ព័ត៌មានអន្ដរជាតិ

ណេតាន់យ៉ាហ៊ូ៖ ប្រតិបត្តិការវាយអ៊ីរ៉ង់ នឹងធ្វើជាច្រើនថ្ងៃ ទាល់តែទទួលជោគជ័យ

បានផុស

១ year មុន

នៅ

ថ្ងៃសុក្រ ១៣ មិថុនា ២០២៥

ដោយ

Chheang

នាយករដ្ឋមន្ត្រីអ៊ីស្រាអែល លោក បេនចាមីន ណេតាន់យ៉ាហ៊ូ បានប្រកាសថា យុទ្ធនាការវាយប្រហារតាមអាកាសប្រឆាំងនឹងអ៊ីរ៉ង់ ដែលហៅថាប្រតិបត្តិការ «Rising Lion» នឹងបន្តក្នុងរយៈពេលជាច្រើនថ្ងៃទៀត ដរាបណាអាចបន្សាបការគំរាមកំហែងនុយក្លេអ៊ែរ និងយោធារបស់ទីក្រុងតេហេរ៉ង់បាន។

លោក បេនចាមីន ណេតាន់យ៉ាហ៊ូ (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

នៅក្នុងសុន្ទរកថាតាមទូរទស្សន៍នៅព្រឹកថ្ងៃសុក្រ លោក ណេតាន់យ៉ាហ៊ូ បានគូសបញ្ជាក់អំពីគោលបំណងរបស់បេសកកម្មនេះថា គឺដើម្បីរុះរើហេដ្ឋារចនាសម្ព័ន្ធនុយក្លេអ៊ែររបស់អ៊ីរ៉ង់ ទីតាំងមីស៊ីលបាលិស្ទិក និងបុគ្គលិកយោធាជាន់ខ្ពស់។ លោកបានថ្លែងថា «មុននេះ អ៊ីស្រាអែលបានបើកប្រតិបត្តិការ Rising Lion ជាប្រតិបត្តិការយោធាដែលមានគោលដៅដើម្បីបញ្ចៀសការគំរាមកំហែងរបស់អ៊ីរ៉ង់ចំពោះការរស់រានមានជីវិតរបស់អ៊ីស្រាអែល»។

លោកបានសង្កត់ធ្ងន់ថា អ៊ីរ៉ង់មានកម្មវិធីអភិវឌ្ឍន៍អាវុធនុយក្លេអ៊ែរ ហើយនឹងអាចផលិតអាវុធនុយក្លេអ៊ែរបាន ប្រសិនបើដំណើរការនេះមិនត្រូវបានបញ្ឈប់។

លោកបានបញ្ជាក់បន្ថែមទៀតថា «ប្រតិបត្តិការនេះនឹងបន្តដរាបណាចាំបាច់ រហូតដល់យើងបញ្ចប់បេសកកម្ម»។ មេដឹកនាំអ៊ីស្រាអែល បានរៀបរាប់ថា «យើងវាយប្រហារកម្មវិធីអាវុធនុយក្លេអ៊ែររបស់អ៊ីរ៉ង់។ យើងបានកំណត់គោលដៅលើរោងចក្រចម្រាញ់(អ៊ុយរ៉ាញូម)ដ៏សំខាន់របស់ប្រទេសអ៊ីរ៉ង់នៅទីក្រុង Natanz។ យើងបានកំណត់គោលដៅអ្នកវិទ្យាសាស្ត្រនុយក្លេអ៊ែរអ៊ីរ៉ង់ ដែលកំពុងធ្វើការលើគ្រាប់បែកអ៊ីរ៉ង់។ យើងក៏បានវាយប្រហារចំផ្នែកដ៏សំខាន់នៃកម្មវិធីមីស៊ីលបាលិស្ទិករបស់អ៊ីរ៉ង់ផងដែរ»។

លោកនាយករដ្ឋមន្ត្រី បានចាត់ទុកយុទ្ធនាការនេះថាជាកិច្ចខិតខំប្រឹងប្រែងដ៏ចាំបាច់មួយ ដើម្បីបញ្ឈប់នូវអ្វីដែលលោកបានពិពណ៌នាថាជាការគំរាមកំហែងដែលមានស្រាប់។ លោក ណេតាន់យ៉ាហ៊ូ បានព្រមានថា អ៊ីរ៉ង់មានផ្ទុកសារធាតុអ៊ុយរ៉ាញ៉ូមកម្រិតខ្ពស់គ្រប់គ្រាន់សម្រាប់អាវុធនុយក្លេអ៊ែរជាច្រើន ហើយកំពុងជំរុញសមត្ថភាពមីស៊ីលរបស់ខ្លួនក្នុងអត្រាគួរឲ្យព្រួយបារម្ភ។

រហូតមកដល់ពេលនេះ យន្តហោះចម្បាំងអ៊ីស្រាអែលបានវាយប្រហារគោលដៅជាច្រើន រួមទាំងកន្លែងនុយក្លេអ៊ែរនៅ Natanz រោងចក្រមីស៊ីលបាលិស្ទិក និងទីតាំងរបស់មេបញ្ជាការជាន់ខ្ពស់ និងការបញ្ជាក់អំពីការផ្ទុះនៅក្នុងទីក្រុងតេហេរ៉ង់។

រដ្ឋមន្ត្រីការពារជាតិអ៊ីស្រាអែល លោក Israel Katz បានប្រកាសដាក់ប្រទេសក្នុងគ្រាអាសន្ន ដោយព្រមានអំពីការវាយប្រហារសងសឹករបស់អ៊ីរ៉ង់ ដែលជិតមកដល់សំដៅលើតំបន់យោធា និងជនស៊ីវិលនៅទូទាំងប្រទេសអ៊ីស្រាអែល។

ទន្ទឹមនោះ រដ្ឋមន្ត្រីការបរទេសអាមេរិក លោក Marco Rubio បាននិយាយថា រដ្ឋាភិបាលក្រុងវ៉ាស៊ីនតោនមិនបានជាប់ពាក់ព័ន្ធនៅក្នុងការវាយប្រហារយោធារបស់អ៊ីស្រាអែលប្រឆាំងនឹងអ៊ីរ៉ង់ឡើយ។ ប្រមុខការទូតកំពូលរបស់អាមេរិក បានពណ៌នាអំពីការវាយប្រហាររបស់អ៊ីស្រាអែលថាជា «សកម្មភាពឯកតោភាគីដែលបានធ្វើឡើងក្នុងការការពារខ្លួន» ហើយបានសង្កត់ធ្ងន់ថា «សហរដ្ឋអាមេរិកមិនជាប់ពាក់ព័ន្ធក្នុងមធ្យោបាយ រូបរាង ឬទម្រង់ណាមួយក្នុងការរៀបចំផែនការ ឬប្រតិបត្តិប្រតិបត្តិការទាំងនោះទេ។ ខ្ញុំសូមបញ្ជាក់ឲ្យច្បាស់៖ អ៊ីរ៉ង់មិនគួរកំណត់គោលដៅផលប្រយោជន៍ ឬបុគ្គលិករបស់សហរដ្ឋអាមេរិកឡើយ»៕

ដោយ៖ ឈាង

ចុចអាន៖ មេឆ្មាំបដិវត្តអ៊ីរ៉ង់និងមេទ័ពកំពូលៗច្រើននាក់ ស្លាប់ក្នុងការវាយប្រហាររបស់អ៊ីស្រាអែល