រលក​​រញ្ជួយដីកម្រិត ៤.៦រ៉ិចទ័រវាយប្រហារទីក្រុង Mandalay នៅ​មីយ៉ាន់​ម៉ា ជាថ្មីទៀត​​

​រលក​​​​នៃគ្រោះ​រញ្ជួយដី (aftershock) កម្រិតមធ្យមកម្រិត ៤.៦ រ៉ិចទ័រ បានវាយប្រហារចម្ងាយប្រហែល ៣.២ គីឡូម៉ែត្រ ភាគនិរតីនៃទីក្រុង Patheingyi ក្នុងទីក្រុង Mandalay ដែលជាទីក្រុងធំទីពីររបស់ប្រទេសមីយ៉ាន់ម៉ា នៅម៉ោងប្រហែល ១រសៀលកាលពីថ្ងៃព្រហស្បតិ៍។ នេះបើយោងតាមការចេញផ្សាយរបស់ The Irrawaddy កាលពីថ្ងៃទី១៧ខែមេសានេះ។

យោង​​​​នាយកដ្ឋាន​ឧតុនិយម និង​ជលសាស្ត្រ​របស់រដ្ឋាភិបាល​​របប​យោធា​​មីយ៉ាន់​ម៉ា​ផ្សាយ​​​កាលពី​ថ្ងៃ​ព្រហស្បតិ៍ ការរញ្ជួយដីនេះត្រូវបានគេមានអារម្មណ៍នៅក្នុងតំបន់ផ្សេងទៀតនៃទីក្រុង Mandalay ក៏ដូចជា Kyaukse, Sagaing និង Pyin Oo Lwin។

ការរញ្ជួយដីកម្រិតស្រាលសរុបចំនួន១៤០​​​លើក ត្រូវបានកត់ត្រាចាប់តាំងពីការរញ្ជួយដីកម្រិត ៧.៧ រ៉ិចទ័រកាលពីថ្ងៃទី២៨ខែមីនា ដែលបានបំផ្លាញផ្ទះជាង៦ម៉ឺន​ខ្នង និងអគារជាច្រើនពាន់ផ្សេងទៀតរួមទាំងសាលារៀន មន្ទីរពេទ្យ និងអគារការិយាល័យនៅក្នុងទីក្រុង Mandalay, Naypyitaw និង Sagaing។

រហូតមកដ់ពេលនេះចំនួនអ្នកស្លាប់ និងរបួសនៅក្នុងប្រទេសមីយ៉ាន់ម៉ា ប្រែប្រួលតាមប្រភពផ្សេងៗគ្នា។ បើតាម Mizzima News បានរាយការណ៍ថា អ្នកស្លាប់ចំនួន៥៣៥២នាក់ របួស៧១០៨នាក់ និងមនុស្សបាត់ខ្លួនចំនួន ៥៣៨នាក់។

យោងតាមទិន្នន័យដែលចងក្រងដោយសំឡេង​ប្រជាធិបតេយ្យភូមា មនុស្ស ៤៤១០នាក់បានស្លាប់ និង ១១៣៦៦ នាក់ទៀតបានរងរបួស។ អ្នកស្លាប់ទាំងនោះស្ថិតនៅក្នុងតំបន់ Mandalay, Naypyidaw, Sagaing, Shan, Bago, Magway និង Kayin ។

ជាមួយគ្នានេះឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបានប៉ាន់ប្រមាណថាជនជាតិភូមាជាង១៧ លាននាក់បានរងផលប៉ះពាល់នៅទូទាំង ៥៧នៃសង្កាត់ចំនួន៣៣០ ក្នុងប្រទេសមីយ៉ាន់ម៉ា។ គិតត្រឹមថ្ងៃទី ១០ ខែមេសា ក្រុមអ្នកជួយសង្គ្រោះបាននិយាយថា សាកសពរាប់សិបនាក់ ទំនងជានៅតែជាប់នៅក្រោមសំណង់ដែលបាក់រលំនៅឡើយ ដែលបង្កើនការព្រួយបារម្ភអំពីជំងឺអាសន្នរោគ និងជំងឺគ្រុនឈាម៕

អត្ថបទ៖ ប៊ុន សុភាព