អ៊ុយក្រែន ចាប់បានជនជាតិចិន ២នាក់ ដែលប្រយុទ្ធឲ្យរុស្ស៊ី នៅ Donetsk

ប្រធានាធិបតីអ៊ុយក្រែន វ៉ូឡូឌីមៀរ ហ្សេលេនស្គី ប្រកាសថា កងកម្លាំងរបស់លោក ចាប់បានជនជាតិចិន ២នាក់ដែលប្រយុទ្ធឲ្យរុស្ស៊ីនៅក្នុងតំបន់ Donetsk។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ហ្សេលេនស្គី ប្រកាសបែបនេះនៅក្នុងការបង្ហោះវីដេអូលើបណ្តាញសង្គម X ភ្ជាប់ជាមួយសំណេរថា «កងទ័ពរបស់យើង ចាប់បានពលរដ្ឋចិនពីរនាក់ ដែលកំពុងប្រយុទ្ធឲ្យកងទ័ពរុស្ស៊ី។ រឿងនេះកើតឡើងនៅលើទឹកដីអ៊ុយក្រែន គឺក្នុងតំបន់ Donetsk។ យើងរកឃើញ ឯកសារសម្គាល់ខ្លួន កាតធនាគារ និងទិន្នន័យនៅក្នុងខ្លួនពួកគេ។ យើងទទួលព័ត៌មានថា មានពលរដ្ឋចិនច្រើនជាងពីរនាក់នេះ ដែលជួយប្រយុទ្ធឲ្យរុស្ស៊ី។ បច្ចុប្បន្ននេះ យើងកំពុងផ្ទៀងផ្ទាត់ការពិតទាំងអស់ – ផ្នែកចារកម្ម សេវាសន្តិសុខអ៊ុយក្រែន និងអង្គភាពពាក់ព័ន្ធនៃកងកម្លាំងប្រដាប់អាវុធកំពុងធ្វើការលើរឿងនេះ»។ 

លោកបន្តថា «ខ្ញុំ​បាន​ណែនាំ​រដ្ឋមន្ត្រី​ក្រសួង​ការ​បរទេស​អ៊ុយក្រែន ឲ្យ​ទាក់ទងទៅ​ក្រុង​ប៉េកាំង​ជា​បន្ទាន់ ហើយ​ត្រូវបញ្ជាក់ថាតើ​ចិន​មាន​បំណង​ឆ្លើយ​តប​បែបណាចំពោះបញ្ហា​នេះ។ ការចូលរួមរបស់រុស្ស៊ីជាមួយចិន រួមជាមួយប្រទេសដទៃទៀត មិនថាដោយផ្ទាល់ឬប្រយោលនោះទេ នៅក្នុងសង្គ្រាមនៅអឺរ៉ុបនេះ គឺជាសញ្ញាយ៉ាងច្បាស់ថា លោកពូទីន មានបំណងធ្វើអ្វីក្រៅពីបញ្ចប់សង្រ្គាម គាត់​កំពុង​រិះរក​វិធី​ដើម្បី​បន្ត​ការ​ប្រយុទ្ធ។ បែបនេះ ត្រូវតែមានការឆ្លើយតបគឺការឆ្លើយតបពីសហរដ្ឋអាមេរិក អឺរ៉ុប និងអ្នកជុំវិញពិភពលោកដែលចង់បានសន្តិភាព។ ពលរដ្ឋ​ចិន​ដែល​ត្រូវ​បាន​ចាប់​ខ្លួន ​ឥឡូវ​នេះ​កំពុង​ស្ថិត​ក្នុង​មន្ទីរ​ឃុំឃាំងរបស់ភ្នាក់ងារសន្តិសុខ​អ៊ុយក្រែន។ សកម្មភាពស៊ើបអង្កេត និងប្រតិបត្តិការពាក់ព័ន្ធកំពុងបន្ត»។

ភ្លាមៗក្រោយការប្រកាសនេះ ក្រសួងការបរទេសអ៊ុយក្រែន បានហៅភារធារីរបស់ចិនប្រចាំនៅទីក្រុងកៀវ ឲ្យមកបំភ្លឺជុំវិញអ្វីដែលខ្លួនអះអាងថា ជាការចូលដៃរបស់ទីក្រុងប៉េកាំងក្នុងជម្លោះជាមួយរុស្ស៊ី។

រដ្ឋមន្ត្រីការបរទេសអ៊ុយក្រែន Andrey Sibiga បានចេញសេចក្តីថ្លែងការណ៍ថា ក្រសួងរបស់លោកទាមទារការពន្យល់ឲ្យច្បាស់ៗពីសំណាក់ភាគីចិន។ វាអាចធ្វើឲ្យខូចដល់ភាពជឿជាក់របស់ទីក្រុងប៉េកាំងក្នុងនាមជាសមាជិកអចិន្ត្រៃយ៍នៃក្រុមប្រឹក្សាសន្តិសុខអង្គការសហប្រជាជាតិ។

ជុំវិញរឿងនេះ ទាំងចិននិងរុស្ស៊ីសុទ្ធតែមិនទាន់និយាយអ្វីទាំងអស់ ហើយសូម្បីតែអាមេរិកដែលជាអ្នកគាំទ្រអ៊ុយក្រែន ក៏មិនទាន់មានប្រតិកម្មអ្វីដែរ។

តាំងពីដំបូងមក មានតែទាហានកូរ៉េខាងជើងប៉ុណ្ណោះ ដែលគេដឹងថា ត្រូវបញ្ជូនទៅជួយរុស្ស៊ី ប្រយុទ្ធនឹងអ៊ុយក្រែន។ ជាក់ស្តែង កាលពីដើមឆ្នាំនេះ ​មន្ត្រីលោកខាងលិច បានប្រាប់ សារ​ព័ត៌មាន​ BBC ថា ទាហានកូរ៉េខាងជើង ១ ០០០នាក់បានស្លាប់​ក្នុង​ការប្រយុទ្ធនៅតំបន់ Kursk ត្រឹមរយៈពេល៣ខែ។

មិនត្រឹមប៉ុណ្ណឹង ក៏មានសេចក្តីរាយការណ៍ដែរថា កូរ៉េខាងជើងបានបញ្ជូនទ័ពទៅជួយរុស្ស៊ីជាបន្តបន្ទាប់ទៀត ចំពេលទំនាក់ទំនងរវាងលោក វ្ល៉ាឌីមៀរ ពូទីន និង គីម ជុងអ៊ុន កាន់តែស្អិតរមួត៕

អត្ថបទ៖ សុខ សុវណ្ណ

ចុចអាន៖ រុស្ស៊ី ថា ពូទីន គាំទ្រពេញទំហឹង លើបទឈប់បាញ់ ពិបាកតែខាងអ៊ុយក្រែនទេ