុបបំបាត់សិទ្ធិស្ត្រី សុវត្ថិភាពពួកគេ ឬក៏អនាគតពួកគេទេ»។

ការរញ្ជួយដី បានធ្វើឲ្យមានស្ថានភាពមនុស្សធម៌ដ៏ធ្ងន់ធ្ងររួចទៅហើយនៅមីយ៉ាន់ម៉ាកាន់តែយ៉ាប់យ៉ឺនមួយកម្រិតបន្ថែមទៀត ខណៈប្រទេសនេះកំពុងប្រឈមមុខនឹងជម្លោះស៊ីវិល ហើយមានប្រជាជនជម្លៀសខ្លួនជាង ៣លាននាក់ ដែលភាគច្រើនជាស្ត្រី និងកុមារី។ ទន្ទឹមនោះការបំផ្លិចបំផ្លាញកន្លែងថែទាំសុខភាព បានធ្វើឲ្យស្ត្រីមានផ្ទៃពោះជាច្រើនមិនមានលទ្ធភាពទទួលបានសេវាថែទាំមុនពេលសម្រាល ឆ្មបដែលមានជំនាញ និងសេវាសម្ភពបន្ទាន់ ដែលបង្កើនហានិភ័យនៃផលវិបាកមាតា និងទារក៕