រុស្ស៊ី បន្តសងសឹកអ៊ុយក្រែនចាស់ដៃ, លើកនេះបញ្ជូនដ្រូនវាយប្រហារដល់ទៅជិត ៥០០គ្រឿង 

រុស្ស៊ីបានបើកការវាយប្រហារដែនអាកាសទ្រង់ទ្រាយធំបំផុតមួយនៅទូទាំងប្រទេសអ៊ុយក្រែន ដោយបញ្ជូនដ្រូនចំនួន៤៧៩គ្រឿងមកបាញ់សន្ធាប់ យ៉ាងចាស់ដៃ។ នេះបើតាមការចុះផ្សាយដោយសារព័ត៌មាន ABC News នៅថ្ងៃចន្ទទី៩ខែមិថុនាឆ្នាំ២០២៥។ 

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការវាយប្រហារនេះ ត្រូវបានបញ្ជាក់ពីកងទ័ពអាកាសអ៊ុយក្រែន ហើយវាត្រូវបានគេដឹងច្បាស់ថា ជាការសងសឹករបស់លោកប្រធានាធិបតី វ្ល៉ាឌីមៀរ ពូទីន ចំពោះប្រតិបត្តិការ «សំណាញ់ពីងពាង» របស់អ៊ុយក្រែន ដែលាបាញ់កម្ទេចយន្តហោះចម្បាំងរុស្ស៊ីច្រើនគ្រឿង នៅមូលដ្ឋានទ័ព ៥កន្លែង។

យ៉ាងណាក្តី កងទ័ពអាកាសអ៊ុយក្រែន បានអះអាងបាញ់ទម្លាក់ដ្រូនរុស្ស៊ីចំនួន២៩២គ្រឿង ចំណែកឯប្រទេសប៉ូឡូញឯណោះ ក៏បានចល័តយន្តហោះច្រើនគ្រឿងផងដែរ ព្រោះស្ថានការណ៍តានតឹង។

ភ្លាមៗ គេមិនទាន់ដឹងទេថាតើមានជនរងគ្រោះឬក៏អត់ ឬថាតើមានការខូចខាតហេដ្ឋារចនាសម្ព័ន្ធអ្វីខ្លះ?

នេះគឺជាការសងសឹកចាស់ដៃថ្មីទៀតរបស់លោកពូទីន បន្ទាប់ពីរុស្ស៊ី ក៏បើកការវាយប្រហារទ្រង់​ទ្រាយធំផងដែរកាលពីចុងសប្តាហ៍កន្លងទៅ ដោយសម្លាប់មនុស្ស៤នាក់ និងជាង២០នាក់រងរបួស នៅទូទាំងប្រទេសអ៊ុយក្រែន។

ក្រោយការវាយប្រហារនោះ ប្រធានាធិបតីអាមេរិក ដូណាល់ ត្រាំ ស្រាប់តែបញ្ចេញប្រតិកម្មខ្លាំងៗថា ប្រតិបត្តការ «សំណាញ់​ពីងពាង» នោះ ធ្វើឲ្យលោក ពូទីន បានលេស យកទៅ​បង្ក​ជា​សង្គ្រាម​ធំ។

សូមជម្រាបជាថ្មី នៅ​ក្នុង​ប្រតិបត្តិការ​«សំណាញ់​ពីងពាង» អ៊ុយក្រែន បានបើកការវាយប្រហារដោយ​ប្រើ​​ដ្រូនចំនួន ១១៧​គ្រឿង មាន​គោលបំណង​បំផ្លាញ​សមត្ថភាព​យន្តហោះ​ទម្លាក់​គ្រាប់បែក​រយៈ​ចម្ងាយ​ឆ្ងាយ​របស់​រុស្ស៊ី។ អ៊ុយក្រែនអះអាងថា ការវាយប្រហារបានបំផ្លាញ ឬ​ធ្វើ​ឲ្យ​ខូចខាតយ៉ាងធ្ងន់ធ្ងរ​ដល់​យន្តហោះ​ចម្បាំង​ជា​ច្រើន​គ្រឿង​របស់​ក្រុង​មូស្គូ ក្នុង​នោះ​​មាន​យន្តហោះទម្លាក់គ្រាប់បែក Tu-95, Tu-22M និង Tu-160 ក៏ដូចជាយន្តហោះឈ្លបការណ៍ A-50។ ការ​ខូច​ខាត​គិត​ជា​ទឹក​ប្រាក់​ប្រមាណ ​៧​ពាន់​លាន​ដុល្លារ៕

អត្ថបទ៖ សុខ សុវណ្ណ

ចុចអាន៖ អ្នក​ស្លាប់ព្រោះ​រុស្ស៊ី​វាយ​សងសឹក​អ៊ុយក្រែន​កើន​ឡើង​ដល់៦នាក់ ខណៈ​របួស​មាន​៨០​នាក់