ព័ត៌មានអន្ដរជាតិ

តុលាការធម្មនុញ្ញថៃបើកផ្លូវឲ្យផែថងថានសុំពន្យាពេល ប៉ុន្តែ NACC ត្រៀមចាត់វិធានការបន្ត

បានផុស

១០ ខែ មុន

នៅ

ថ្ងៃអង្គារ ១៥ កក្កដា ២០២៥

ដោយ

រហូតមកដល់ពេលនេះ មិនទាន់មានសេចក្តីរាយការណ៍ជាសាធារណៈណាមួយដែលបានអះអាងថា នាយករដ្ឋមន្រ្តី ផែថងថាន ស៊ីណាវ៉ាត្រ បានស្នើសុំពន្យាពេលសម្រាប់ការដាក់ការឆ្លើយបញ្ជាក់ទៅកាន់តុលាការធម្មនុញ្ញដែលបានសម្រេចព្យួរតំណែងតួនាទីរបស់លោកស្រីនោះទេ បើទោះបីជាលោកស្រីមានសិទ្ធិស្នើសុំពន្យាពេលក៏ដោយ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមសេចក្តីរាយការណ៍របស់ សារព័ត៌មាន បាងកកប៉ុស្តិ៍ នៅថ្ងៃទី១៥ខែកក្កដានេះ ប្រធានតុលាការធម្មនុញ្ញលោក Nakharin Mektrairat បានអះអាងថា លោកស្រី ផែថងថាន អាចស្នើពន្យាពេលដើម្បីដាក់ការឆ្លើយការពាររបស់ខ្លួនក្នុងសំណុំរឿងរំលោភបទដ្ឋានរដ្ឋធម្មនុញ្ញនេះ។

មានសេចក្តីរាយការណ៍ថា លោកស្រី ផែថងថាន នឹងស្នើសុំពន្យាពេលឲ្យបានយូរបំផុតក្នុងបណ្តឹងប្រឆាំងនឹងលោកស្រី ដើម្បីមានពេលវេលាគ្រប់គ្រាន់ធ្វើសកម្មភាព ទាញទំនុកចិត្តពីសាធារណៈជន លើរដ្ឋាភិបាលរបស់លោកស្រី ប៉ុន្តែ នាយករដ្ឋមន្ត្រី ផែថងថាន ក៏ត្រូវប្រឈម នឹងបណ្តឹងដូចគ្នានេះ ដែលត្រូវស៊ើបអង្កេតដោយ គណៈកម្មការប្រឆាំងអំពើពុករលួយជាតិ (NACC)។

NACC នៅថ្ងៃទី១៤ខែកក្កដានេះ បានបោះឆ្នោតជាឯកច្ឆន្ទៈទទួលយកបណ្តឹងរបស់ព្រឹទ្ធសមាជិក៣៦រូបដែលបានដាក់ពាក្យប្តឹងលោកស្រី ផែថងថាន ស៊ីណាវ៉ាត្រ ដោយចោទប្រកាន់ពីប្រព្រឹត្តប្រាសចាកបទដ្ឋានរដ្ឋធម្មនុញ្ញ និង ខ្វះសុចរិតភាព។ ការទទួលយករបស់ NACC គឺនៅពេលត្រឹមតែ២ថ្ងៃប៉ុណ្ណោះ មុនពេលដែលលោកស្រី ផែថងថាន ត្រូវដាក់ការឆ្លើយបញ្ជាក់ទៅកាន់តុលាការធម្មនុញ្ញ។

ស្របគ្នានេះដែរ សេចក្តីរាយការណ៍របស់សារព័ត៌មាន The Nation បានអះអាងថា លោកស្រីផែថងថាន នឹងប្រើប្រាស់សិទ្ធិរបស់ខ្លួនស្នើសុំពន្យាពេលឲ្យបានកាន់តែយូរបំផុតតាមការកំណត់របស់ច្បាប់ ដើម្បីទាញពេលវេលាឲ្យបានយូរសម្រាប់ការស្តារទំនុកចិត្តពីសាធារណៈជនវិញ។

ក្នុងករណីមានការស្នើសុំពន្យាពីលោកស្រី ផែថងថាន កាលបរិច្ឆេទចុងក្រោយបន្ទាប់សម្រាប់ការឆ្លើយបញ្ជាក់របស់លោកស្រី គឺនៅថ្ងៃទី៣១ខែកក្កដា។

ក្នុងពេលដែលតុលាការធម្មនុញ្ញសម្រេចព្យួរតួនាទីនាយករដ្ឋមន្ត្រី របស់លោកស្រីកាលពីថ្ងៃទី១ខែកក្កដា លោកស្រី បានឆ្លើយនឹងអ្នកសារព័ត៌មានថា លោកស្រីនឹងប្រើប្រាស់ពេលវេលា១៥ថ្ងៃដែលនឹងផុតកំណត់នៅថ្ងៃទី១៦ខែកក្កដា ឆ្លើយបំភ្លឺជាមួយតុលាការ។

នៅពេលដែលការដាក់ពាក្យឆ្លើយបំភ្លឺបានទៅដល់ដៃតុលាការធម្មនុញ្ញ ក្រុមសមាជិកព្រឹទ្ធសភាដែលដាក់ពាក្យប្តឹងនោះ នឹងមានពេល១៥ថ្ងៃដើម្បីឆ្លើយតប ហើយការសម្រេចរបស់តុលាការត្រូវបានគេរំពឹងទុកថា នឹងធ្វើឡើងក្នុងពេលណាមួយក្នុងរយៈពេល៦០ថ្ងៃចាប់ពីថ្ងៃព្យួរតួនាទីកាលថ្ងៃទី១ខែកក្កដានោះមក៕

រ៉ាន់ រើយ