ព័ត៌មានអន្ដរជាតិ

តៃវ៉ាន់កត់ត្រាការកើនឡើងសកម្មភាពយោធាដ៏សម្បើមរបស់ចិន រួមទាំងនាវាផ្ទុកយន្តហោះ

បានផុស

២៥ វិនាទី មុន

នៅ

ថ្ងៃចន្ទ ២ មិថុនា ២០២៥

ដោយ

តៃវ៉ាន់បានលាតត្រដាងថា ចិនបានដាក់ពង្រាយក្រុមនាវាផ្ទុកយន្តហោះពីរក្រុម នាវាកងទ័ពជើងទឹក រួមទាំងយន្តហោះរហូតដល់ជាង៧០គ្រឿងនៅជុំវិញកោះនេះចន្លោះពីថ្ងៃទី ១ ដល់ថ្ងៃទី ២៧ឧសភា ដែលជាការសម្ញែងកម្លាំងយោធាដ៏ខ្លាំងក្លាបំផុតមួយរបស់ទីក្រុងប៉េកាំងក្នុងរយៈពេលចុងក្រោយនេះ។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី០២ខែមិថុនានេះ។

នាយកផ្ទុកយន្តហោះរបស់ចិនក្នុងសមុទ្រចិនភាគខាងត្បូង។ រូបភាព៖ Reuters

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីសន្តិសុខតៃវ៉ាន់ម្នាក់ ដែលនិយាយដោយលក្ខខណ្ឌមិនបញ្ចេញឈ្មោះ បានពណ៌នាទំហំប្រតិបត្តិការរបស់ចិន ពីសមុទ្រលឿង ដល់សមុទ្រចិនខាងត្បូងថា ជា «ការបង្កហេតុជាងពីមុន»។ បន្ថែមពីលើការដាក់ពង្រាយនាវាតាមសមុទ្រ យន្តហោះយោធាចំនួន ៧៥គ្រឿងបានល្បាតប្រយុទ្ធនៅជិតកោះតៃវ៉ាន់ ហើយនាវាចិនជាច្រើនគ្រឿងដែលមិនមានសញ្ញាសម្គាល់ត្រូវបានគេរកឃើញនៅជិតប្រជុំកោះ Penghu ដែលជាប្រជុំកោះតៃវ៉ាន់។

នាវាចិនមួយចំនួន តាមសេចក្តីរាយការណ៍ បានឆ្លងកាត់ច្រកសមុទ្រកោះ Miyako ប្រទេសជប៉ុនចូលទៅក្នុងមហាសមុទ្រប៉ាស៊ីហ្វិកខាងលិច ដើម្បីធ្វើការហ្វឹកហ្វឺនរយៈចម្ងាយឆ្ងាយ និងសមយុទ្ធដែនអាកាសរួមគ្នា។ តៃវ៉ាន់មើលឃើញថាសកម្មភាពទាំងនេះជាផ្នែកមួយនៃយុទ្ធសាស្ត្រទូលំទូលាយរបស់ចិនក្នុងការបំភិតបំភ័យកោះតៃវ៉ាន់។

ការកើនឡើងនេះបានកើតឡើងស្របពេលជាមួយនឹងខួបលើកទីមួយរបស់ប្រធានាធិបតីតៃវ៉ាន់ លោក Lai Ching-te ក្នុងការឡើងកាន់អំណាច និងមុនវេទិកាសន្តិសុខថ្នាក់តំបន់ដ៏សំខាន់មួយនៅក្នុងប្រទេសសិង្ហបុរី។

សម្ពាធយោធាដែលកំពុងកើនឡើងនេះ បន្ថែមទៅលើភាពតានតឹងឆ្លងច្រកសមុទ្រដែលងាយនឹងបង្កជាហេតុរួចទៅហើយ ខណៈដែលទីក្រុងប៉េកាំងនៅតែបន្តបដិសេធអធិបតេយ្យភាពរបស់តៃវ៉ាន់ និងបដិសេធមិនព្រមដកកម្លាំងដើម្បីអះអាងការគ្រប់គ្រងលើកោះនេះ៕