របាយការណ៍៖ ក្រុមហ៊ុនចិនជួយផ្គត់ផ្គង់គ្រាប់បែកយោធាមីយ៉ាន់ម៉ា

យោងតាមការចេញផ្សាយរបស់ DW News របាយការណ៍ថ្មីមួយធ្វើឡើងដោយក្រុមប្រឹក្សាពិសេសសម្រាប់មីយ៉ាន់ម៉ា (SAC-M) អះអាងថា ក្រុមហ៊ុនរដ្ឋចិន China South Industries Corporation កំពុងជួយរបបយោធាមីយ៉ាន់ម៉ាផលិតគ្រាប់បែកពីលើអាកាសដែលប្រើក្នុងការវាយប្រហារប្រឆាំងនឹងពួកឧទ្ទាម និងជនស៊ីវិល។

បើតាមរបាយការណ៍ SAC-M ហៅថា Factory of Death និយាយថា ក្រុមហ៊ុនចិន កំពុងជួយយោធាមីយ៉ាន់ម៉ា ប្រព្រឹត្តការរំលោភសិទ្ធិមនុស្ស។ អតីតមន្ត្រីអង្គការសហប្រជាជាតិ ដែលបានសរសេររបាយការណ៍នេះ បាននិយាយថា ការគាំទ្ររបស់ប្រទេសចិន កំពុងធ្វើឱ្យជីវិតជនស៊ីវិលកាន់តែយ៉ាប់យ៉ឺន និងរារាំងកិច្ចខិតខំប្រឹងប្រែងដើម្បីសន្តិភាព។

គ្រាប់បែក​ទាំងនោះ​ផលិត​នៅ​រោងចក្រ​អាវុធ​មួយ​ឈ្មោះ DI 21 ក្នុង​ទីក្រុង Magway ដោយ​មាន​ជំនួយ​ពី​វិស្វករ​ចិន។ ប្រទេសចិនក៏ផ្តល់ការបណ្តុះបណ្តាល គ្រឿងបន្លាស់គ្រាប់បែក និងជំនួយបច្ចេកទេសផងដែរ។

ចាប់តាំងពីយោធាបានឡើងកាន់អំណាចក្នុងឆ្នាំ ២០២១ កងទ័ពមីយ៉ាន់ម៉ាបានបាត់បង់ការគ្រប់គ្រងលើតំបន់ជាច្រើន ក្នុងប្រទេស ហើយឥឡូវនេះប្រើប្រាស់ការវាយប្រហារតាមអាកាសញឹកញាប់ជាងមុន។ ក្នុងរយៈពេលបួនខែចុងក្រោយនៃឆ្នាំ ២០២៣ តែមួយ មានការវាយប្រហារតាមអាកាសចំនួន ៧៥០ មានប្រហែល៦ដងជារៀងរាល់ថ្ងៃ។

ក្រុមអ្នករិះគន់និយាយថា ប្រទេសចិនកំពុងជួយយោធាមីយ៉ាន់ម៉ាដោយការបញ្ឈប់កិច្ចខិតខំប្រឹងប្រែងជាសកលនៅអង្គការសហប្រជាជាតិក្នុងការហាមឃាត់ការលក់អាវុធទៅប្រទេសមីយ៉ាន់ម៉ា។ ក្នុងពេលជាមួយគ្នានេះ ប្រទេសចិននៅតែបន្តគាំទ្ររបបយោធាជាមួយនឹងអាវុធ និងកិច្ចព្រមព្រៀងពាណិជ្ជកម្ម។ ទោះបីជាប្រទេសជាច្រើនបានដាក់ទណ្ឌកម្មយោធាមីយ៉ាន់ម៉ាក៏ដោយ ក៏ចិននៅតែជាសម្ព័ន្ធមិត្តដ៏រឹងមាំបំផុតមួយរបស់យោធាមីយ៉ាន់ម៉ា៕

អត្ថបទ៖ ប៊ុន សុភាព