ព័ត៌មានអន្ដរជាតិ

អ៊ីរ៉ង់ប្រកាសសងសឹកយ៉ាងចាស់ដៃបំផុតលើអ៊ីស្រាអែល និងអាមេរិក

បានផុស

១ year មុន

នៅ

ថ្ងៃសុក្រ ១៣ មិថុនា ២០២៥

ដោយ

Chheang

ក្រោយរងការវាយប្រហារទៅលើទីតាំងនុយក្លេអ៊ែរនិងយោធារបស់ខ្លួន អ៊ីរ៉ង់បានប្រកាសថានឹងឆ្លើយតបយ៉ាងចាស់ដៃលើអ៊ីស្រាអែល ក៏ដូចជាសហរដ្ឋអាមេរិកដែលជាសម្ព័ន្ធមិត្តយ៉ាងជិតស្និទ្ធរបស់អ៊ីស្រាអែល។ នេះបើយោងតាមការចុះផ្សាយរបស់សារព័ត៌មាន Iran Wire នៅថ្ងៃសុក្រទី១៣ខែមិថុនាឆ្នាំ២០២៥។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Abolfazl Shekarchi អ្នកនាំពាក្យរបស់កងកម្លាំងអ៊ីរ៉ង់ បាននិយាយថា «អ៊ីស្រាអែល និងអាមេរិក នឹងរងការវាយប្រហារយ៉ាងខ្លាំងក្លា»។ លោកបានបន្ថែមថា «ប្រជាជនអ៊ីរ៉ង់មិនគួរបារម្ភទេ។ សត្រូវអ៊ីស្រាអែលដោយមានការជួយពីអាមេរិក បានចាត់សកម្មភាព ហើយវាយប្រហារលើតំបន់លំនៅឋាន។ អ៊ីស្រាអែលនឹងត្រូវទទួលការសងសឹកយ៉ាងចាស់ដៃ និងត្រូវតែរំពឹងថានឹងរងសកម្មភាពធ្ងន់ធ្ងរពីកងកម្លាំងប្រដាប់អាវុធ(អ៊ីរ៉ង់) ហើយការឆ្លើយតបនេះច្បាស់ណាស់នឹងកើតមានជាក់ជាមិនខាន»។

អ៊ីស្រាអែល បានបើកប្រតិបត្តិការ «Rising Lion» វាយប្រហារតាមអាកាសលើប្រទេសអ៊ីរ៉ង់ ហើយលោកនាយករដ្ឋមន្ត្រី បេនចាមីន ណេតាន់យ៉ាហ៊ូ បានអះអាងថា ចំណាត់ការនេះ នឹងបន្តធ្វើក្នុងរយៈពេលជាច្រើនថ្ងៃទៅមុខទៀត ដរាបណាលែងមានការគំរាមកំហែងនុយក្លេអ៊ែរ និងយោធាពីទីក្រុងតេហេរ៉ង់។ ប្រព័ន្ធផ្សព្វផ្សាយរដ្ឋអ៊ីរ៉ង់ បានបញ្ជាក់ពីការស្លាប់មេបញ្ជាការឆ្មាំបដិវត្តឥស្លាមលោក Hossein Salami និងមេទ័ពកំពូលៗច្រើននាក់ផ្សេងទៀត។

លោក ណេតាន់យ៉ាហ៊ូ បានព្រមានថា អ៊ីរ៉ង់មានផ្ទុកសារធាតុអ៊ុយរ៉ាញ៉ូមកម្រិតខ្ពស់គ្រប់គ្រាន់សម្រាប់អាវុធនុយក្លេអ៊ែរជាច្រើន ហើយកំពុងជំរុញសមត្ថភាពមីស៊ីលរបស់ខ្លួនក្នុងអត្រាគួរឲ្យព្រួយបារម្ភ។

យ៉ាងណាមិញ សហរដ្ឋអាមេរិកដែលជាដៃគូដ៏ល្អរបស់អ៊ីស្រាអែល បានចេញមុខបញ្ជាក់ថា ខ្លួនពុំមានការជាប់ពាក់ព័ន្ធនឹងការវាយប្រហារមួយនេះឡើយ ពោលគឺសកម្មភាពនេះជាប្រតិបត្តិការឯកតោភាគីរបស់អ៊ីស្រាអែលប៉ុណ្ណោះ។ រដ្ឋមន្ត្រីការបរទេសអាមេរិកលោក Marco Rubio បានព្រមានថា អ៊ីរ៉ង់មិនគួរកំណត់គោលដៅលើផលប្រយោជន៍ ឬបុគ្គលិករបស់អាមេរិកឡើយ៕

ដោយ៖ ឈាង

ចុចអាន៖ ណេតាន់យ៉ាហ៊ូ៖ ប្រតិបត្តិការវាយអ៊ីរ៉ង់ នឹងធ្វើជាច្រើនថ្ងៃ ទាល់តែទទួលជោគជ័យ