ព័ត៌មានអន្ដរជាតិ

យោធាកូរ៉េខាងត្បូង រងការរិះគន់ខ្លាំង ក្រោយកើតមានឧបទ្ទវហេតុជាបន្តបន្ទាប់

បានផុស

១ year មុន

នៅ

ថ្ងៃចន្ទ ២១ មេសា ២០២៥

ដោយ

Chheang

យោធាកូរ៉េខាងត្បូង កំពុងប្រឈមមុខនឹងការរិះគន់ជាសាធារណៈ និងនយោបាយយ៉ាងខ្លាំង បន្ទាប់ពីឧបទ្ទវហេតុថ្មីៗនេះបានលាតត្រដាងនូវអ្វីដែលសមាជិកសភា និងអ្នកជំនាញកំពុងហៅថាជា «ការខ្វះខាតវិន័យ និងទំនុកចិត្ត» ដែលជាបញ្ហាចាក់ឫសយ៉ាងជ្រៅនៅក្នុងជួរយោធាដោះស្រាយមិនចេញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

យោងតាមការចុះផ្សាយនៅថ្ងៃទី២១ខែមេសារបស់សារព័ត៌មាន Korea Herald ក្នុងរយៈពេលប៉ុន្មានសប្តាហ៍កន្លងមកនេះ ឧបទ្ទវហេតុជាច្រើន បានកើតឡើងបន្តកន្ទុយគ្នា ដូចជា គ្រោះថ្នាក់រថក្រោះ (ស្លាប់ទាហានម្នាក់), ការបាញ់ខុសគោលដៅ (បណ្ដាលឲ្យឆេះឃ្លាំងស្តុកអាវុធ និងរបួសទាហាន២នាក់), បញ្ហាឧទ្ធម្ភាគចក្រ (ឧទ្ធម្ភាគចក្រមួយគ្រឿងដឹកទាហាន៦នាក់វិះនឹងធ្លាក់ក្រោយជួបបញ្ហាម៉ាស៊ីន ព្រោះកង្វះការថែទាំ), ការច្រឡំដៃទម្លាក់គ្រាប់បែក (បណ្ដាលឲ្យរបួសរាប់សិបនាក់មានទាំងទាហាននិងជនស៊ីវិល) និងឧបទ្ទវហេតុចុងក្រោយគឺការច្រឡំដៃទម្លាក់គ្រាប់កាំភ្លើង២គ្រាប់អំឡុងពេលហ្វឹកហាត់កាលពីថ្ងៃទី១៨ខែមេសា។

ហេតុការណ៍ទាំងនេះ បានបង្កឲ្យមានការព្រួយបារម្ភជាតិ និងអំពាវនាវឲ្យមានកំណែទម្រង់ឡើងវិញ។ មេដឹកនាំបក្សប្រឆាំង និងអ្នកវិភាគការពារជាតិ និយាយថា បញ្ហាឆ្លុះបញ្ចាំងពីកម្សោយជាប្រព័ន្ធក្នុងការគ្រប់គ្រងយោធា ស្តង់ដារបណ្តុះបណ្តាល និងការត្រួតពិនិត្យ។

សមាជិកម្នាក់នៃគណៈកម្មាធិការការពារជាតិនៃរដ្ឋសភា បានលើកឡើងថា៖ «វិន័យក្នុងជួរគឺជាមូលដ្ឋានគ្រឹះនៃការការពារជាតិ។ ការបរាជ័យម្តងហើយម្តងទៀតទាំងនេះ មិនមែនគ្រាន់តែជាគ្រោះថ្នាក់ប៉ុណ្ណោះទេ វាគឺជាសញ្ញានៃប្រព័ន្ធដែលត្រូវការកំណែទម្រង់ជាបន្ទាន់»។

ក្រសួងការពារជាតិ បានបើកការស៊ើបអង្កេតផ្ទៃក្នុង ប៉ុន្តែអ្នករិះគន់អះអាងថា ការធ្វើបែបនេះមិនគ្រប់គ្រាន់ឡើយ ដោយជារឿយៗគឺមានតែការដាក់ពិន័យតិចតួចប៉ុណ្ណោះជាជាងការផ្លាស់ប្តូររចនាសម្ព័ន្ធទាំងមូល៕