រុស្ស៊ី ថា ពូទីន គាំទ្រពេញទំហឹង លើបទឈប់បាញ់ ពិបាកតែខាងអ៊ុយក្រែនទេ

កាលពីថ្ងៃចន្ទទី៧ខែមេសាឆ្នាំ២០២៥ វិមានក្រឹមឡាំងបានបញ្ជាក់យ៉ាងច្បាស់ថា រុស្ស៊ី បើកចំហជានិច្ចចំពោះកិច្ចពិភាក្សាអំពីបទឈប់បាញ់ពេញលេញដើម្បីបញ្ចប់សង្គ្រាមអ៊ុយក្រែន ហើយលោកប្រធា​នាធិបតី វ្ល៉ាឌីមៀរ ពូទីន ក៏គាំទ្ររឿងនេះយ៉ាងពេញទំហឹងផងដែរ ពិបាកតែខាងភាគីអ៊ុយក្រែន ទេ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សារព័ត៌មាន RT បានដកស្រង់សម្តីអ្នកនាំពាក្យវិមានក្រឹមឡាំង Dmitry Peskov ដែលនិយាយថា រុស្ស៊ីនៅតែគាំទ្រចំពោះបទឈប់បាញ់ ប៉ុន្តែរឿងនេះអាចកើតឡើងបានលុះត្រាតែភាគីអ៊ុយក្រែន គោរពវាដែរ។

ទន្ទឹមនោះឆ្លើយតបទៅការលើកឡើងរបស់ប្រធានាធិបតីអាមេរិក ដូណាល់​ ត្រាំ ដែលទាមទារឲ្យរុស្ស៊ីបញ្ឈប់ការវាយប្រហារនៅអ៊ុយក្រែន, លោក Peskov ​បង្ហាញជំហរយ៉ាងមុតមាំថា លោកពូទីន តែងគាំទ្រគំនិតនៃបទឈប់បាញ់ជានិច្ច ប៉ុន្តែជាដំបូង ត្រូវតែគោរពតាមលក្ខខណ្ឌដូចដែលរុស្ស៊ីធ្លាប់បង្ហាញសិន។

កាលពីខែមុន រុស្ស៊ីបានដាក់លក្ខខណ្ឌទៅអាមេរិករួចហើយ បើសិនជាចង់ឲ្យខ្លួនឈប់បាញ់ជាមួយអ៊ុយក្រែនហើយ ហើយលក្ខខណ្ឌនោះមាន៣ចំណុចដូចជា ១. គ្មានសមាជិកភាពណាតូសម្រាប់អ៊ុយក្រែន​ឡើយ ២. ត្រូវតែមានកិច្ចព្រមព្រៀងដើម្បីធានាថា គ្មានការដាក់ទ័ពបរទេសលើដីអ៊ុយក្រែន ៣. ត្រូវតែមានការទទួលស្គាល់ជាអន្តរជាតិចំពោះតំបន់គ្រីមៀ និងទឹកដី៤ទៀត ដែលរុស្ស៊ីកាត់យកពីអ៊ុយក្រែន។

យ៉ាងណា វាមិនមែនជារឿងថ្មីឡើយដែលរុស្ស៊ីដាក់លក្ខខណ្ឌបែបនេះ ព្រោះតាំងពីដំបូងមកម្ល៉េះ ដែលទីក្រុងមូស្គូតែងទាមទារដដែលជាដដែល ពិសេសគឺឲ្យអ៊ុយក្រែន ឈប់ស្រមៃនិងបោះចោលគំនិតក្លាយជាសមាជិកអង្គការណាតូទៅ។

ជុំវិញរឿងនេះដែរ ដោយមើលឃើញថា បទឈប់បាញ់នៅអ៊ុយក្រែន មានភាពជាប់គាំង, ប្រធានាធិបតីបារាំង អេម៉ាញូអែល ម៉ាក្រុង បានបញ្ចេញប្រតិកម្ម ដោយបង្ហោះសារលើបណ្តាញសង្គម X  ឲ្យអំពាវនាវ ប្រើធម៌ក្តៅលើរុស្ស៊ីតែម្តងទៅ បើលោក ពូទីន នៅតែមិនព្រមទទួលយកកិច្ចព្រមព្រៀងសន្តិភាពនោះ។

ការបង្ហោះសារដ៏ក្តៅគគុករបស់លោកម៉ាក្រុង គឺដោយសារតែមេដឹកនាំបារាំងរូបនេះ ខឹងសម្បាចំពោះសកម្មភាពរបស់លោកពូទីន ដែលថ្មីៗទើបបាញ់មីស៊ីល វាយប្រហារស្រុកកំណើតលោក ហ្សេលេនស្គី បង្កការបំផ្លិចបំផ្លាញធ្ងន់ធ្ងរបណ្តាលឲ្យមនុស្សចំនួន១៨នាក់ស្លាប់ ក្នុងនោះរួមមានទាំងកុមារ៩នាក់ផងដែរ ខណៈច្រើននាក់ទៀតរងរបួស៕

អត្ថបទ៖ សុខ សុវណ្ណ

ចុចអាន៖ ម៉ាក្រុង ទាមទារឲ្យប្រើធម៌ក្តៅលើរុស្ស៊ី បើពូទីន មិនព្រមឈប់បាញ់នៅអ៊ុយក្រែន