ព័ត៌មានអន្ដរជាតិ

អ៊ីស្រាអែល ជះលុយអស់ជាង ២០០លានដុល្លាររាល់ថ្ងៃ ដើម្បីធ្វើសង្គ្រាមជាមួយអ៊ីរ៉ង់

បានផុស

១ year មុន

នៅ

ថ្ងៃសៅរ៍ ២១ មិថុនា ២០២៥

ដោយ

Chheang

ជារៀងរាល់ថ្ងៃ អ៊ីស្រាអែល កំពុងជះលុយយ៉ាងច្រើនសន្ធឹកប្រមាណជា ២០០លានដុល្លារ ទៅ ២៨៥លានដុល្លារ ឬអាចហក់ឡើងដល់ ៧២៥លានដុល្លារ នៅពេលរាប់បញ្ចូលការចំណាយបន្ទាប់បន្សំផ្សេងទៀត នៅក្នុងជម្លោះដ៏ក្ដៅគគុករបស់ខ្លួនជាមួយប្រទេសអ៊ីរ៉ង់។ នេះបើយោងតាមរបាយការណ៍ដែលចុះផ្សាយដោយ The Wall Street Journal កាលពីថ្ងៃសុក្រទី២០ខែមិថុនាឆ្នាំ២០២៥។

ខែលការពារដែនអាកាសរបស់អ៊ីស្រាអែល (រូបថត៖ Reuters)

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការចំណាយភាគច្រើន ធ្វើឡើងសម្រាប់ប្រព័ន្ធការពារមីស៊ីលដែលមានតម្លៃថ្លៃ ដូចជា Arrow 3 មានតម្លៃប្រហែល ៤លានដុល្លារក្នុងការបាញ់ស្ទាក់ចាប់មីស៊ីលមួយគ្រាប់ ខណៈ David’s Sling និង Arrow 2 មានតម្លៃចន្លោះពី ៧០ម៉ឺនដុល្លារ ទៅ ៤លានដុល្លារក្នុងការបាញ់ម្ដង។ មីស៊ីលមិនតិចជាង ៤០០គ្រាប់នោះទេ ដែលត្រូវអ៊ីរ៉ង់ផ្លោងដាក់អ៊ីស្រាអែល បើគិតចាប់ពីសង្គ្រាមបានផ្ទុះឡើងកាលពីថ្ងៃសុក្រសប្ដាហ៍មុន។

ការចំណាយផ្សេងៗទៀតរបស់អ៊ីស្រាអែល មានដូចជា ថ្លៃឥន្ធនៈ ការដាក់ពង្រាយយន្តហោះចម្បាំង គ្រាប់បែក និងការដឹកជញ្ជូន។ ជាឧទាហរណ៍ជាក់ស្ដែង គ្រាន់តែថ្លៃចំណាយហោះហើររបស់យន្តហោះចម្បាំង F-35 ក្នុងរយៈពេល១ម៉ោង អ៊ីស្រាអែលត្រូវខាតបង់លុយអស់ ១០ ០០០ដុល្លារ។

វិទ្យាស្ថាន Aaron សម្រាប់គោលនយោបាយសេដ្ឋកិច្ច បានប៉ាន់ប្រមាណថា បើសង្រ្គាមអូសបន្លាយដល់រយៈពេលមួយខែ នោះវាអាចធ្វើឲ្យអ៊ីស្រាអែលខាតបង់ប្រាក់ចំនួន ១២ពាន់លានដុល្លារ។ សេដ្ឋវិទូអ៊ីស្រាអែល លោក Zvi Eckstein បាននិយាយថា «សង្រ្គាមនេះមានតម្លៃថ្លៃជាង(សង្គ្រាមនៅ)ហ្គាហ្សា ឬហេសបូឡា។ គ្រាប់រំសេវ ការការពារ និងការវាយលុក គឺជាការចំណាយដ៏ធំធេង»៕

ដោយ៖ ឈាង