កូរ៉េខាងជើង ថា មីស៊ីលដែលបាញ់កាលពីម្សិលមិញជាការសាកល្បងប្រព័ន្ធអាវុធយុទ្ធសាស្ត្រថ្មី

ប្រព័ន្ធផ្សព្វផ្សាយរដ្ឋរបស់កូរ៉េខាងជើងបានបញ្ជាក់ពីការបាញ់មីស៊ីលចំនួន ២ គ្រាប់កាលពីថ្ងៃព្រហស្បតិ៍ដោយបានពណ៌នាថា វាជា “គ្រាប់មីស៊ីលយុទ្ធសាស្ត្រប្រភេទថ្មី និងទើបបង្កើតថ្មី” ។

ប្រព័ន្ធផ្សព្វផ្សាយរដ្ឋបាននិយាយថា ប្រព័ន្ធអាវុធនេះអាចផ្ទុកក្បាលគ្រាប់ដែលមានទម្ងន់ ២.៥ តោន ។ សេចក្តីរាយការណ៍បានបន្ថែមទៀតថា អាវុធនោះបានវាយប្រហារគោលដៅមួយយ៉ាងត្រឹមត្រូវនៅក្នុងដែនទឹកចម្ងាយ ៦០០ គីឡូម៉ែត្រខាងកើតឧបទ្វីបកូរ៉េ ។

ការព្យាករណ៍នេះគឺផ្ទុយជាមួយនឹងការប៉ាន់ស្មានដោយប្រទេសជប៉ុនដែលនិយាយថា គ្រាប់មីស៊ីលនេះហោះបានចម្ងាយប្រហែល ៤៥០ គីឡូម៉ែត្រ ។

ទន្ទឹមនោះប្រព័ន្ធផ្សព្វផ្សាយរដ្ឋក៏បានដកស្រង់សម្តីមន្ត្រីយោធាជាន់ខ្ពស់ម្នាក់ផងដែរដោយនិយាយថា ការបាញ់បង្ហោះនាពេលថ្មីៗនេះគឺជាការពង្រឹងអំណាចយោធារបស់ប្រទេស និងទប់ស្កាត់ការគំរាមកំហែងដែលមាននៅឧបទ្វីបកូរ៉េ ។ គេនៅមិនទាន់ច្បាស់ថាតើមេដឹកនាំកូរ៉េខាងជើង គីម ជុងអ៊ុន មានវត្តមានសម្រាប់ការបាញ់បង្ហោះនេះឬយ៉ាងណានោះទេ ។

នេះជាលើកទីមួយហើយក្នុងរយៈពេលជិតមួយឆ្នាំដែលកូរ៉េខាងជើងបានបាញ់មីស៊ីល Ballistic ហើយបានកើតឡើងតែប៉ុន្មានថ្ងៃប៉ុណ្ណោះ បន្ទាប់ពីគេរាយការណ៍ថាបានបាញ់មីស៊ីលរយៈចម្ងាយខ្លីចំនួន ២ គ្រាប់ ។

ក្នុងសន្និសីទសារព័ត៌មានផ្លូវការលើកដំបូងរបស់លោកប្រធានាធិបតីអាមេរិក ចូ បៃដិន បាននិយាយថា ការបាញ់បង្ហោះនៅថ្ងៃព្រហស្បតិ៍បានរំលោភលើបម្រាមរបស់ក្រុមប្រឹក្សាសន្តិសុខអង្គការសហប្រជាជាតិដែលមិនឲ្យទីក្រុងព្យុងយ៉ាងពីការបាញ់មីស៊ីល Ballistic ។

លោក បៃដិន បាននិយាយថា “យើងកំពុងពិគ្រោះយោបល់ជាមួយសម្ព័ន្ធមិត្ត និងដៃគូរបស់យើង ហើយវានឹងមានការឆ្លើយតបប្រសិនបើកូរ៉េខាងជើងជ្រើសរើសយកផ្លូវបង្ករឿង យើងនឹងឆ្លើយតបតាមនោះ” ៕

ប្រែសម្រួលដោយ ៖ ជីវ័ន្ត

ប្រភព ៖ NHK

ចុចអាន ៖ ចូ បៃដិន គំរាមសងសឹក គីម ជុងអ៊ុន បន្ទាប់ពីបាញ់មីស៊ីល

ចុចអាន ៖ កូរ៉េខាងជើង បាញ់មីស៊ីល Ballistic ២គ្រាប់ទៀតព្រឹកនេះ