អ្នកជំនាញការ​UN៖​តំបន់ហ្គាហ្សា​ប្រឈម​ការបំផ្លិចបំផ្លាញទាំងស្រុង​

អ្នកជំនាញរបស់អង្គការសហប្រជាជាតិ បានទាមទារឱ្យមានសកម្មភាពដើម្បីទប់ស្កាត់ការបំផ្លិចបំផ្លាញទាំងស្រុងទៅលើជនជាតិប៉ាឡេស្ទីននៅក្នុងតំបន់ហ្គាហ្សា ខណៈការវាយប្រហាររបស់អ៊ីស្រាអែលនៅ​លើទឹកដីប៉ាឡេស្ទីន​ទាំង​មូល​ បានសម្លាប់មនុស្សរាប់សិបនាក់បន្ថែមទៀត។

យោងតាមការចេញផ្សាយរបស់សារព័ត៌មាន​ Al Jazeera នៅថ្ងៃទី០៩ខែឧសភានេះ ការវាយលុករបស់យោធាអ៊ីស្រាអែល នាំទៅដល់​ការថ្កោលទោសជាអន្តរជាតិកាន់តែខ្លាំង ខណៈទីភ្នាក់ងារអង្គការសហប្រជាជាតិពីមុនបានព្រមានពីមហន្តរាយមនុស្សធម៌នៅក្នុងទឹកដីប៉ាឡេស្ទីន ដែលបានបំផ្លិចបំផ្លាញដោយសង្រ្គាមរយៈពេល១៩ខែរួចមកហើយ។

អ្នកជំនាញឯករាជ្យជាង២០នាក់ដែលត្រូវបានតែងតាំងដោយក្រុមប្រឹក្សាសិទ្ធិមនុស្សរបស់អង្គការសហប្រជាជាតិបាន​ឲ្យ​ដឹង​កាល​ពី​ថ្ងៃពុធថា ពិភពលោកប្រឈមនឹងការសម្រេចចិត្តដ៏រស៉ើប ដើម្បីគ្រប់គ្រងភាពអសកម្មនិងធ្វើជាសាក្សីលើការកាប់សម្លាប់មនុស្សស្លូតត្រង់ឬចូលរួមក្នុងការបង្កើតដំណោះស្រាយដ៏យុត្តិធម៌នៅតំបន់ហ្គាហ្សា។

ពាក់ព័ន្ធបញ្ហានេះប្រធានាធិបតីបារាំង លោក Emmanuel Macron កាលពីថ្ងៃពុធបានហៅស្ថានភាពនៅតំបន់ ហ្គាហ្សាថា ជា«ការបំផ្លាញដែលលោកមិនធ្លាប់ឃើញ»។ រីឯនាយករដ្ឋមន្ត្រីអេស្ប៉ាញ លោក Pedro Sanchez បាននិយាយថា នឹងស្នើ​សេចក្តីព្រាងសេចក្តីសម្រេចមួយនៅឯមហាសន្និបាតអង្គការសហប្រជាជាតិ ក្នុងគោលបំណង «ស្នើវិធាន​ការបន្ទាន់ ដើម្បីបញ្ឈប់ការសម្លាប់ជនស៊ីវិលស្លូតត្រង់ និងធានាការផ្តល់ជំនួយមនុស្សធម៌» នៅក្នុងតំបន់ហ្គាហ្សា។ ចំណែកនាយករដ្ឋមន្ត្រីអង់គ្លេស លោក Keir Starmer បានប្រាប់សភាថា ស្ថានភាពនៅក្នុងតំបន់ហ្គាហ្សា និងតំបន់ West Bank គឺ «កាន់តែមិនអាចអត់ឱនឲ្យបាន»។

គួរបញ្ជាក់ថា ជនជាតិប៉ាឡេស្ទីនជាង១១០​នាក់ត្រូវបានសម្លាប់ដោយការវាយប្រហាររបស់អ៊ីស្រាអែលនៅតំបន់ហ្គាហ្សាកាលពីថ្ងៃព្រហស្បតិ៍ ខណៈមនុស្ស១០០ នាក់ត្រូវបានសម្លាប់កាលពីថ្ងៃពុធភាគច្រើនគឺជាកុមារ។

ទន្ទឹមនឹងនេះដែរ World Central Kitchen (WCK) ដែលដំណើរការហាងនំប៉័ងចុងក្រោយតែមួយដែលនៅតែដំណើរការនៅក្នុងតំបន់ហ្គាហ្សាបានប្រកាសថា ខ្លួនមិនមានការផ្គត់ផ្គង់ការចម្អិនអាហារ ឬធ្វើនំប៉័ងនៅហ្គាហ្សាទៀតទេ៕

អត្ថបទ៖ ប៊ុន សុភាព